Hexact -ի թիմը եռանդ է, որն աճում է ռեակտիվ արագությամբ

Hexact-ն իր ավելի քան 50,000 օգտատերերին հնարավորություն է տալիս մեկ քայլ առաջ լինել իրենց շուկաներում, հայտնաբերել կայքերի խնդիրները և ավտոմատացնել ժամանակատար գործողությունները՝ գրանցելով մասշտաբային արդյունքներ։ 

Ընկերությունը 2021 թվականն ամփոփեց տարեկան հասույթի 400% աճով, հաճախորդներով աշխարհի 160 երկրներում։

Hexact-ի ստեղծած օպերացիոն համակարգը միտված է ունիվերսալ դարձնելու դատայի ու արհեստական բանականության օգտագործումը:

Hexact-ի էկոհամակարգի պրոդուկտները՝ Hexomatic-ը, Hexowatch֊ը և Hexometer֊ը, թույլ են տալիս օգտագործել համացանցը որպես տվյալների անձնական բազա՝ առանց ծրագրավորման նույնիսկ մինիմալ գիտելիքի։

Ընկերության հաջողության բանաձևի ու զարգացման հեռանկարների մասին ավելի լավ պատկերացում կազմելու համար  զրուցեցինք թիմի անդամներից մի քանիսի ու հիմադիր֊տնօրենի հետ։

Hexact-ի թիմը՝ հեքսակտցիների աչքերով

Hexact-ում գրեթե ամեն ինչ թափանցիկ է, ասում են թիմի անդամներն ու մասնավորեցնում․ հետագա պլանները, պրոդուկտների զարգացման ճանապարհները։

Մենք ավելի շատ ընտանիքի ենք նման։ Միմյանց հարգելը, օգնելն ու թիմային աշխատանքը մեր ընկերության ամուր հիմքերն են։ Ահռելի մեծ չափաբաժնով դրական էներգիա կա բոլոր աշխատողների մոտ։ Իսկ մեր գործատուն մեր ամենամեծ մոտիվացիան է, որովհետև ամեն կերպ քաջալերում է աճել ու մեր գործի մեջ առաջ գնալ։ Այստեղ մեզ միշտ խրախուսում են, լսում՝ մեր կարծիքները, նշում՝ թերությունները, օգնում շտկել ու զարգանալ։

Անի Ղարիբյան, Hexact-ի հաճախորդների սպասարկման մասնագետ

Չնայած ընդամենը 23 տարեկան էի, երբ Hexact ընդունվեցի, բայց արդեն հասցրել էի աշխատել 6 ընկերություններում, հիմնականում ՏՏ ոլորտում, և ամենազարմացնոնղն այն էր, որ այդքան թիմերում աշխատելուց հետո, երբ եկա Hexact, առաջին օրը տեսա, որ տնօրենը մեզ հետ նույն սենյակում նստած էր աշխատում՝ աշխատողների հետ հավասար պայմաններում։ Պատկերացրեք իմ զարմանքը, երբ նույն օրը նաև տնօրենի հետ գնացինք լանչի։ Այդ անմիջական մթնոլորտն արդեն 1,5 տարի է՝ չի փոխվում, միայն թիմն է մեծացել, եռապատկվել։ 

Նվարդ Մանուկյան, Hexact-ի UI/UX/Graphic դիզայներ

Hexact-ում առաջին հերթին ինձ դուր է գալիս անսահմանափակ ստեղծագործելու հնարավորությունը կոդ գրելիս։ Այստեղ մենք կարող ենք մտածել և ստեղծել նոր ծրագրային լուծումներ, ավտոմատացման նոր գործիքներ։ Դրա համար մեր ընկերությունը տրամադրում է միջոցներ, ժամանակ, իսկ յուրաքանչյուր հաջողության դեպքում խրախուսում է։ Սա ոգևորող է և տրամադրում է ավելի բարդ խնդիրներ լուծելու։ 

Վիկտոր Մանուկյան, Hexact-ի BackEnd Software engineer 

Վիկտորը, ինչպես մյուս հեքսակտցիները, սիրում է նաև թիմային քեֆերն ու հավաքները, բայց նաև բաց չի թողնում ամեն շաբաթ անցկացվող TechTalk-երը, որոնց ընթացքում տնօրենը կամ թիմի փորձառու անդամները որևէ թեմայով դասընթաց են անցկացնում: Վիկտորը պատմում է, որ հաքաթոն են անցկացրել, որի արդյունքում ստեղծվել է 3 նոր պրոդուկտ, որոնցից մեկը՝ «discoverprofile.com»-ը, արդեն ունի օրական 10,000-ից ավելի օգտատեր:

Իսկ ամեն մի նման հաջողություն թիմով նշում են նաև հետաքրքիր հավաքույթով, երբեմն աշխատողների ընտրությամբ միասին ֆիլմ դիտելու կամ «խմելու» են գնում: 

Աշխատանքն ու զարգացման հնարավորությունները Hexact-ում 

Hexact-ում, ինչպես Tech ոլորտի այլ ընկերություններում, գործում է խրախուսման ու բոնուսների համակարգ․ բժշկական ապահովագրություն, ճկուն աշխատանքային գրաֆիկ, ազատ օրեր, կորպորատիվ միջոցառումներ, աշխատավարձի վերանայում, վերապատրաստման դասընթացներ և այլն։ 

Հեքսակտցիները երիտասարդ են, ուրախ, ստեղծարար, ջերմ, օգնող, իրարից շատ տարբեր են, բայց իրար լրացնող ու թիմային։ Յուրաքանչյուրին հաջողվել է յուրահատուկ արժեք ներդնել, ինչը թիմն էլ ավելի ամբողջական է դարձրել։ Նոր թիմակիցների ընտրելիս, իհարկե, կարևորում ենք մասնագտական հմտություններն ու գիտելիքները, սակայն առաջին հերթին հաշվի ենք առնում մեր աշխատանքային մշակույթին համապատասխանությունը։ Մեզ համար շատ կարևոր է, որ թեկնածուները զարգացման ու մշտապես նոր գիտելիքներ ձեռք բերելու ձգտում ունենան և, իհարկե, բաց լինեն նոր տեխնոլոգիաների ու փոփոխությունների առաջ։

Անի Երիցյան, Hexact-ի HR Manager

HR ղեկավարի խոսքով, հիմա թիմը բավականին արագ է մեծանում, գրեթե բոլոր բաժիններում պատրաստ են ընդունելու ինչպես փորձառու, այնպես էլ սկսնակ մասնագետների։ 

Hexact-ի անդադար էվոլյուցիայի մասին

Hexact-ն առանձնանում է նաև անդադար զարգացմամբ՝ ձեռք բերելով նոր հաճախորդներ ու գործընկերներ: Նոյեմբերին եռամյա պայամանգիր կնքվեց SADA-ի և Google Cloud-ի հետ։ 

Մենք վերջերս նաև նիդերլանդական, ամերիկյան և հայկական վենչուրային ընկերություններից ստացանք «Pre seed» ներդրումներ: 2022թ. համար ավելի ամբիցիոզ նպատակներ ենք դրել, որոնց հասնելու ենք Hexact-ի թիմով: 

Ստեփան Ասլանյան, Hexact-ի հիմնադիր տնօրեն

Hexact-ը ներկայում 50,000-ից ավելի ակտիվ օգտատեր ունի։ Ընկերության պրոդուկտների աուդիտի գործիքները 2021 թ․ վերլուծել են 1,021,347,652 էջ, որոնցից 95,549,999-ում խնդիրներ են հայտնաբերել և ծանուցել հաճախորդներին։ Իսկ Hexowatch-ի գործիքներով հայտնաբերվել է 5,871,580 փոփոխություն և նույնպես ծանուցվել օգտատերերին։