StaffBlog-ի այս նախագծի նպատակն է օգնել աշխատանք փնտրողներին լավագույնս ներկայանալ ցանկալի գործատուին։ Ստորև ուրախ ենք ներկայացնել Grant Thornton CJSC People & Culture Manager Աննա Բարսեղյանի օգտակար խորհուրդները CV կառուցման մասին։
ԱՆՆԱ ԲԱՐՍԵՂՅԱՆ | SPHRi™
Grant Thornton CJSC People & Culture Manager
Որևէ աշխատանքի համար դիմելիս նախևառաջ մանրամասն ծանոթացեք թափուր աշխատատեղի պահանջներին և գնահատեք Ձեր կրթության, փորձի, հմտությունների համապատասխանությունը վերջիններիս: Ինչպես նաև տեղեկատվություն ձեռք բերեք և պատկերացում կազմեք, թե ինչ ընկերություն եք դիմում: Կարևոր է համապատասխանել ոչ միայն տվյալ աշխատանքին, այլ նաև ընկերությանը, սա նախևառաջ Ձեզ համար է օգտակար: Այս ամենը ընդունեք որպես մեկնակետ Ձեր CV-ի կառուցման կամ վերափոխման համար:
CV-ն կառուցեք այնպես, որ ներկայացվող ինֆորմացիան դիմացինին հեշտ ընկալելի լինի: Սա վերաբերում է և՛ զուտ տեսքին/կառուցվածքին, և՛ բովանդակությանը:
Եղեք հակիրճ և նշեք հիմնականում այն, ինչ վերաբերում է այն աշխատանքի պահանջներին, որի համար դիմում եք: Ինչպես ասում են՝ «Краткость – сестра таланта»: Նույնիսկ ամենահարուստ աշխատանքային և կենսափորձ ունեցող մարդու CV-ն կարելի է զետեղել մեկ կամ երկու էջում:
Առաջնահերթ նշում ենք աշխատանքային փորձը՝ սկսած վերջին աշխատավայրից, հետո` կրթություն, հետո` որակավորումներ, դասընթացներ: (Համացանցում կարող եք գտնել լավ նմուշներ):
Ձեր ստանձնած պաշտոնները նշելիս կարճ նկարագրեք նաև աշխատանքային հիմնական գործառույթները:
Լավ է հակիրճ նշել նաև Ձեր ձեռքբերումները, օրինակ՝ որևէ հաջողված նախագիծ կամ նախաձեռնություն և ինչպիսի արդյունքներ եք ունեցել: Այն, ինչ իրականացրել եք, ավելի խոսուն է, քան ուղղակի Ձեր որակների թվարկումը:
Եթե չունեք աշխատանքային փորձ, շատ կարևոր է նշել կամավորական և հասարակական աշխատանքները, պրակտիկաները, ուսման հետ կապված ձեռքբերումները, գիտական աշխատանքները, եթե այդպիսիք կան:
CV-ի ֆայլի անվանման մեջ նշեք Ձեր անուն ազգանունը, անպայման նամակի subject դաշտում նշեք պաշտոնի անվանումը, որի համար դիմում եք:
Հաղորդակցման էթիկետի տեսանկյունից դրական տպավորություն է թողնում, երբ դիմորդը նամակի body-ում կարճ ուղեկցող հաղորդագրություն է գրում:
Ուշադիր եղեք, որ CV-ում նշված լինեն Ձեր կոնտակտային տվյալները:
Ուշադիր եղեք հեռախոսազանգերին և Ձեր մեյլին: Հեռախոսազանգերին անընդհատ չպատասխանելը վատ տպավորություն է թողնում:
Եթե հետադարձ կապ չեք ստացել կամ որևէ հարց ունեք, ապա նախընտրելի է գրել պոտենցիալ գործատուին քան զանգահարել:
Եթե այդպիսի պահանջ չկա, մի տեղադրեք Ձեր նկարը CV-ում: Որևէ երևույթ, տեղեկատվություն ընկալելիս և մշակելիս մեր ուղեղն առաջնայնություն է տալիս տեսողական, հետո նոր բովանդակային ընկալմանը, ուստի տեղադրելով նկար` ենթագիտակցորեն դիրքորոշում/կանխակալ կարծիք եք ստեղծում Ձեր մասին, որը հաճախ կարող է ոչ Ձեր օգտին լինել: Եթե CV-ում նկար են պահանջում, ապա տեղադրեք միմիայն գործնական նկար:
Մի ծանրաբեռնեք CV-ն` ուղղակի թվելով Ձեր հատկանիշները (self-motivated, enthusiastic, hard working և այլն): Ըստ էության այս թվարկումը ոչինչ չի ասում Ձեր մասին:
Մի ուղարկեք ավելորդ փաստաթղթեր, եթե նման պահանջ չկա:
Մի ուղարկեք CV-ն այլ մարդու էլեկտրոնային հասցեից:
Եթե չեք դիմում ստեղծագործականություն պահանջող աշխատանքի համար, պետք չէ CV-ն ծանրաբեռնել ավելորդ գույներով կամ գեղագիտական ատրիբուտներով:
Մի ուղարկեք CV-ն որևէ տեղից այն download անելու ձևաչափով, ցանկալի է այն ուղարկել PDF ձևաչափով:
Հետևեք, որ CV-ն գրված չլինի տարբեր տառատեսակներով և զերծ լինի տառասխալներից, վրիպակներից: Գրագիտությունն ու կենտրոնացվածությունը ամենագնահատելի հատկանիշներն են ցանկացած աշխատանքի պարագայում:
Մի դիմեք այն աշխատանքի համար, որին որևէ կերպ չեք համապատասխանում :
Եվ ամենակարևորը՝ մի վհատվեք, երբ որևէ աշխատանքի համար դիմելիս Ձեր թեկնածությունը չեն դիտարկում: Փոխարենը մտածեք, թե ինչը պետք է փոխել, բարելավել և միշտ հիշեք՝ չկա ձախողում, կա միայն հետադարձ կապ և նոր հնարավորություն:
