Եվս մեկ հետաքրքիր այց ու StaffCoverage staff.am գործընկեր միջազգային կազմակերպություններից Globanet, որի գլխամասային գրասենյակը գտնվում է ԱՄՆ-ում: Անչափ զարմացած ենք այս ընկերության թիմային համախմբվածությամբ, աշխատակիցների միմյանց հանդեպ փոխվստահությամբ և այն պրոդուկտով, որն այսօր ամբողջ աշխարհում լուրջ արժեք է ներկայացնում այնպիսի ընկերությունների համար, ինչպիսիք են ԱՄՆ Կենտրոնական բանկը, Հետաքննությունների դաշնային բյուրոն՝ (FBI)-ը և այլն։
Իհարկե, ընկերությունում շատ ուշադիր են տվյալների գաղտնիությանը, բայց մեծ հաճույքով պատմում են ընկերության ստեղծման և զարգացման ուղու, հեռանկարների, ցանկալի թեկնածուի կերպարի և կորպորատիվ մշակույթի մասին։
Հատուկ շնորհակալություն ենք հայտնում Հրաչյա Ստեփանյանին մեր այցի կազմակերպանն աջակցելու համար։
Մեր մասինԹիմակիցներԲենեֆիթներԱրժեքներGLOBANET ԹԻՄԱԿԻՑՆԵՐ
Սևակ Աճեմյան
President & CEO
Արմեն
Support Team Lead
Հասմիկ
Front End developer
Աննա
Sr. Net developer
Մարիամ
Technical Support Agent
Սարգիս
Sr. Net Developer
Գրիգոր
QA Team lead
Դավիթ
Development Team lead
Մեր զրույցը սկսեցինք Globanet ընկերության հիմնադիր տնօրեն Սևակ Աճեմյանի հետ ու խոսեցինք ընկերության հիմնադրման պատմության ու զարգացման մասին։
– Globanet-ը հիմնադրվել է դեռևս 1996 թվականին Սան Ֆրանցիսկոյում։ Ի սկզբանե այն գործում էր որպես ծառայություն մատուցող ընկերություն մինչև այն պահը, երբ զգացի, որ շատ խոշոր և լուրջ կազմակերպություններ, ինչպիսիք են միջազգային բանկերը, կորպորացիաները, հետաքրքրված են և կարիք են զգում որոշ գործիքների, որոնք այդ պահին շուկան չէր առաջարկում։ Եվ այստեղից էլ ծնվեց Globanet-ի Merge 1 պրոդուկտի զարգացման պատմությունը։
– Այդ ժամանակ ինձ բախտ վիճակվեց հանդիպել այնպիսի մարդկանց հետ, ովքեր պատմեցին Հայաստանում software ծրագրավորման թիմ ունենալու գաղափարի մասին։ Սկզբից աշխատում էի outsource թիմերի հետ թե Հայաստանում, թե Հայաստանի սահմաններից դուրս՝ շուրջ տաս տարի։ Սակայն գաղտնիք չէ, որ սեփական թիմն ու միասնական գաղափարի շուրջ աշխատանքն էլ ավելի է հզորացնում պրոդուկտը։
2017 թվականից Globanet-ը ներկայացավ հայաստանյան շուկային՝ որպես ՏՏ ոլորտի ընկերություն՝ էլ ավելի ընդլայնելով հաճախորդների աշխարհագրությունը և պրոդուկտի հնարավորությունները։
– Այս պահին Հայաստանի մեր թիմում աշխատում են ավելի քան 20 աշխատակիցներ, որոնք ներգրավված են դիզայնի, ծրագրավորման, հաճախորդների աջակցման, մարքեթինգային աշխատանքներում։ Մարքեթինգը, վաճառքը, որոշ մասով նաև հաճախորդների աջակցությունը և հետգործառնական թիմի աշխատանքներն իրականացվում են նաև ԱՄՆ-ից։
Մեր հարցին թե ինչ պրոդուկտ է առաջարկում Globanet-ն իր հաճախորդներին և ինչ լուծումներով է առանձնանում ՏՏ ոլորտի մյուս ընկերություններից, Սևակը շարունակեց մեծ ոգևորությամբ․
– Եթե ընկերությունում աշխատակիցները հաղորդակցվում են ինչ-որ համապատասխան հարթակի միջոցով, օրինակ՝ Slack-ի, և փոխանցում են այնպիսի տեղեկատվություն, որն ըստ կանոնակարգի արգելվում է, ռիսկի են ենթարկում տվյալ ընկերության անվտանգությունը։ Եվ այստեղ օգնության է գալիս Globanet-ի կողմից առաջարկվող Merge 1 պրոդուկտը, որը պատճենում և արխիվացնում է տեղեկատվությունը, որպեսզի ընկերությունները կարողանան ցանկացած ժամանակ հետևել տեղեկատվական հոսքին։
– Այլ կերպ ասած, Merge 1-ը տեղեկատվության արխիվացման և նամակագրության վերահսկողության գործիք է, որը մշակվել և զարգացվում է մեր թիմի կողմից և այսօր կիրառվում է հաղորդակցության համար նախատեսված շատ հարթակներում։
– Մի շարք խոշոր ընկերություններ նաև ավտոմատացրել են բանալի բառերի և արտահայտությունների որոնման համակարգը, որի շնորհիվ ոչ պատշաճ տեղեկատվությունը նշվում է, որից հետո կարողանում են որոշակի գործողություններ ձեռնարկել։
– Եվ հենց այս աշխատանքով էլ առանձնանում է Globanet-ը մյուս ՏՏ ընկերություններից։ Աշխատում ենք այնպիսի բիզնես կազմակերպությունների հետ, որոնք կարիք ունեն մոնիթորինգի ենթարկելու իրենց աշխատակիցներին ռիսկային վարքերը հայտնաբերելու և ընկերության անվտանգությունն ապահովելու համար։
Բավականին լուրջ ու կենսական նշանակություն ունեցող պրոդուկտ, որն ապահովում է շատ ընկերությունների անվտանգությունը և տվյալների գաղտնիությունը։ Արդեն ակնհայտ է, որ նման գործիքից շատ ընկերություններ են օգտվում, շարունակենք զրույցը և ծանոթանանք Globanet-ի հաճախորդների աշխարհագրությանը։
– Մեր հաճախորդները հիմնականում ԱՄՆ-ից են, բայց, քանի որ նրանցից մեծամասնությունը բազմազգ, ֆինանսական անվտանգության ոլորտի ընկերություններ են, հաճախորդների աշխարհագրությունն ընդլայնվում է դեպի Եվրոպա, Ճապոնիա, Ավստրալիա և այլ երկրներ։ Համագործակցում ենք նաև ապահովագրական, դեղագործական և այլ ոլորտների ընկերությունների հետ։
– Օրինակ, մեր հաճախորդներից են ԱՄՆ պետական անվտանգության դեպարտամենտը (US Department of Homelend Security), FBI-ը (Federal Bureau of Investigation), ԱՄՆ Կենտրոնական բանկը և մի շարք այլ պետական և մասնավոր հատվածի խոշորագույն կազմակերպություններ։
Իսկ ի՞նչ մարտահրավերների եք հանդիպել ընկերության զարգացման ճանապարհին`
– Մարտահրավերներից մեկը հենց ՏՏ անվտանգությունն է, քանի որ ոչ բոլորն են պատկերացնում՝ ինչ է նշանակում աշխատել այնպիսի տեղեկատվության հետ, որը գաղտնի է և շատ կարևոր։ Քանի որ մենք հասանելիություն ենք ունենում տարբեր ընկերությունների տվյալների բազային և արխիվներին, այստեղ պետք է շատ ուշադրություն դարձնել, թե ովքեր են աշխատում այդ տվյալների հետ։ Որովհետև տեղեկատվության փոքր-ինչ արտահոսքը կարող է լուրջ խնդիրների հանգեցնել։
Սևակից հետաքրքիր էր իմանալ, թե սկզբունքային ինչպիսի ազդեցություն է ունեցել ընկերության զարգացման գործում՝
– Կարծում եմ դա մեթոդաբանությունն է, մեթոդական մտածելակերպը։ Ի՞նչ է ակնկալում հաճախորդը քեզնից և ինչպես ես դու վարվում, որը և ստեղծում է փոխվստահություն։ ՏՏ անվտանգությունը և թե ինչպես ենք մենք վարվում տվյալների հետ նույնպես այդ վստահության մի մասն է կազմում։
ՏՏ ոլորտի հրթիռային աճին զուգընթաց, օրեցօր մեզ զարմացնում են նաև նոր տեխնոլոգիաներն ու պրոդուկտները։ Սևակը կիսվեց նաև ընկերության հեռանկարներով․
– Այս պահին ակտիվորեն աշխատում ենք մեր ընթացիկ պրոդուկտի վրա և զուգահեռաբար նախագծում ենք նոր պրոդուկտը, որը շուկային ներկայացնելու համար որոշակի ֆինանսական ներդրումներ կպահանջվեն։ Ինչ վերաբերվում է հայաստանյան թիմին, մենք մշտապես կարիք ունենք նոր ու տաղանդավոր մասնագետների, ովքեր ոչ միայն հմուտ են իրենց ոլորտում, այլ նաև կարող են կիսվել իրենց գիտելիքներով՝ այսպիսով նպաստելով թիմի և պրոդուկտի աճին։ Մենք պարբերաբար ինթերնշիփեր էլ ենք հայտարարում, ներգրավում նոր մասնագետների ու ապահովում մեր լրացուցիչ անձնակազմը։
Իսկ ի՞նչն եք ամենից շատ կարևորում Ձեր ընկերությունում։
– Software development-ը (կատակով պատասխանեց :))) ): Գլոբանեթում ամենամեծ արժեքը ինտելեկտուալ սեփականությունն է, մարդիկ են, որովհետև առանց մարդկանց, հատկապես ձեռնարկատիրական պրոդուկտի դեպքում, software-ը չի կարող գոյատևել, աշխատել։
Գլոբանեթում տեղեկացանք, որ 2016թ․ ընկերությունը ճանաչվել է լավագույն բանկային software-ը Բանկային տեխնոլոգիաների ամսագրի կողմից։ Microsoft-ը նույնպես առաջարկում է այս software-ը՝ որպես տվյալների և հաղորդակցության վերահսկողության լավագույն գործիք:
Շարունակենք զրույցը Globanet թիմակիցներից Աննայի հետ, ով Ավագ ․Net Ծրագրավորող է, մասնագիտական հորիզոնական և ուղղահայաց աճի հնարավորությունների մասին՝
– Ես միանգամից ընդունվել եմ աշխատանքի՝ որպես ավագ մասնագետ, բայց, ընդհանուր առմամբ, աշխատանքը կազմակերպված է այնպես, որ բոլորը թիմի մի մաս են կազմում, բոլորի աշխատանքը վերահսկվում է ավելի բարձր մակարդակի ծրագրավորողների կողմից՝ խրախուսելով մասնագիտական աճը։
– Մեզ մոտ կան գնահատման հատուկ ներդրված համակարգեր․ երեք ամիսը մեկ չորս կատեգորիաներում գնահատվում է աշխատակիցների աշխատանքը, որի արդյունքում ունենում ենք հաղթողներ, ովքեր և ստանում են դրամական պարգևներ։
– Խրախուսվում են նաև որակավորման վկայականները։ Ընկերությունը ժամանակ ու ռեսուրս է տրամադրում աշխատակիցներին, որպեսզի հանձնեն որակավորման քննություններ (օրինակ, Microsoft)։ Թեման ինքներս ենք ընտրում, որը մեզ ավելի հոգեհարազատ է, ցանկալի ու կարևոր աշխատանքում աճ ունենալու համար։
– Վերջերս մեկնարկել է նոր ծրագիր, որի շնորհիվ աշխատակիցները կմասնակցեն արտասահմանյան կոնֆերանսների։ Աշնանն արդեն նախատեսվում է մասնակցություն Ամերիկայում կայանալիք Microsoft Ignite կոնֆերանսին: Ծրագիրը շարունակական է լինելու, որպեսզի ավելի մոտիկից ծանոթանանք տեխնոլոգիական աշխարհի նորարարություններին, ներդնենք մեր աշխատանքում, ինչը կնպաստի թե ընկերության, թե աշխատակիցների զարգացմանը։ Ի դեպ, միջազգային կոնֆերանսներին մասնակցության մշակույթը մեր ընկերությունում ձևավորվել է գլխավոր ճարտարագետի կողմից, ով հաճախ էր մասնակցում այսպիսի գլոբալ միջոցառումների 🙂
Աննան մեզ պատմեց, որ բացի ուղղահայաց աճից, հորիզոնական աճի հնարավորություններ նույնպես կան այստեղ՝ չնայած նրան, որ տեխնոլոգիական խումբը հիմնականում ձևավորված է։
Մեզ մոտ կարևորվում է կոնկրետ մի առաջադրանքի շրջանակներում կատարել այլ ժամանակակից տեխնոլոգիաների հետազոտություններ, ներկայացնել այդ տեխնոլոգիայի առավելություններն ու իրականացնել։ Մենեջմենթի կողմից այդ միանշանակ բարձր է գնահատվում, եթե բիզնեսի ու պրոդուկտի տեսանկյունից արդարացված է։
Մեր հարցին՝ տեխնոլոգիաների ի՞նչ խմբով են հիմնականում աշխատում, Աննան նշեց․
– Հիմնականում աշխատում ենք Microsoft-ի .NET Framework-ով, հիմա արդեն անցում ենք կատարում ASP.NET Core Framework-երին՝ կիրառելով Microsoft-ի վերջին ժամանակաշրջանում ամենադինամիկ զարգացում ապրող ամպային տեխնոլոգիաները։
– Իսկ Frontend-ում հիմնականում օգտագործում ենք jQuery։ Կարող եմ վստահ ասել, որ միշտ նոր տեխնոլոգիաներին համաքայլ ենք։
– Իհարկե, ցանկացած նոր տեխնոլոգիա սովորելն ինքնին մարտահրավեր է, որովհետև հին գիտելիքների վրա նորը կառուցելը մի փոքր դժվար է։ Անընդհատ ուզում ես հիմնվել նախորդ գիտելիքների վրա, համեմատել, սակայն տարբերությունները շատ են, պետք է դրանց լավ տիրապետել, ճիշտ ուղղությամբ գնալ, հին սխալները չկրկնել։ Այս ամենը հետաքրքիր և կարևոր է աշխատանքում, քանի որ հենց սա է տանում զարգացման։
Մեր հաջորդ զրուցակիցը Դավիթն էր՝ Ծրագրավորման թիմի ղեկավարը։ Քանի որ Հայաստանում ՏՏ ոլորտի ընկերությունները գնալով ավելի ու ավելի մեծ տոկոսային կշիռ են ձեռք բերում, հետաքրքիր էր իմանալ՝ ինչը հատկապես նպաստեց ընտրել Գլոբանեթը որպես գործատու։
– Ընկերությանը միացել եմ մեկ տարի առաջ` որպես Ավագ ծրագրավորող, այնուհետև մեկ տարվա ընթացքում կարիերայի աճ եմ ունեցել և այժմ Ծրագրավորման թիմի ղեկավար եմ: Որպես գործատու՝ Գլոբանեթ ընկերությունն ընտրել եմ՝ հաշվի առնելով օգտագործվող ժամանակակից տեխնոլոգիաները, քանի որ այստեղ հիմնականում աշխատում էին իմ նախընտրած տեխնոլոգիաներով՝ Microsoft Stack-ով և web տեխնոլոգիաներով: Բացի այդ ընկերությունն առանձնանում է իր՝ մեծ պահանջարկ ունեցող սեփական պրոդուկտներով, դրանք զարգացնելու ու ընդլայնելու հեռանկարով: Մեր պրոդուկտները շատ մեծ ապագա ունեն, ներկայումս էլ, իհարկե, պահանջված են, բայց միանշանակ կարող են իրենց ծածկույթը մեծացնել, պրոդուկտի հնարավորություններն ընդլայնել: Ընկերությունը որպես գործատու ընտրելուն նպաստել է նաև կարիերայի աճի հեռանկարը: Մեզ մոտ ընդունված է աշխատակիցներին տարբեր մակարդակի առաջադրանքներ տալ ավելի փորձառու թիմակիցների օժանդակությամբ։ Այս գործընթացի միջոցով հնարավորություն են ունենում հաղթահարել մարտահրավերները ու ձեռք բերել մեծ գիտելիքներ իրենց աճն ապահովելու համար։
Դավիթը մեզ պատմեց Գլոբանեթում թիմային հաջողության մասին։
– Մեզ մոտ ընդհանուր թիմի ձեռքբերումը միշտ շատ բարձր է գնահատվում, քան անհատինը։ Այդպիսին է մեր թիմային մշակույթը։ Թիմում ամենակարևորն այն է, որ չլինեն անվանական խնդիրներ ու առաջադրանքներ, ամենակարևորը լինի թիմի համար դրված առաջադրանք, որը թիմը լուծում է կամ ձախողում է։
– Գնահատականները նույնպես պետք է թիմային լինեն, ինչը բարձրացնում է թիմային աշխատանքի արդյունավետությունն ու թիմային ոգին։ Իհարկե, երբեմն անհրաժեշտ է նաև անհատական խրախուսել, որպեսզի յուրաքանչյուր մասնագետ իրեն գնահատված զգա իր հմտություններով ու նկատի առաջընթացը։ Մենք նույնիսկ գործընթաց ունենք, որ կարող ենք մեր թիմակցի մասին կարծիք հայտնել, նկարագրել այն հաջողությունը կամ նորույթը, որ ինքն է ներդրել աշխատանքում։
Նախագծերի կառավարման մասին խոսելիս, Դավիթը հավելեց․
– Agile նախագծերի կառավարման համար մենք օգտագործում ենք Jira-ն և Scrum framework-ը։ Թիմի կատարած աշխատանքը (velocity)-ն գնահատում ենք կատարված առաջադրանքների ծավալով, իսկ անհատական մեկ անդամի առաջադիմությունը գնահատվում է ոչ համաչափ առաջադրանքներ կատարելու պատրաստակամությամբ և այդ կատարած առաջադրանքներին մասնակցության աստիճանով։
Գրիգորից, ով ղեկավարում է QA թիմը, հետաքրքիր էր տեղեկանալ աշխատանքում իր կողմից ներդրված ամենամեծ տեխնոլոգիական նորույթի մասին․
– Որպես Ավտոմատացման ինժեներ` ինձ համար տեխնոլոգիական նորույթը թեստավորման ավտոմատ համակարգի ստեղծումն ու ներդրումն էր այս պրոդուկտում։ Շատ հետաքրքիր բան ենք մտածել ։) Հիմա բուռն ծրագրավորման փուլում է այդ գործընթացը։ Հիմնական եռաշերտ ավտոմատացման համակարգ ենք ստեղծում առանձին ֆունկցիոնալ թեստային միջավայրով։ Այս ճանապարհով նպատակ ունենք թեստավորել կատարողականությունը և Graphical User Interface-ը (GUI):
– Հիմա ընդհանուր ֆունկցիոնալ թեստավորման փուլում ենք։ Բեկումնային կարող է լինել այն իմաստով, որ ինքը մեր հաճախորդներին տրամադրելու է շատ բարձր որակի պրոդուկտ, որը միտված է ոչ միայն գտնել եղած բագերն, այլ նաև կանխատեսել ծրագրավորման վաղ փուլերում առկա խնդիրները։ Փորձում ենք մաքսիմալ բոլոր հարցերի պատասխանը ստանալ ու օգնել բոլոր թիմակիցներին։
Նշենք, որ այս պահին QA-ի թիմում աշխատում են երեք մասնագետ, առաջիկայում թեստային միջավայրի թեստերի ավելացմանը զուգընթաց նոր մասնագետների կարիք նույնպես կլինի։
Մեր հարցին՝ հաճախորդներն ինչն են առավել շատ գնահատում Globanet-ում, Գրիգորը պատասխանեց․
– Ամենաբարձրը գնահատում են մեր Հաճախորդների աջակցման թիմի կատարած աշխատանքը, որովհետև շատ որակյալ ու պատասխանատու աշխատակիցներ ունենք։ Մյուս ամենակարևոր հատկանիշը, որն էլի շատ բարձր է գնահատվում հաճախորդների կողմից, մեր agile թիմն է ու խնդիրների արագ լուծումը։
Հաճախորդների աջակցման թիմի ձևավորման ոգեշնչող պատմությանը ծանոթացանք Արմենի հետ զրուցելիս՝
– Երբ ես ինտեգրվեցի Գլոբանեթ թիմ՝ որպես Աջակցման թիմի անդամ, ինձ վրա պարտականություն վերցրեցի լինել միակ մասնագետը թիմում։ Ընկերության թիրախային շուկան, կարելի է ասել, ողջ աշխարհն է՝ Ճապոնիայից մինչև Միացյալ Նահանգներ։ Բնականաբար, հնարավոր չէր ինքնուրույն բոլոր աշխատանքները կատարել։ Կար նպատակ ստեղծել թիմ, կար նպատակ ապահովել մաքսիմալ ժամաքանակ և կար նպատակ այդ ամենն անել հնարավորինս արդյունավետ։ Աշխատանքի ընթացքում կուտակած փորձի ու տվյալների հիման վրա ստեղծվեց բազա՝ հասկանալու համար, թե հատկապես որ ժամերին է խիստ անհրաժեշտ ապահովել հաճախորդների աջակցությունը։ Ստեղծվեց համապատասխան գաղափար, փաստաթղթավորվեց, թե ինչ է պետք, ինչ պահանջներ կան աշխատակցից, ինչ գիտելիքներ պետք է ունենա, ինչ մասնագիտական հմտություններ։
– Այդպես սկսվեց թիմի կազմավորման փուլը։ Իմ անձնական ներդրումը, կարծում եմ այն է, որ տվյալ պահին թիմի անդամներին ինտեգրել եմ գործընթացի մեջ։ Ոլորտը ինքնին մի փոքր բարդ է, քանզի վեբ հավելված չէ, այլ գործիք, որն աշխատում է յուրաքանչյուրի միջավայրում առանձին։ Տեխնիկական առումով տարբերություններն անհաշվելի քանակության են։ Այդ ամենին պետք է պատրաստ լինել, այդ ամենն անելու համար պետք են հստակ գիտելիքներ, թե ինչ ակնկալել ոչ միայն տեխնիկապես, այլև հաճախորդից։ Այսինքն՝ հաճախորդը ինչպես է մտածում, ինչպես է մտածել՝ ստեղծելով իր միջավայրը, ինչպես հարմարվել դրան և վերջիվերջո, պրոդուկտը հարմարեցնել այդ միջավայրին։
Այսինքն, կարող ենք ասել, որ Գլոբանեթում աջակցությունն ավելին է, քան սովորաբար գիտենք հաճախորդների աջակցման մասին։ Այստեղ ամենօրյա աշխատանքում անընդհատ քննարկումներ են լինում QA մասնագետների հետ և աշխատանքը ավելի շատ մոտ է Համակարգային/ ցանցային ադմինին, քան աջակցմանը։
– Եթե աջակցությունը բաժանենք մակարդակների, մեզ մոտ աջակցություն հասկացողությունը վաճառքից շատ ավելի հեռու է, մենք վաճառքով չենք զբաղվում ընդհանրապես։ Ինչ-որ հարցեր, իհարկե, լինում են, բայց շատ փոքր մաս են կազմում, քանի որ մեզ մոտ օգտատերերը պատահական մարդիկ չեն, հիմնականում կազմակերպությունների համակարգային ադմիններ են, աջակցությունը սկսում է արդեն 2-րդ, 3-րդ և ավելի բարձր աստիճաններից։
Իսկ թե ինչպիսին պետք է լինի Globanet-ի թեկնածուի կերպարը (candidate persona), Արմենը շարունակեց՝
– Աշխատել, առաջին հերթին, ինքնուրույն, սեփական մոտիվացիայով ու նախաձեռնողականությամբ: Այսինքն՝ մեր աշխատանքում, մեր ոլորտում անհնար է նույնիսկ հստակ նկարագիր տալ, թե մարդն ինչ է անելու, եթե անգամ հնարավոր է, կարող է մի գրքի չափ լինել 🙂
– Այդ իսկ պատճառով հարկավոր է լինել հնարավորինս ճկուն, պատրաստ լինել մարտահրավերների, խնդիրների, որոնք կարող են կյանքում մեկ անգամ հանդիպել ու դրա ուսումնասիրությունը, բացահայտելն ու հասկանալը տևի օրեր։
– Մեզ մոտ աշխատել ցանկացող մասնագետը պետք է պատրաստ լինի ինքնազարգացմամբ ու ինքնակրթությամբ զբաղվելու։ Ընկերությունն ամեն կերպ օժանդակում և աջակցում է այդ պրոցեսին, մեզ տալիս ռեսուրսներ օնլայն տիրույթում և դրանից դուրս նոր գիտելիքներ ձեռք բերելու համար:
Քրիստինան, ով զբաղվում է Technical content writing-ի աշխատանքով, 3 բառով նկարագրեց Globanet ընկերությունը՝
– Աշխատանքի ընդունվելուց հետո երեք բան, որ նկատել եմ, դա ընկերասիրությունն է, բոլորն օգնող են, ինչի շնորհիվ շատ շուտ ինտեգրվեցի թիմում։ Նաև այստեղ գնահատում են աշխատանքը, ինչն ինձ շատ է մոտիվացնում։ Ու դինամիկ է, անընդհատ նորույթներ, նոր առաջադրանքներ, ինչն էլ հենց ապահովում է թարմություն ու հետաքրքրություն աշխատանքում։
Զրույցը շարունակեցինք Ավագ .Net Ծրագրավորող Սարգիսի հետ՝ խոսելով Գլոբանեթի կորպորատիվ մշակույթի մասին՝
– Ցանկացած ընկերության հաջողության գրավականներից մեկը լավ մշակույթ ունենալն է, ու ամեն մեկը յուրովի կարող է պատկերացնել «լավ մշակույթը»։ Գլոբանեթում ընդհանուր առօրյան աշխատանքային օրվա ընթացքում շատ ազատ է, ինչն օգնում է լավ աշխատելուն և ավելի հեշտացնում է նոր աշխատողների ինտեգրմանը թե թիմին, թե նախագծին։ Այստեղ ընդհանուր տիրում է դրական մթնոլորտ։ Շատ կարևոր է, երբ մարդ առավոտյան արթնանում է ու աշխատանքի է գնում հաճույքով։
– Մարդկային փոխհարաբերությունները նույնպես մեր կարևորագույն արժեքներից են, բոլորն անմիջական են։ Ժամանակ առ ժամանակ կազմակերպում ենք թիմային խաղեր։
Մարիամին, ով վերջերս էր միացել թիմին որպես Աջակցման մասնագետ, տվեցինք մեր արդեն ավանդական դարձած հարցը՝ ո՞րն էր Գլոբանեթի մասին ամենազարմանալի կամ հետաքրքիր ինֆորմացիան, որն իմացել եք աշխատանքի ընդունվելուց հետո։
– Ընդունվելուց անմիջապես հետո ինձ համար ամենահետաքրքիրը պրոդուկտին խորապես ծանոթանալն էր։ Ի սկզբանե, տեղեկացած էի, որ ընկերությունը զբաղվում է տվյալների արխիվացմամբ, բայց չէի պատկերացնում, որ աշխարհում կան շա՜տ ընկերություններ, որոնք արտաքին և ներքին հաղորդակցություններն արխիվացնելու և տվյալների գաղտնիությունը պահպանելու խնդիր ունեն։ Այսինքն` եթե չլիներ compliance-ը, չէր լինի նաև Գլոբանեթը։
Իսկ թե աշխատանքում որ մասն է կատարում մեծ սիրով ու նվիրվածությամբ, Մարիամը կիսվեց մեզ հետ․
– ՏՏ ոլորտում հաճախորդների սպասարկումն այսօր շատ պահանջված է։ Բայց այստեղ այնպիսի դեպքերի հետ ես առնչվում, որ ամեն անգամ մի նոր բան ես սովորում։ Ամեն անգամ տարբեր խնդիրներ են առաջարկվում ու ամեն մի բացված խնդրից (ticket) նոր բան ես սովորում։ Նախկինում ես նույնպես աշխատել եմ հաճախորդների աջակցման թիմում, ու կարող եմ ասել, որ անհամեմատելի են։ Այստեղ հաճախորդները շատ կարևոր պաշտոններ զբաղեցնող անձիք են ու իրենց հետ նույնպես հետաքրքիր է։
– Եթե համեմատենք Հայաստանի հետ, այստեղ այդքան էլ ընդունված չէ կարծիք (feedback) թողնել, իսկ արտասահմանյան պրակտիկայում շատ են կարևորություն տալիս feedback-ին։ Փոքր-ինչ անկեղծանամ …հաճելի է, երբ լավ կարծիք են թողնում մեր հաճախորդները ու գոհ են լինում մեր աշխատանքից։ Այսինքն, միշտ հաճելի է ?։
Հասմիկի հետ, ով զբաղեցնում է Frontend ծրագրավորողի պաշտոնը, խոսեցինք իր աշխատանքի առանձնահատկությունների մասին՝
– Ի սկզբանե, դժվար է պատկերացնել այն ահռելի աշխատանքը, որ կատարվում է այստեղ։ Այս պահին ես աշխատում եմ պրոդուկտի արտաքին տեսքի վրա, ու ամենահաճելի պահը, երբ կարողանում ես օգտատերի տեսանկյունից հարմարավետ Interface ծրագրավորել։ Իսկ այն, ինչ-որ backend-ում է կատարվում, արժեք ստեղծող աշխատանք է, ինչն արդեն իսկ մոտիվացնող է։
Մեր այցի ժամանակ Հայաստանում էր նաև HR ղեկավար Ժակլին Աճեմյանը, ով հիմնականում աշխատում է ԱՄՆ գլխամասից և միևնույն ժամանակ համակարգում մարդկային ռեսուրսների կառավարման հարցերը Հայաստանում։
Ժակլինը մեզ պատմեց Գլոբանեթի կորպորատիվ միջոցառումների մասին․
– Մենք հաճախ ենք կազմակերպում թիմբիլդինգների համար նախատեսված միջոցառումներ գրասենյակի ներսում, օրինակ ուրբաթ օրերին, քաղաքի ինչ-որ վայրում, ամանորյա միջոցառումներ և քաղաքից դուրս միմյանց ավելի լավ ճանաչելու համար։ Այսպիսով, աշխատակիցները կարողանում են հաճույք ստանալ թե իրենց աշխատանքից, թե առօրյայից։
– Ամեն երկու կամ երեք շաբաթը մեկ , միասին լանչ ենք ունենում, վերջերս նաև թիմով գնացինք Ջերմուկ ու միասին շատ հետաքրքիր ժամանակ անցկացրեցինք։
Ամփոփեցինք աշխատակիցներին տրամադրվող արտոնությունների փաթեթները՝
– Այն բենեֆիթներն ու հնարավորությունները, որ տրամադրում ենք մեր ամերիկյան թիմին, փորձում ենք կիրառել նաև այստեղ․
Մայրության արձակուրդ,
Նորածինների համար պարգևատրում և նվերներ հարսանիքի առիթով,
«Դպրոցական նվերների» փաթեթ աշխատակիցների երեխաների համար,
Ամենամյա արձակուրդից զատ՝ հավելյալ վճարվող 5 ազատ օր,
Առողջության ապահովագրություն։
Ընկերությունում մշակույթն այնպես է, որ աշխատակիցները հիմնականում լինեն գրասենյակում, որպեսզի կարողանան համագործակցել։ Այս մոդելով ավելի հեշտ է լինում նոր գաղափարներով կիսվել, միասին քննարկումներ ունենալ, կախված, իհարկե, նաև հաստիքից կարող են աշխատել տնից, եթե կարիքը կա այդ պահին։
Գլոբանեթում նկատեցինք, որ կողմնակից են «բաց գրասենյակ»-ին, քանի որ այն ապահովում է բաց հաղորդակցություն և նպաստում է «աշխատել միասին» գաղափարախոսությանը՝ դարձնելով այն իրական։
– «Բաց գրասենյակում» բոլորը հավասարապես գնահատված ու արժևորված են, հասանելի է հաղորդակցությունը, և որևէ տարբերություն չի դրվում մենեջմենթի և թիմի այլ անդամների միջև։ Կարող են միմյանց օգնության հարցով դիմել, փոխանակվել գաղափարներով։ Այլ կերպ ասած, «Բաց գրասենյակ»-ը որակ է ապահովում։
Ժակլինը մեզ նաև պատմեց, թե ինչպես են Globanet-ում ապահովում աշխատանք – կյանք հավասարակշռությունը։
– Աշխատանք-կյանք (work-life) հավասարակշռությունը շատ կարևոր է, անհնար է աշխատել առանց գրասենյակից դուրս առանձին կյանք ունենալու։ Մենք փորձում ենք այստեղ մոտիվացնել մեր աշխատակիցներին, որպեսզի ստեղծենք «ինչպես տանը» միջավայր։ Այսինքն, հնարավոր պայմանները ստեղծվում են, որ աշխատակիցներն իրենց հարմարավետ զգան, միգուցե ավելի երկար աշխատեն որոշ օրեր, կամ օրինակ ունենան հրատապ գործեր, որոնք անհրաժեշտ է անել աշխատանքից ավելի շուտ դուրս գալու դեպքում։ Այս ամենի հետ մեկտեղ մեր աշխատակիցներն ունեն պատասխանատվության բարձր զգացում և կարողանում են արդյունավետ կազմակերպել իրենց աշխատանքային առօրյան։
Խոսելով Գլոբանեթի արժեքների մասին, Ժակլինը հատկապես նշեց․
– Մեր արժեքներն են համակենտրոնացվածությունը, աշխատակիցների ներգրավվածությունը, նվիրվածությունն այն գործին, որն անում է մեզնից յուրաքանչյուրը, թիմային աշխատանքը և պատասխանատվությունը։ Եվ ամենից շատ ես կուզենայի շեշտել թիմային աշխատանքը։ Ներկայիս տեղեկատվական տեխնոլոգիաների աշխարհում և Գլոբանեթում ամեն ինչ կախված է թիմակիցներից և ամեն մեկի աշխատանքը գլոբալ հաջողության մի մասն է կազմում։
Կարևորեցինք խոսել նաև Գործատուի բրենդավորման մասին, մասնավորապես, ինչ քայլեր են ձեռնարկվում այս ուղղությամբ։
– Մենք շատ հզոր մարքեթինգ ունենք և հետևողական ենք նաև սոց․ մեդիաներին։ Մեր նորությունները տարածում ենք տարբեր սոց․ աղբյուրներով՝ Facebook, Linkedin, Twitter, ապահովում ենք կարծիքներ մեր հաճախորդներից կամ աշխատակիցներից։ Այնուամենայնիվ, կարծում եմ, որ ընկերության առաջխաղացումը կազմակերպելու լավագույն միջոցն աշխատակիցներն են։
ՀԵՏԵՎԵԼ ՍՈՑ․ ՄԵԴԻԱՆԵՐՈՒՄ
Խոսեցինք ընկերության կորպորատիվ մշակույթի, տարբեր բաժիններում աշխատանքի առանձնահատկությունների, պրոդուկտի ստեղծման և զարգացման պատմության մասին, իսկ ի՞նչ փուլեր է անցնում թեկնածուն մինչև Ձեր թիմին միանալը։
– Ոչ միայն պետք է թեկնածուն ունենա պրոֆեսիոնալ հմտություններ, այլ նաև շատ կարևոր է, որ թեկնածուն հարի մեր մշակույթին։ Միայն խելացի լինելը բավարար չէ, կարևոր է անհատականությունը, ինչ են ակնկալում իրենք այդ աշխատանքից, սիրո՞ւմ են արդյոք փոքր միջավայրում աշխատել կամ բաց գրասենյակում։
– Նոր մասնագետների հավաքագրման մեր հաջողություններից եմ նաև համարում, որ թեկնածուները նախապես տեսնում են ընկերությունը, հետևողականորեն ստուգում ենք մասնագիտական հմտությունները և մի քանի փուլից բաղկացած հարցազրույցներ ենք ունենում ղեկավարության հետ միասին։
Ուրախ աշխատակիցներն ամենաարդյունավետ աշխատակիցներն են։ Այս թեմայի շուրջ Ժակլինի տեսակետը լսելով էլ ամփոփեցինք ևս մեկ հետաքրքիր StaffCoverage:
– Ես իսկապես կողմնակից եմ, որ ուրախ աշխատակիցներն արդյունավետ են, բայց նաև հմուտ աշխատակիցներն են արդյունավետ։ Որովհետև միգուցե ուրախ է ինձ համար, բայց փաստացիորեն ինքն ուրախ աշխատակից չէ։ Այսինքն` ուրախությունը խիստ հարաբերական է։ Այն, ինչ-որ կարևոր է այս կոնտեքստում, դա ճիշտ գործիքների ու պայմանների տրամադրումն է, որպեսզի իրենք իրենց երջանիկ զգան, որովհետև հարմարավետությունն է նաև ստեղծում երջանկություն աշխատանքում։ Օրինակ, իրենք սուրճ կարող են պատրաստել, շփվել միմյանց հետ, ունենալ հաճելի միջավայր լանչի համար, կաշկանդված չեն զգում։ Ահա թե ինչն է ինձ ամենից երջանկացնում։ Եվ ամենակարևորը, պետք է միշտ առաջնորդվել այս մտքով․ «ինչ է ընկերությունն ինձ համար անում, և ինչ եմ ես անում այդ ընկերության համար»։ Այսինքն` գտնել ոսկե միջինը։
Ամփոփենք 🙂
Թափանցիկ աշխատանքային միջավայր, կարիերայի աճի լայն հնարավորություններ, միմյանց ամեն հարցում օգնող ու լրացնող մասնագետներ ու մեծ նվիրվածություն պրոդուկտին, որի հաճախորդների աշխարհագրությունը բազմազգ է, իսկ աջակցությունը՝ բազմամակարդակ։ Աշխատակիցների հետ զրույցից հետո ակնհայտ է նաև այն, որ այս ընկերությունը մեծ հեռանկարներ ունի շնորհիվ իր կառուցվածքային հիմքի, կորպորատիվ մտածելակերպի և այն տաղանդավոր ներուժի, որ այս պահին աշխատում է Globanet-ում։
