Գումարի համաշխարհային շաբաթն այս տարի նշվեց մարտի 12-18-ը <<Money matters matter>> թեմայով, որի նպատակն է երեխաներին և երիտասարդներին վերազինել ֆինանսական ոլորտի նոր գիտելիքներով և օգնել կառուցել պայծառ ապագա՝ ճիշտ ֆինանսական որոշումներ կայացնելով։
Այս առթիվ կազմակերպվեցին մի շարք այցեր, բանախոսություններ Հայաստանի մանուկներ հիմնադրամի (COAF) երեխաների սոցիալական և ֆինանսական կրթության <<Աֆլաթուն>> միջազգային խմբակի երեխաների համար, որում իր աջակցությունն ունեցավ staff.am-ն իր կորպորատիվ սոցիալական պատասխանատվության ծրագրի և Հայաստանի մանուկներ հիմնադրամի (COAF)-ի հետ համագործակցության շրջանակներում։
Ծրագրին մասնակցեցին 235 երեխաներ Հայաստանի 5 մարզերից։ staff.am-ը, կարևորելով երեխաների կրթական և կարիերայի զարգացման հեռանկարները, մեծ ուրախությամբ սոցիալական ծրագրում ներգրավեց նաև իր հետ համագործակցող ընկերություններին։
ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ ԲԱՆԱԽՈՍՈՒԹՅՈՒՆՆ ԱՐՄԱՎԻՐ ՄԱՐԶՈՒՄ
ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ-ի Մարքեթինգի և զարգացման թիմից Արմինե Թումանյանն Արմավիր մարզի Քարակերտ գյուղի <<Աֆլաթուն>> խմբակի երեխաների համար իրականացրեց <<Մարքեթինգի հիմունքները>> թեմայով բանախոսություն։
Ինտերակտիվ քննարկման ոճով կազմակերպված հանդիպման ընթացքում երեխաները բավականին հիմնային գիտելիքներ կարողացան ձեռք բերել մարքեթինգի, մարքեթինգային գործիքների և պրակտիկ օրինակների մասին, որոնց հիման վրա կարող են ստեղծել նոր պրոդուկտներ։
ԱՅՑ STAFF.AM ՍՏԱՐԹԱՓ ԸՆԿԵՐՈՒԹՅՈՒՆ
Ծրագրի շրջանակներում կազմակերպվեցին այցելություններ նաև հայկական ստարթափ ընկերություններ՝ staff.am և gg: staff.am-ում սիրով հյուրընկալեցին Արմավիր մարզի Հացիկ գյուղի <<Աֆլաթուն>> խմբակի մասնակիցներին, իսկ երեխաներին սպասվում էր մասնագիտական առումով շատ հետաքրքիր բանախոսություն։
Մարքեթինգը՝ որպես սեփական պրոդուկտի առաջխաղացման գործիքի, պրոդուկտում արհեստական բանականության ներդրման կարևորության, դրամաշնորհներ ձեռք բերելու հմտությունների մասին և staff.am ստարթափի հաջողության պատմության իր փորձով կիսվեց staff.am համահիմնադիր Լուիզա Ավետիսյանը։
Այցի ընթացքում երեխաները ներկայացրեցին նաև իրենց կողմից պատրաստված պրոդուկտները և մասնագիտական խորհրդատվություն ձեռք բերեցին պրոդուկտների զարգացման հարցում։ Իսկ ապագայում աշխատանք փնտրելիս միաձայն նշեցին, որ պատրաստվում են օգտվել staff.am-ից: 🙂
ԱՅՑ gg ՍՏԱՐԹԱՓ ԸՆԿԵՐՈՒԹՅՈՒՆ
Հաջորդ այցելությունը gg ստարթափ ընկերություն էր, որին այս անգամ մասնակցեցին Արմավիր մարզի Լեռնագոգ գյուղի <<Աֆլաթուն>> խմբակի մասնակիցները։
Ծանոթանալով ընկերության կորպորատիվ առանձնահատկություններին՝ աշխատանքային մթնոլորտին, տեխնիկական, մարքեթինգ և դիզայներական թիմի աշխատանքներին, երեխաներն այնուհետև հանդիպում ունեցան gg ընկերության համահիմնադիր-տնօրեն Արտաշես Թովմասյանի հետ։
Ինչպես հիմնադրվեց gg ընկերությունը, ինչպես է իրականացվում ընկերության ծառայության մարքեթինգը և ինչպես է ընկերությունը գործում արդեն Հայաստանի սահմաններից դուրս․ ահա այսպիսի հետաքրքրիր և միևնույն ժամանակ օգտակար քննարկում ծավալվեց gg ընկերության Գլխավոր ֆինանսական տնօրեն Քնարիկ Գրիգորյանի և ծրագրին մասնակից երեխաների միջև։
Շնորհակալություն ենք հայտնում Հայաստանի մանուկներ հիմնադրամ (COAF)-ին կարիերայի ոլորտում նման հրաշալի նախաձեռնության համար, ինչպես նաև staff.am-ի հետ համագործակցող ընկերություններին՝ staff.am կորպորատիվ սոցիալական պատասխանատվության ծրագրին միանալու համար։
