Բոլոր աշխատակիցների կյանքում էլ լինում են շրջադարձային պահեր, երբ պետք է գործատուի հետ խոսել աշխատավարձի բարձրացման մասին: Սակայն, գրեթե բոլորը դժվարանում են կատարել այդ համարձակ քայլը: Մեզանից յուրաքանչյուրն էլ ցանկանում է ավելի շատ վարձատրվել իր կարատած աշխատանքի համար, բայց դրա մասին խոսելը ոչ միշտ է հեշտ լինում: Ըստ վիճակագրական տվյալների, աշխատող մարդկանց միայն 37%-ն է բանակցում ավելի բարձր աշխատավարձ ստանալու համար: Շատ հաճախ անքաղաքավարի է համարվում գումարի մասին խոսելը, ինչն ավելի է բարդացնում գործընթացը: Աշխատողները չեն ցանկանում այնպիսի տպավորություն թողնել, որ իրենց միայն գումարն է հետաքրքրում, սակայն, լուռ մնալը հարցի լուծման ճիշտ տարբերակը չէ:
Խնդրելը և ստանալը այն ինչին Դուք արժանի եք ոչ միշտ է դյուրին, բայց, ստորև ներկայացված 5 խորհուրդները կօգնեն Ձեզ ավելի վստահ լինել այդ հարցում:
1 Ձևակերպեք Ձեր խոսքը հիմնվելով ոչ թե նախկին հաջողությունների, այլ ապագա ձեռքբերումների վրա
Գործատուի՝ Ձեզ ավելի բարձր վարձատրելու միակ դրդապատճառը վստահությունն է, որ Դուք կկարողանաք ավելի արդյունավետ աշխատել և ավելի լավ արդյուքներ գրանցել ապագայում: Եթե ցանկանում եք, որ Ձեր աշխատավարձը բարձրացնեն, ապա պետք չէ նշել թե ինչքան լավ եք աշխատել նախկինում: Անհրաժեշտ է նաև խուսափել Ձեր և այլ աշխատակիցների ստացած աշխատավարձերի համեմատությունից: Ասեք թե ինչ կարող եք Դուք անել ապագայում և ինչպես կարող եք նպաստել այդ ընկերության զարգացմանը: Այդպես գործատուն կցանկանա քաջալերել Ձեզ և չի մերժի Ձեր առաջարկը:
2 Նախօրոք հանդիպում նշանակեք
Եթե ցանկանում եք, որ գործատուն իսկապես բարձրացնի Ձեր աշխատավարձը, ապա պետք չէ նրան անակնկալի բերել: Անհրաժեշտ է նախօրոք պայմանավորվել և նրան տեղեկացնել, թե ինչի մասին է լինելու հանդիպումը: Այդպես և՛ Դուք, և՛ գործատուն ժամանակ կունենաք մտածելու և պատրաստվելու, ինչը միանշանակ ավելի կհեշտացնի հանդիպման ընթացքը: Ուսումնասիրությունները ցույց են տվել, որ հաջող բանակցություն ունենալու համար նպաստավոր են հինգշաբթի և ուրբաթ օրերը, քանի որ այդ օրերին գործատուն ավելի արագ կհամաձայնի՝ ցանկանալով ավարտին հասցնել այդ շաբաթվա անավարտ մնացած գործերը:
3 Մի սպառնացեք
Աշխատավարձի մասին խոսելը նորմալ է, բայց պետք չէ սպառնալ գործատուին, որ հակառակ դեպքում դուրս կգաք աշխատանքից: Նույնիսկ, եթե այդ կերպ կարողանաք հասնել Ձեր նպատակին, այդպիսով կլարեք Ձեր և գործատուի հարաբերությունները: Խնդրեք բարձրացնել Ձեր աշխատավարձը, այլ ոչ թե պահանջեք:
4 Հաշվի առեք ոչ գումարային տարբերակները
Եթե Ձեր գործատուն ի վիճակի չէ Ձեզ ավելի բարձր վարձատրել, ապա պետք է փնտրել հարցի լուծման այլ հնարավոր տարբերակներ: Օրինակ, կարելի է խնդրել, որ նա ավելացնի Ձեր հանգստյան օրերի քանակը կամ ավելի ճկուն դարձնի Ձեր աշխատանքային գրաֆիկը: Նույնիսկ, կարելի է խնդրել, որ նա բարձրացնի Ձեր պաշտոնը՝ առանց բարձրացնելու աշխատավարձը: Միգուցե այս տարբերակը ի սկզբանե տարօրինակ թվա, բայց հետագայում այն միանշանակ Ձեր օգտին կծառայի, երբ ընկերությունը ի վիճակի կլինի Ձեզ ավելին վարձատրելու:
5 Պատրաստ եղեք ՙՙՈչ՚՚ պատասխանի
Շատ հաճախ, եթե նույնիսկ ընտրեք լավագույն վայրն ու ժամանակն աշխատավարձի բարձրացման մասին խոսելու, հնարավոր է , որ գործատուն մերժի Ձեր խնդրանքը: Պետք է պատրաստ լինել դրան և հնարավորին չափով կառավարել հույզերը: Հիշեք, որ այդ պատասխանը հավերժական չէ և որոշ ժամանակ անց կրկին փորձեք: «Ոչ» -ը կարող է «այո» դառնալ, եթե լինեք համբերատար և հետևողական:
Բոլոր աշխատակիցներն էլ ցանկանում են ավելի բարձր վարձատրվել, սակայն, ոչ բոլորն են համարձակություն ունենում այդ մասին խոսելու իրենց գործատուի հետ: Ինչպես ասում են՝ մինչև չհարցնեք, պատասխանը միշտ էլ «ոչ» կլինի: Հետևեք վերը նշված խորհուդներին ու գործի անցեք:
