staffmedia.am սյունակագիր, Գործարար կապերի մասին հոդվածի աղբյուրը՝ այստեղ:
sme.acba.am-ը հարթակ է, որը բիզնեսի կառավարմանն ու աջակցմանն ուղղված տեղեկատվության, գործիքների և ծառայությունների ամբողջություն է օնլայն տիրույթում։ Հարթակի հիմնական նպատակն է օժանդակել ՓՄՁ ղեկավարներին նոր գիտելիքների և կառավարման համար անհրաժեշտ գործիքների ձեռքբերման հարցում, ինչպես նաև ստեղծել նոր համագործակցությունների և գործընկերությունների հնարավորություններ: Կայքում առկա են ուսուցողական հոդվածներ, հոլովակներ, ձևանմուշներ և առցանց ուսուցման գործիքներ, որոնք կարող են օգտակար լինել ինչպես սկսնակ, այնպես էլ փորձառու գործարարների համար։
Գործարար կապերի հաստատումը սկսվում է մարդկանց հետ պարզապես խոսելով, շփվելով և ազդեցության շրջանակը ընդլայնելով:
Երկարատև հարաբերություններ ստեղծելով կարելի է ձեռք բերել գործարար կապերի հաստատման հմտություն, որը շատ կարևոր է թե՛ անձնական, թե՛ մասնագիտական կյանքի համար: Գործարար կապերի հաստատումը փոխշահավետ փոխհարաբերություններ ստեղծելն է գործարար մարդկանց և պոտենցիալ հաճախորդների հետ, որի հիմնական նպատակն է ձեռք բերել նոր հաճախորդներ ու գործընկերներ և պատմել Ձեր բիզնեսի մասին:
Ի՞նչ կտան Ձեզ գործարար կապերը․
- Նոր ծանոթություններ։ Գործարար կապերի հաստատման շնորհիվ կարող եք ծանոթանալ պոտենցիալ հաճախորդների հետ, այնուհետև կապ պահելով դասել նրանց Ձեր հիմնական հաճախորդների շարքին: Նոր ծանոթությունները հնարավորություն են ընձեռում նաև ձեռք բերել նոր գործընկերներ և հաստատել փոխշահավետ գործնական հարաբերություններ: Բացի դա, տարբեր անձանց հետ շփումը կօգնի ընդլայնել Ձեր մտահորիզոնը և զարգացնել նոր հմտություններ, որոնք կարող են նպաստել Ձեր անձնական և մասնագիտական աճին:
- Տեսանելիություն։ Մասնակցելով networking միջոցառումների` կարող եք ներկայացնել Ձեր բիզնեսը և հայտնվել այլ գործարար մարդկանց ուշադրության կենտրոնում, որը Ձեզ հնարավորություն կտա ձեռք բերել նոր համագործակցություններ, հաճախորդներ ու բացահայտել նոր շուկաներ։
- Փորձի փոխանակումև գիտելիքի ձեռքբերում։ Շատ դեպքերում նոր բիզնես սկսելուց առաջ գործարարները ունենում են խորհրդի կարիք այն մարդկանցից, ովքեր տեղյակ են տվյալ շուկայից և ունեն համապատասխան փորձ: Այսպիսով, նոր գործարար կապեր հաստատելով բազմաթիվ խնդիրներ և մտավախություններ՝ կապված Ձեր բիզնեսի հետ կարող են լուծում ստանալ: Դուք նաև հնարավորություն կունենաք կիսվելու Ձեր անձնական փորձով և գիտելիքներով այն անձանց հետ, ովքեր ունեն դրանց կարիքը: Բացի դա, հնարավոր է լինեն նաև այնպիսի բիզնեսների ներկայացուցիչներ, որոնց գործունեությունը փոխլրացնում է Ձեր գործունեությանը. այս տեսակի բիզնեսների հետ ամուր հարաբերությունների ստեղծումը ևս կարող է հանգեցնել արդյունավետ համագործակցության և գործընկերության: Միավորելով ռեսուրսները, հմտությունները և փորձը` Դուք կարող եք ստեղծել նորարարական լուծումներ, բարձրացնել մրցունակությունը:
- Վստահության ձեռքբերում։ Հաճախ գործարարները չունեն բավականաչափ վստահություն նոր բիզնես սկսելու կամ արդեն իսկ գործող բիզնեսի հետագա զարգացումը պլանավորելու համար: Հաջողության հասած գործարարների հետ հանդիպումները կօգնեն Ձեզ ձեռք բերել վստահություն՝ Ձեր նպատակներին հասնելու և Ձեր բիզնեսը զարգացնելուհամար:
Հետևե՛ք գործարար կապերի հաստատման հիմնական կանոններին`
- Ժամանե՛ք միջոցառմանը 10-15 րոպե շուտ և միջոցառման ավարտից հետո անմիջապես մի՛ հեռացեք: Սա հնարավորություն կտա Ձեզ հաստատել նաև ոչ ֆորմալ ծանոթություններ:
- Միջոցառմանը մասնակցելուց առաջ սահմանե՛ք հստակ նպատակներ:
- Պարտադիր Ձեզ հետ ունեցե՛ք համապատասխան դիզայնով և անձնական տվյալներով այցեքարտ, որը հետագայում հնարավորություն կտա Ձեր մասին հետաքրքվող անձանց կապ հաստատել Ձեզ հետ:
- Ուշադրություն դարձրե՛ք զրույցի ժամանակահատվածին: Անհրաժեշտ է խոսել 2-5 րոպե յուրաքանչյուր անձի հետ, պետք չէ ներկայացնել Ձեր անձի կամ բիզնեսի հետ կապված բոլոր մանրամասները, զրույցի նպատակը կարճ ինֆորմացիայի և կոնտակտների փախանակումն է:
- Ուշադիր լսե՛ք զրուցակցին, ոչինչ չպետք է խանգարի զրույցի ընթացքին:
- Հարցրե՛ք զրուցակցի անունը և մտապահեք, քանի որ շատ հաճախ զրույցի ընթացքում մոռանում եք անունը և առաջանում են զրուցակցին դիմելու հետ կապված խնդիրներ:
- Պետք է տալ միայն բաց հարցեր, այսինքն այնպիսի հարցեր, որոնք ունեն տրամաբանական շարունակություն և չեն սահմանափակվում միայն այո կամ ոչ պատասխանելով, ինչը իր հերթին հնարավորություն կտա զրույցի շարունակական լինելուն:
Այսպիսով, գործարար կապերի հաստատման միջոցով կկարողանաք մեծացնել հաճախորդների քանակը, ունենալ բիզնեսի աճ և մեծացնել Ձեր բիզնեսի շահույթը:
