Մինչ աշխարհի տարբեր երկրներում համավարակի օրերին շատուշատ կազմակերպություններ փնտրում են մարդկային ռեսուրսները կառավարելու արդյունավետ, արագ ու ավտոմատացված տեխնոլոգիական լուծումներ, Հայաստանում staff.am -ի ստարթափ թիմը, չնայելով նոր կորոնավիրուսին ու աշխատանքային ռեժիմի փոփոխություններին, շարունակում էր ակտիվորեն աշխատել։ Իհարկե, գլուխ չգովենք, բայց մեզ մոտ հիանալի ստացվեց թե տանից աշխատանքը, թե գլոբալ աշխատաշուկայում աշխատանքային նոր նորմ դարձած հիբրիդային ռեժիմը, ինչի արդյունքում էլ այսօր մեծ ոգևորությամբ կիսվում ենք մեր ամենաթարմ (բայց ինչպես միշտ ոչ ամենավերջին :)) նորություններով։
Մուտք ևս երեք երկիր՝ Ղրղզստան (hirebee.kg), Տաջիկստան (hirebee.tj) և Ուզբեկստան (hirebee.uz): Կարծում ենք կհիշեք, որ Կենտրոնական Ասիայի քարտեզի վրա մեր մուտքերի փինավորումը սկսել ենք դեռևս 2019թ․ հունիսից, երբ հայտարարեցինք ԱՊՀ երկրներից առաջինը ղազախական շուկա (hirebee.kz) մուտք գործելու մասին։
Ու այսօր մեր հարյուր հազարավոր հետևորդների հետ միասին տոնում ենք ոչ միայն Ղազախստանում ունեցած մեկամյա ձեռքբերումները, Կենտրոնական Ասիայի ևս երեք երկրում ներկայացվածությունը, այլ նաև շարունակում ենք քայլել մեր նպատակների ու ծրագրերի իրագործման ճանապարհով։ Մինչև տարվա վերջ նախատեսում ենք կարիերայի հարթակը ներկայացնել երեք նոր շուկաներում՝ Ռուսաստան (hirebee.ru), Բելառուս (hirebee.by), Վրաստան (hirebee.ge), իսկ վերջնանպատակում՝ HireBee-ն կիրառելի և ճանաչելի դարձնել ամբողջ աշխարհում իր HRtech լավագույն լուծումներով։
Այս ոգևորվածության շարժառիթներից գլխավորը HR ոլորտը զարգացնելու ու կատարելագործելու ձգտումն է, որ 2017 թվականից մինչ այսօր ունեն մեր հիմնադիրները, ու ահա թե որտեղից էլ մոտիվացվում ու միասնական ամբողջ թիմով առաջ ենք շարժվում։
Այս պահին Կենտրոնական Ասիայում պրոդուկտի կորպորատիվ հաճախորդների շարքն են զբաղեցնում ՏՏ, բանկային, ֆինանսական, ապահովագրության, արտադրության, հեռահաղորդակցության և այլ ոլորտների այնպիսի խոշորագույն ընկերություններ, ինչպիսիք են՝ Home Credit Bank-ը, British American Tobacco-ն, Beeline Kazakhstan-ը, EFES Kazakhstan-ը, Sberbank Kazakhstan-ը և այլ ընկերություններ։
«Ղազախստանում հարթակի թողարկումից հետո մեր Գործատու ընկերությունները բազմիցս են մեզ հետ կիսվել HireBee-ն Կենտրոնական Ասիայի մյուս երկրներում նույնպես տեսնելու ցանկությամբ։ Բացի այդ այս շուկաներում HRTech հարթակի զարգացման բավականին մեծ պոտենցիալ ենք նկատում։ Եվ ըստ մեր ուսումնասիրությունների համապատասխան սպասումներ ունենք», – նշեց staff.am և HireBee համահիմնադիր և ղեկավար Վահե Ավետիսյանը։
Քանի որ HR ոլորտի պրոդուկտներում նոր սերունդ ենք թևակոխում, որտեղ շեշտը դրվում է պրոդուկտի հնարավորությունների, բոլորը մեկում տեխնոլոգիական լուծումների, պրոցեսների ավտոմատացման և մեծ տվյալների վերլուծության վրա, HireBee-ի պահանջարկը շարունակ մեծանում է։
«Կենտրոնական Ասիայում HireBee-ի ռազմավարությունը շարունակելու է մնալ նույնը, ինչպես նաև կաշխատենք պրոֆեսիոնալ ուղղություններով այն ընկերությունների հետ, որոնց անհրաժեշտ է առաջադեմ թվային գործիքակազմ, և որոնք հավասարապես կարևորում են նաև Գործատուի բրենդը, այսինքն՝ HR բրենդը», – հավելեց staff.am և HireBee համահիմնադիր Լուիզա Ավետիսյանը։
Նշենք, որ Covid-19-ի համավարակի ընթացքում մեր թիմով ոչ միայն մշակում և կատարելագործում ենք գործիքները Հայաստանի և միջազգային շուկաների համար, այլ նաև հատուկ քաղաքականություն ենք մշակել, որն արտակարգ դրության և ֆինանսատնտեսական դժվարությունների ժամանակ օգնում է ընկերություններին և անհատ թրեյներներին առավել մատչելի տարբերակով օգտվել staff.am և HireBee պրոֆեսիոնալ գործիքներից։
Դե իսկ, այս նվաճումներն էլ ապահովում են մեր ամենօրյա աշխատանքի եռանդը, երբեք կանգ չենք առնում ու այս պահին էլ ակտիվորեն աշխատում ենք նոր հայկական պրոդուկտով միջազգային շուկա մուտք գործելու ուղղությամբ, որի փակագծերը շատ շուտով կբացենք 🙂
