2019 թվականին հիմնադրված Gurus ընկերությունը Հայաստանում նշանակալի դեր ունի դեղագործական և կենսատեխնոլոգիական ոլորտների զարգացման գործում։ Կարևորելով երկրի ապակենտրոն զարգացումը Gurus-ն ակտիվ ընդլայնում է իր մասնաճյուղերի աշխարհագրությունը Հայաստանի տարածքում և այս պահին ունի գրասենյակներ ինչպես Երևանում, այնպես էլ Լոռու, Տավուշի և Շիրակի մարզերում։ Այսքանով, սակայն չեն ավարտվում Gurus-ի կարևոր նախաձեռնությունները, որոնք նպատակ ունեն ոչ միայն նպաստել Հայաստանում տեխնոլոգիական ոլորտի զարգացմանը, այլ նաև տվյալ ոլորտում Հայաստանն ավելի ճանաչելի դարձնել աշխարհին։
Ընկերության ոգևորիչ գործունեությունը մեզ անտարբեր չթողեց և մենք որոշեցինք ավելին իմանալ Gurus-ի առաքելության, թիմի, արժեքների, սպասվող նախագծերի ու ապագայի պլանների մասին, որոնցով էլ սիրով կիսվում ենք ձեզ հետ։
Մեր զրուցակիցը Վահե Մարտիրոսյանն է՝ Gurus-ի հիմնադիր տնօրենը։
Վահեն երկու երեխաների հայր է, մարդ, ով հավատում է, որ հաջողությունը թաքնված է նպատակներ ունենալու, հետևողականության և ինքդ քո առջև պարտականություններ դնելու մեջ։ Ուսանող է, Հայաստանի պետական տնտեսագիտական համալսարանի վիճակագրության ֆակուլտետում պաշտպանում է ատենախոսություն բժշկական սարքավորումների արդյունավետության վերլուծության և գնահատման թեմայով։
Ի՞նչ գործունեություն է ծավալում Gurus-ը և ո՞րն է ընկերության առաքելությունը։
«Gurus-ը մատուցում է բիոմետրիկ ծառայություններ, վիճակագրական ծրագրավորում՝ SAS և R ծրագրերի միջոցով, կլինիկական տվյալների կառավարում և կենսավիճակագրություն (biostatistics) աշխարհահռչակ պայմանագրային-հետազոտական և դեղագործական ընկերություններին, որի համար հպարտ ենք և կրում ենք բավական մեծ պատասխանատվություն:
Օրինակ` դեղերի և սարքավորումների արտադրության համար անցկացվում են կլինիկական հետազոտություններ, որոնց արդյունքների հավաքագրմամբ, միջազգային և պահանջվող ստանդարտներին համապատասխանեցմամբ, վիճակագրական վերլուծությամբ և հաշվետվությունների ներկայացմամբ զբաղվում ենք նաև մենք։
Ընկերության նպատակն է մատուցել բարձր որակի ծառայություններ՝ էֆեկտիվ գնով և պահպանելով տվյալների անվտանգությունը, լինել թափանցիկ ու անմիջական գործընկերների հետ, Հայաստանում ստեղծել աշխատատեղեր և մեր երկիրը ներկայացնել այս ոլորտում որպես առաջատար»:
Ի՞նչն է առանձնացնում Gurus-ին որպես գործատու։
«Որպես գործատու Gurus-ի հիմնական առանձնահատկություններն են՝
- Հայաստանում SAS ծրագրավորողների առաջին սերունդն աշխատում է այստեղ և դա մեզ դարձնում է ամենափորձառուն և մրցունակը շուկայում։
- Մարդիկ Gurus-ում հնարավորություն ունեն սովորելու միջազգային մասնագիտություն զրոյից և ստանալու համապատասխան աշխատանք։
- Gurus-ը միակն է, որն ունի կենսավիճակագրության բաժին, որը ղեկավարում է ֆրանսահայ մեր հայրենակիցը։
- Լինելով SAS ինստիտուտի ներկայացուցիչ՝ silver partner, մեր աշխատակիցները հնարավորություն ունեն գործընկերային պայմաններով ստանալու միջազգային որակավորում»։
Ի՞նչ գործունեություն է ծավալում ընկերությունը ՀՀ մարզերում։
«Անկեղծության և թափանցիկության միջոցով ստեղծված վստահության արդյունքում ավելացան մեր գործընկերները, որին զուգահեռ նաև Gurus-ի մասնաճյուղերի աշխարհագրությունն ընդլայնվեց։ Հպարտությամբ ուզում եմ նշել, որ 2021-2023 թվականներին մենք բացեցինք մասնաճյուղեր Լոռու մարզում, Տավուշում և Շիրակում։ Վանաձորում ունենք հրաշք թիմ, Իջևանում գրանցել ենք արդեն առաջին հաջողությունները, իսկ, հաշվի առնելով Շիրակցիների համառությունը և տրամաբանությունը, վստահ եմ, որ Գյումրիում ևս կունենանք հաջողություններ։ Կարևոր է նշել, որ Երևանի և մասնաճյուղերի աշխատանքային պայմանները բացառապես նույնն են։ Սա կարևոր է մեզ համար։ Ինչպես ցանկացած հայրենասեր մարդ, ինձ համար ևս կարևոր է բացահայտել և աշխատանք գտնելու հնարավորություն տալ մարզերում գտնվող մեր հայրենակիցներին՝ մասնակցելով երկրի ապակենտրոն զարգացմանը»։
ՀՀ-ում տեխնոլոգիական ոլորտի զարգացմանն ուղղված ի՞նչ նախաձեռնություններ է իրականացնում Gurus-ը։
«SAS ծրագրավորողների 90%-ը, միգուցե և ավելին, մասնագիտական կրթություն ստացել է Gurus թիմի կողմից։ Տարեկան անցկացնում ենք 4-5 անվճար դասընթաց, որին մասնակցում է մոտ 1500 մարդ և լավագույնները հնարավորություն ունեն անցնելու վճարովի եռամսյա ինթերնշիփ ու, իհարկե, ստանալ աշխատանք։ Ինչպես նաև Gurus-ը լավագույն օրինակ է պետություն, մասնավոր հատված և բուհ համագործակցության։ Ունենք բազմաթիվ հաջողված նախագծեր այս երեք օղակի մասնակցությամբ»։
Նոր մասնագետներ հավաքագրելիս ինչի՞ն եք ուշադրություն դարձնում։ Կիսվեք այն արժեքներով, որոնք կարևորում եք ընկերությունում։
«Պատասխանատվություն, պատասխանատվություն ևս մեկ անգամ պատասխանատվություն։ Կարծում եմ մերօրյա ժամանակներում սա դարձել է ամենաթանկ արժեքներից մեկը։ Ինչպես նաև տրամաբանություն և մասնագիտական զարգացման վրա երկարաժամկետ ներդրում կատարելու պատրաստակամություն»։
Կիսվեք «Gurus»-ի զարգացման տեսլականով։ Ի՞նչ ձեռքբերումներ կցանկանաք ունենալ մեկ տարի անց։
«Վստահ եմ, որ կունենանք կենսավիճակագրության ավելի մեծ բաժին, ավելի հզոր թիմ, կներկայանանք ավելի ընդլայնված ծառայությունների ցանկով և կունենանք մեկ տարի ավել փորձ»։
Ամփոփելով մեր տպավորիչ այցելությունը Gurus, շնորհակալություն ենք հայտնում Վահեին բովանդակալից զրույցի համար, իսկ ձեզ հիշեցնում ենք, որ կարող եք հետևել Gurus-ի կարիերայի էջին staff.am-ում, որպեսզի բաց չթողնեք ընկերության թարմացումները։
