StaffBlog-ի այս նախագծի նպատակն է օգնել աշխատանք փնտրողներին լավագույնս ներկայանալ ցանկալի գործատուին։ Ստորև ուրախ ենք ներկայացնել Globbing ընկերության ՄՌԿ Ղեկավար Տաթևիկ Աղաբեկյանի օգտակար խորհուրդները CV կառուցման մասին։
ՏԱԹԵՎԻԿ ԱՂԱԲԵԿՅԱՆ
Globbing LLC
HR Manager
Հաճախակի թարմացրեք Ձեր CV-ն:
Աշխատանքի դիմելիս անպայման ստուգեք Ձեր CV-ում առկա տվյալները և համոզվեք, որ Ձեր փորձի մասին ամենաթարմ տեղեկություններն են ներառված։
Ուսումնասիրեք CV կառուցելու տենդենցները:
Անկախ փորձից՝ կարիերայի զարգացման տարբեր փուլերում գտնվող մասնագետի համար առկա են CV կառուցելու տարբեր մոտեցումներ, անպայման ուսումնասիրեք տարբեր մոտեցումներ և ընտրեք Ձեզ համապատասխան տարբերակը։
Ստուգեք անձնական տվյալների ճշտությունը։
CV-ն ուղարկելուց առաջ ստուգեք Ձեր անձնական տվյալների ճշտությունը, համոզվեք, որ նշել եք Ձեր ամբողջական անուն ազգանունը, կոնտակտային տվյալները, էլեկտրոնային հասցեն և այլն։
Անհատական մոտեցում ցուցաբերեք ուղեկցող նամակին։
Ուղեկցող նամակ գրելիս անհատական մոտեցում ցուցաբերեք, ուղղակի Google-ից copy paste մի արեք ստանդարտ ձև։ Սովորաբար copy paste արած նամակներն ավելի բացասական, քան դրական տպավորություն են թողում, գրեք կարճ, թեկուզ մի քանի բառով, բայց Ձեր բառերով, կամ հակառակ դեպքում ընդհանրապես մի ուղարկեք նամակ։
Նամակում նշեք այն աշխատանքը, որի համար դիմում եք։
Աշխատանքի դիմելիս նամակն ուղարկելուց առաջ անպայման subject տողում նշեք այն աշխատանքի անունը, որի համար դիմում եք։
Կարդացեք աշխատանքի նկարագիրը։
Աշխատանքի դիմելուց առաջ անպայման մանրամասն կարդացեք աշխատանքի նկարագիրը, նախ և առաջ համոզվեք, որ աշխատանքը Ձեզ հետաքրքիր է և Դուք ունեք համապատասխան հմտությունները տվյալ աշխատանքը կատարելու համար։
Ուսումնասիրեք կազմակերպությունը։
Անպայման ուսումնասիրեք տվյալ կազմակերպությունը, կազմակերպության կայքը և էջերը սոցիալական կայքերում, ուսումնասիրեք կազմակերպության աշխատակիցների LinkedIn-ի էջերը, փորձեք հասկանալ՝ արդյո՞ք այդ կազմակերպությունն այն տեղն է, որտեղ ցանկանում եք աշխատել։ Հիշեք, որ ոչ միայն գործատուն է ընտրում Ձեզ, այլև Դուք՝ գործատուին։
Անձնական լուսանկարներ մի ուղարկեք։
Մի ուղարկեք անձնական լուսանկարներով CV-ներ, առավել ևս մի ներառեք ինչ-որ մեկի հարսանիքից երեկոյան զգեստով նկարներ, Facebook-յան Ձեր էջից duck face-ով կամ եկեղեցու խորանի մոտ նկարներ, եթե, իհարկե, աշխատանքի նկարագրի մեջ չկա նման պահանջ։
Տառասխալներով CV-ներ մի ուղարկեք։
Ուշադիր ստուգեք CV-ի բովանդակությունը, համոզվեք, որ տառասխալներ կամ ոճական սխալներ չեք արել։
Ոչ գրագետ օտար լեզվով CV-ներ մի ուղարկեք։
Ավելի լավ է CV-ն ուղարկեք գրագետ հայերենով, քան թույլ կամ սխալ անգլերենով կամ ռուսերենով։
Մի ուղարկեք CV-ն աշխատանքի հայտարարության մեջ նշված լեզուներից բացի այլ լեզուներով։
Մի ուղարկեք Ձեր CV-ն հայտարարության մեջ նշված լեզուներից բացի այլ լեզվով, ամենայն հավանականությամբ Ձեր CV-ն ուղղակի չեն հասկանա։
Մի գրեք լատինատառ նամակներ հայերենով կամ ռուսերենով։
Աշխատանքի, կազմակերպության վերաբերյալ կամ ցանկացած այլ հարցով նամակով դիմելիս մի գրեք լատինատառ նամակներ հայերեն/ռուսերեն բովանդակությամբ։
Մի ներառեք գաղտնի տեղեկություններ CV-ի մեջ։
Մի ներառեք Ձեր անձնագրի սերիան, տրման ամսաթիվը, սոց․ քարտի համարը, ընտանիքի անդամների քանակը, Ձեր ամուսնական կարգավիճակի մասին տեղեկություններ, դա ոչ մի կերպ չի վերաբերվում գործատուին և որևէ կերպ չպետք է ազդի Ձեր թեկնածությունը դիտարկել կամ չդիտարկելու որոշման վրա, իսկ եթե ազդում է, ուրեմն խորհուրդ կտամ երկար մտածեք տվյալ կազմակերպությանը Ձեր CV-ն ուղարկելուց առաջ։
