Եթե Դուք մտածում եք, որ պետք է շատ սիրեք Ձեր աշխատանքը, որպեսզի երջանիկ լինեք աշխատավայրում, ապա հետևեք այս հոդվածին և կտեսնեք, թե ինչպես են ազդում ամենօրյա սովորույթները և որոշումները աշխատավայրում Ձեզ երջանիկ զգալու վրա։
Աշխատավայրում ուրախ լինելն իսկապես շատերին է անհանգստացնում, որ նույնիսկ ժամանակակից ընկերությունները փորձում են լուծել այդ խնդիրը՝ ընդունելով հատուկ աշխատակից՝ Chief happiness officer, մի քիչ դժվարանում եմ պաշտոնը թարգմանել հայերենով, բայց կարելի է ասել Ուրախության գլխավոր աշխատակից։ Ինչևէ, մարդ, ում պարտականությունն է աշխատավայրում ապահովել ուրախ մթնոլորտ։
Իսկ ինչո՞ւ ենք մտահոգված նման կարևոր հարցով։ Փաստն այն է, որ օրվա մեկ երրորդը անց ենք կացնում աշխատավայրում, երբեմն լարված մթնոլորտ, չնախատեսված հանդիպումներ, քննարկումներ և գերհագեցած օրակարգ, որոնք ակամայից հանգեցնում են տրամադրության անկման։
Իսկ ինչպես երջանիկ զգալ աշխատավայրում․․
Աշխատանքի վայրում ուրախ զգալու համար ամենօրյա աշխատանք է հարկավոր, ինչպես օրինակ առողջ սնվելն է։ Դա հմտություն է, որը ձեռք բերելու և կատարելագործելու համար կարող եք հետևել StaffBlog օգտակար խորհուրդներին, որոնք կօգնեն Ձեզ հասնել ամենօրյա երջանիկ առօրյայի աշխատավայրում։
1. Օրը սկսեք լավ նոտայով
Շատ մեծ նշանակություն ունի, թե Դուք ինչպես եք Ձեզ զգում վաղ առավոտյան։ Փենսիլվանիայի համալսարանի հետազոտողները հատուկ ուսումնասիրել էին Հաճախորդների սպասարկման բաժնի աշխատակիցների տրամադրությունը և կատարողականությունը վաղ առավոտյան և ողջ օրվա ընթացքում։ Այն աշխատակիցները, ովքեր ունեին լավ տրամադրություն առավոտյան, աշխատել են արդյունավետ ողջ օրվա ընթացքում և իրենց ավելի երջանիկ են զգացել:
Ուստի խորհուրդ է տրվում օրը սկսել այնպիսի գործողություններով, որոնք իսկապես բարձրացնում են Ձեր տրամադրությունը։ Օրինակ, կարող եք մի քանի րոպե հատկացնել սուրճը կամ թեյը հանգիստ վայելելու համար։ Ինչու չէ նաև սուրճի վայելքը կարող եք համատեղել մաքուր օդ շնչելու հետ, ինչը նույնպես նպաստում է Ձեզ ավելի լավ զգալուն։
Բայց հիշեք, չպետք է շտապել, ընդամենը հարկավոր է օրն այնպես պլանավորել, որ առավոտյան մի քանի րոպե կարողանաք ինքներդ Ձեր հանգստին տրամադրել։
2. Ավելի քիչ որոշումներ կայացրեք
Աշխատող մարդու համար շատ դժվար է խուսափել սթրեսից, եթե օրվա ընթացքում ստիպված է ընդունել բավականին շատ կարևոր որոշումներ։ Կարելի է խուսափել այնպիսի որոշումներ կայացնելուց, ինչպիսիք են, օրինակ, ինչ հագնել, ինչ ուտել և այլ նման հարցեր, որոնք իրականում որևէ խնդիր չեն լուծում։
Սթիվ Ջոբսն ասել է․ <<Ես ամեն օր կրում եմ նույն հանդերձանքը, որպեսզի շատ էներգիա չծախսեմ որոշելու թե ինչ եմ հագնելու 🙂 >>:
Այսպես, որոշում կայացնելիս նախապես մտածեք, արդյո՞ք այն ունի մեծ ազդեցություն Ձեր աշխատանքի վրա, և արդյո՞ք Դուք ունեք հստակ կարծիք այդ հարցի շուրջ։ Եթե երկու դեպքում էլ պատասխանը բացասական է, ապա ընդհանրապես իմաստ չունի Ձեզ ծանրաբեռնեք նման որոշում կայացնելու համար։
3. Օգնեք Ձեր գործընկերոջը
Այլ մարդկանց օգնելը Ձեզ կդարձնի երջանիկ, իսկ գործընկերներին օգնելը՝ առավել երջանիկ։ Այն աշխատակիցները, ովքեր օգնում են իրենց գործընկերներին, երջանիկ զգալու հետ մեկտեղ 33%-ով ավելի արդյունավետ են աշխատում։
Պարտադիր չէ ինչ-որ հերոսական օգնություն ցուցաբերել։ Կարող եք օրինակ հարցնել, թե ինչով կարող եք օգտակար լինել, կամ օրինակ հանդիպումից հետո ինչ-որ մեկի համար կատարել կարևոր նշումներ։ Ձեր առօրյա սովորույթը դարձնելու համար խորհուրդ ենք տալիս ծանուցում ստեղծել Ձեր օրացույցում շատ հետաքրքիր անվանումով, որը Ձեզ ավելի կմոտիվացնի և ևս մեկ անգամ ժպիտ կհաղորդի, օրինակ՝ <<Այո! Եվս մեկ հանճարեղ քայլ>>։
4. Ընդունեք Ձեր առաջընթացը
Ամենամեծ դրական զգացողությունն աշխատավայրում կարող եք ստանալ այն դեպքում, եթե զգում եք, որ առաջ եք շարժվում և ավարտին եք հասցնում Ձեր առջև դրված պարտականությունները։ Վստահեցնում ենք, որ նույնիսկ ամենավատ օրերին դրանցից մի քանիսը եթե հաջողությամբ իրականացնում եք, Ձեզ մոտ միանգամից լիարժեքության և ուրախության զգացողություն է առաջանում։
Փորձե՛ք և կհամոզվեք։
Առավոտյան գրի առեք մի քանի առաջադրանքներ, որոնք պետք է ողջ օրվա ընթացքում ավարտին հասցնեք։ Գրառումները կատարեք նախքան էլ․ փոստը ստուգելը կամ հեռախոսազանգ կատարելը։ Իսկ օրվա ընթացքում ջնջեք այն պարտականությունները, որոնք հաջողությամբ արդեն ավարտել եք։ Եթե ունեք ծավալուն ծրագիր, որը դժվար թե օրվա ընթացքում ավարտին հասցնեք, ապա կարող եք բաժանել մի քանի մասերի։
Ովքեր նման մեթոդով են շարժվում, վստահ ենք, որ կհաստատեն արդյունավետությունը և կկիսվեն իրենց զգացողություններով։
5. Օրն ավարտեք շնորհակալական նոտայով
Աշխատանքային օրը սկսեցինք դրական նոտայով, սակայն օրվա ընթացքում ամեն ինչ չէ, որ մեր պլանավորածով է առաջ գնում։ Կլինեն թյուրիմացություններ, անիմաստ երևույթներ, որոնք սթրես են առաջացնում։ Դժվար թե չլինի։ Պարզապես, բոլորս էլ առաջին հերթին կենտրոնանում ենք բացասականի վրա, որովհետև փորձում ենք խուսափել վտանգից։ Նորմալ է, իհարկե։ Բայց միթե՞ գոնե մեկ դրական իրավիճակ չկար ողջ օրվա ընթացքում։
Բնականաբար կլինեն։ Ամեն դեպքում հիշեք դրականը և տուն գնալուն պես առաջին հերթին պատմեք դրականի մասին, այլ ոչ թե փոխանցեք աշխատանքային ողջ օրվա սթրեսը ընտանիքի անդամներին։
Արդյունքն ակնհայտ է։ Նախապես պատմելով դրականի մասին` Դուք նույնիսկ կմոռանաք այն ողջ բացասական իրադարձությունները, որոնք Ձեզ հետ պատահել են։
