Ինչպես ճիշտ ընտրել ապագա գործատուին

Ըստ Gallup-ի վերջին հետազոտությունների, աշխատակիցների ավելի քան 50%-ը հեռանում է աշխատանքից ոչ թե աշխատավարձի կամ հաստիքի պատճառով, այլ ընկերության մշակույթի, ղեկավարության կամ թիմի հետ անհամատեղելիության պատճառով։ Աշխատանքի որոնման գործընթացում առանցքային է ոչ միայն ընտրել այն հաստիքը, որը համապատասխանում է ձեր գիտելիքներին, հմտություններին և կարիերայի նպատակներին, այլ նաև խորությամբ ուսումնասիրել այն կազմակերպությունը, որտեղ պատրաստվում եք դիմել։

Ընկերության համբավը, աշխատանքային մշակույթը, կառավարման ոճը և թիմային մթնոլորտն ուղղակիորեն ազդում են ձեր մասնագիտական զարգացման և աշխատանքային բավարարվածության վրա։ Հաջողակ կարիերա կառուցելու համար անհրաժեշտ է գնահատել ոչ միայն առաջարկվող աշխատավարձն ու պաշտոնի պարտականությունները, այլ նաև վերլուծել՝ արդյոք տվյալ միջավայրը համահունչ է ձեր արժեքներին և մասնագիտական աճի տեսլականին։

Ինչու է կարևոր պոտենցիալ գործատուի և նրա կորպորատիվ մշակույթի ուսումնասիրությունը

Պոտենցիալ գործատուի և նրա կորպորատիվ մշակույթի ուսումնասիրությունը կարևոր է մի քանի պատճառներով։ 

Առաջին հերթին, այն թույլ է տալիս խուսափել ժամանակի անարդյունավետ ծախսից: Երբ նախապես ուսումնասիրում եք ընկերությունը, դուք կարող եք գնահատել, թե արդյոք տվյալ պաշտոնը և աշխատավայրը համապատասխանում են ձեր մասնագիտական նպատակներին և սպասելիքներին: Սա օգնում է խուսափել անիմաստ դիմումներից և հարցազրույցներից:

Այսպիսով, նախնական ուսումնասիրությունն օգնում է կայացնել ավելի տեղեկացված որոշում և խուսափել հնարավոր հիասթափություններից ապագայում: Այն նաև բարձրացնում է ձեր հաջողության հավանականությունը թե՛ դիմումի և թե՛ հետագա աշխատանքային գործունեության ընթացքում:

Ինչպես ուսումնասիրել կազմակերպությունը

 Եկեք հասկանանք թե ինչ տարբերակներով կարող ենք ուսումնասիրել ընկերության կորպորատիվ մշակույթը, նախքան դիմելը․

1. Սոցիալական էջեր – Սոցիալական ցանցերը կարևոր աղբյուր են՝ հասկանալու, թե ինչպիսի թվային ներկայություն ունի ընկերությունը։ Ստուգեք, թե արդյոք այն ակտիվ է Facebook, LinkedIn, Twitter կամ այլ հարթակներում։ Դրանց միջոցով կարելի է ծանոթանալ ընկերության արժեքներին, նախագծերին և աշխատակազմի գործունեությանը։

2․Կայքէջ – Ընկերության պաշտոնական կայքը հաճախ ամենաարժեքավոր աղբյուրն է՝ նորություններին, ձեռքբերումներին և կարիերայի հնարավորություններին ծանոթանալու համար։ Այստեղ դուք կարող եք գտնել մանրամասներ ընկերության մասին, նրա պատմությունը, արժեքները և գործունեության հիմնական ուղղությունները։

3. Staff.am-ի կարիերայի էջ – Եթե ընկերությունը գրանցված է staff.am-ում, ապա օգտվեք նրա կարիերայի էջից՝ ուսումնասիրելու համար առաջարկվող հնարավորությունները։ Այս հարթակում դուք կգտնեք թիմային լուսանկարներ, տեսանյութեր, հոդվածներ և այլ արժեքավոր տեղեկություններ, որոնք կօգնեն հասկանալու ընկերության մշակույթն ու աշխատանքային միջավայրը։

4. Միջազգային հարթակներ՝ Glassdoor, The Muse, Indeed – Միայն տեղական աղբյուրները բավարար չեն ընկերության մասին ամբողջական պատկերացում կազմելու համար։ Glassdoor, The Muse, Indeed և այլ միջազգային պլատֆորմները տրամադրում են աշխատակիցների կարծիքներ, գնահատականներ և նկարագրություններ ընկերությունների մասին։ Չնայած Հայաստանում դրանք դեռ այնքան տարածված չեն, սակայն միջազգային խոշոր ընկերությունների մասին արժեքավոր տեղեկություններ կարող եք գտնել այստեղ։

5. Staffmedia.am – Staffmedia.am-ը հիանալի ռեսուրս է, որտեղ ներկայացվում են լավագույն գործատուները, նրանց մշակույթը և կարիերայի հնարավորությունները։ Այստեղ դուք կարող եք գտնել հոդվածներ, հարցազրույցներ և տեսանյութեր, որոնք կօգնեն ավելի լավ պատկերացում կազմել պոտենցիալ գործատուի մասին։

6. LinkedIn – LinkedIn-ը ոչ միայն մասնագիտական ցանց է, այլև կարևոր աղբյուր՝ ընկերության ներքին միջավայրը բացահայտելու համար։ Շատ ղեկավարներ, HR մասնագետներ և աշխատակիցներ հաճախ այստեղ են կիսվում ընկերության գործունեության մասին։

7. Ընկերության աշխատակիցներ – Եթե ցանկանում եք ստանալ ավելի անձնական կարծիքներ, կարող եք զրուցել ընկերության ներկայիս կամ նախկին աշխատակիցների հետ։ Սակայն պետք է հաշվի առնել, որ նրանց կարծիքները կարող են լինել սուբյեկտիվ և կախված նրանց անձնական փորձից։ Այսպիսով, աշխատակիցների կարծիքները պետք է համադրել այլ աղբյուրներից ստացված տեղեկատվության հետ։

Ինչ անել, երբ հետաքրքրող ընկերությունում չկա թափուր հաստիք

Եթե ձեր նախընտրած ընկերությունում ներկայումս չկա համապատասխան թափուր հաստիք, մի հուսահատվեք: Կարևոր է շարունակել ակտիվորեն հետևել ընկերության գործունեությանը, քանի որ կարիերայի էջում պարբերաբար հայտնվում են նոր թափուր հաստիքներ և հնարավորություններ: Ահա մի քանի քայլ, որոնք կարող եք ձեռնարկել՝ բաց չթողնելու հնարավորությունը.

1. Հետևեք ընկերության կարիերայի էջին staff.am-ում: Այս կերպ դուք կկարողանաք թարմացնել Ձեր տվյալները և ստանալ ամենահետաքրքիր թարմացումներն անմիջապես։
2. Հետևեք ընկերության կայքէջին: Ընդամենը մի քանի րոպե ծանոթանալով կայքէջին, կարող եք հայտնաբերել նոր գործառույթներ կամ թափուր հաստիքներ։
3. Հետևեք ընկերությանը սոց․ ցանցերում: Պարբերաբար հետևելով ընկերության հրապարակումներին, դուք  բաց չեք թողնի ոչ մի նոր հնարավորություն։
4. Հետևեք ընկերության հավաքագրման մասնագետներին սոց հարթակներում։ Հաճախ հավաքագրման մասնագետները իրենց սոց հարթակներում ևս տեղադրում են ընկերությունում առկա թափուր հաստիքների մասին հայտարարություններ։

Եվ մեկ կարևոր խորհուրդ staffmedia.am-ի կողմից․ աշխատանք փնտրելու գործընթացը ավելի արդյունավետ դարձնելու համար խորհուրդ ենք տալիս ստեղծել բաժանորդագրություն staff.am-ում՝ ըստ կատեգորիայի, ընկերության կամ հմտության։ Սա թույլ կտա ձեզ ստանալ տեղեկատվություն հենց այն աշխատատեղերի մասին, որոնք համապատասխանում են ձեր կարիերայի նպատակներին և մասնագիտական հմտություններին։

Այսպիսով աշխատանքի որոնման գործընթացը շատ ավելին է, քան ճիշտ հաստիքի ընտրությունը։ Վերը նշված գործիքները կօգնեն ձեզ ավելի լավ հասկանալու ընկերության մշակույթը, արժեքներն ու կարիերայի հնարավորությունները։
Իսկ նյութին ավելի մանրմասն ծանոթանալու համար խորհուրդ ենք տալիս դիտել Career Factory by staff.am-ի 4C դասընթացի 3-րդ մոդուլի տեսադասը։

Եթե պատրաստ եք ևս մեկ աստիճան բարձրանալու ձեր կարիերայի սանդուղքով, ապա հիմա ճիշտ ժամանակն է սկսելու։ Ձեր հնարավորությունն արդեն սպասում է ձեզ staff.am-ում։