Ինչպե՞ս Գործատուին ներկայացնել զինվորական ծառայության այդ նվիրյալ երկու տարիները որպես առավելություն

Աչքները սահմանին, ընտանիքի կարոտը սրտում, կորցրած ընկերների՝ մեր հերոսների անունները շուրթերին, կանգնած են տղերքը սահմանին․․իրենց ազգանվեր ծառայությունը մատուցելով հայրենիքին։ Համազգեստը կրելուն պես, զինվորն անցնում է երկամյա աշխատանքի՝ իր վրա վերցնելով հայոց աշխարհի խաղաղության պահապանի տիտղոսը։ Ոչ մի աշխատանք երբեք չի կարող համեմատվել թիկունքում կանգնած մեր տղերքի այդ մեծ աշխատանքի հետ, երբ թշնամու դեմ կռիվ տալով՝ կերտում են հայրենիքի լուսավոր ապագան։

Ցավոք, այսօր շատ ընտանիքներում զավակի քաղցր ձայնը լսելու փոխարեն հնչում են մեդալների և շքանշանների զրնգոցները, բայց միևնույն է, հայ մայրերին կոտրել չի լինի, հայ զինվորին՝ առավել ևս։

Օրերն անցնում են, ծառայությունը նույնպես, և զինվորը կրկին վերադառնում է քաղաքացիական կյանք, որտեղ նրան սպասում են ծնողները, հարազատներն ու կիսատ թողած երազանքները՝ կրթություն, կարիերա, ընտանիք․․․

Իսկ ինչպե՞ս Գործատուին ներկայացնել զինվորական ծառայության այդ նվիրյալ երկու տարիները որպես առավելություն, որը կօգնի զինվորական աշխատանքից անմիջապես անցնել քաղաքացիական աշխատանքի։

1 Հպարտորեն ներկայացրեք Ձեր զինվորական փորձը
Միշտ հիշեք, որ Դուք, կատարելով երկու տարվա զինվորական ծառայություն, յուրահատուկ աշխատակից կարող եք լինել Գործատուի համար։ Բնականաբար, շատ հնարավոր է, որ Գործատուն չպատկերացնի, թե ինչ պարտականություններ եք իրականացրել։ Այդ պատճառով, խորհուրդ ենք տալիս ներկայացնել անհրաժեշտ և աշխատանքի հետ առնչվող պարտականությունները։ Ճիշտ կլինի նաև համեմատել զինվորական ոլորտում զբաղեցրած դիրքը քաղաքացիական համարժեք պաշտոնի հետ։ Օրինակ, դասակի հրամանատարը՝ թիմի առաջնորդի:

2 Առանձնացրեք այն հմտությունները, որոնք կարելի է ներկայացնել Գործատուին
Իհարկե, զինվորական ծառայության ժամանակ ձեռք բերված ոչ բոլոր հմտություններն են, որ անհրաժեշտ կլինեն աշխատանքի ժամանակ։ Այդ պատճառով, կարելի է պարզապես նշել, թե ինչպես այդ հմտություններն օգտագործելով, հաղթահարել եք դժվարությունները, հասել եք առավելագույն արդյունքի, արժանացել եք պարգևատրումների և հատուկ ուշադրության։

3 Ընդգծեք Ձեր անձնական հատկանիշները
Հավատացեք, որ նշելով Ձեր անձնական հատկանիշները՝ ժամանակի կառավարում, կազմակերպչական ունակություններ, թիմի կառավարում, գերհագեցած գրաֆիկով աշխատելու ունակություն, Դուք բավականին կմեծացնեք Գործատուի մոտ աշխատանքի անցնելու հավանականությունը։

4 Թարմացրեք Ձեր գիտելիքները
Ինչպես զորամասում, այնպես էլ զորացրվելուց հետո խորհուրդ ենք տալիս տրամադրել ազատ ժամանակը Ձեր գիտելիքները թարմացնելու և նոր գիտելիքներ ձեռք բերելու համար։ Այսօր արդեն նախատեսվում են ՍՄԱՐԹ կենտրոնների կառուցում զորամասերում, ինչն էլ ավելի լայն հնարավորություններ կընձեռի Ձեր ինքնազարգացման համար։ Այսպես Գործատուին ներկայացնելով  ձեռք բերած գիտելիքները՝ Դուք ցույց կտաք Ձեր նվիրվածությունը և ձգտումը այդ ոլորտում աշխատելու համար։

Հա՛յ զինվորներ, Ձեր ապագա կարիերան Ձեր ձեռքերում է։ Միշտ հիշեք և հավատացեք, որ այդ երկու տարիները եթե դիտեք այլ տեսանկյունից՝ որպես առավելություն, Գործատուին նույնպես կարող եք ներկայացնել այդ տեսանկյունից՝ արդյունքում գտնելով Ձեր իսկ երազած աշխատանքը։ 

Հեղ․՝ Նազելի Բադալյան