Բաժանվելով աշխատանքի, հարաբերությունների ու ընտանեկան պարտականությունների միջև, մենք հաճախ չենք հասցնում մեր սեփական հետաքրքրություններին ու նախասիրություններին ժամանակ տրամադրել։ Դա է պատճառը, որ մարդկանց մեծամասնության կարծիքով աշխատանքի և կենցաղի հավասարակշռությունը պահպանելն անհնարին է։ Ե՛վ տանը, և՛ գրասենյակում ամեն ինչ հասցնելու մոլուցքով հեշտ է չնկատել՝ ինչպես է սթրեսի սանդղակը բարձրանում, իսկ արդյունավետ աշխատելունը, ընդհակառակը, ընկնում։ Սա, իհարկե, անառողջ ու ոչ հավասարակշիռ ցուցանիշ է։ Սթրեսը խոչընդոտում է կոնցետրացվելուն, դարձնում մեզ ցրված՝ ազդելով գործնական ու անձնական հարաբերությունների վրա։
Այսպիսով, StaffBlog-ում, որտեղ մշտապես ներկայացնում ենք թե՛ գործատուների, և թե՛ աշխատանք փնտրողների համար օգտակար նյութեր, այս անգամ կիսվում ենք լավագույն խորհուրդներով՝ աշխատանքն ու առօրյա կյանքը հավասարակշռելու համար։
Կառավարեք աշխատանքը
Հետազոտությունները ցույց են տալիս, որ որքան շատ ենք կարողանում կառավարել աշխատանքը, այնքան երջանիկ ենք զգում մեզ։ Աշխատանքային ճիշտ կազմակերպված առօրյան, անշուշտ, մեծ դեր է խաղում work-life բալանսի պահպանման գործում և լիարժեքության զգացում է տալիս։ Այսպիսով, հարկավոր է ամենօրյա նպատակներ սահմանել՝ փորձելով դրանք ի կատար ածել մինչև աշխատանքային օրվա վերջ։ Նաև պետք է լինել իրատես վերջնաժամկետների հարցում, կազմեք անելիքների ցանկ՝ առաջնահերթ հոգ տանելով կարևոր ու անհրաժեշտ հանձնարարությունների կատարման համար։
Մի մոռացեք ընդմիջել
Աշխատանքի ընթացքում փոքրիկ ընդմիջումները և, ինչու ոչ, կոլեգաների հետ շփումն ու փորձի փոխանակումը կօգնեն Ձեզ հավաքել մտքերն ու հանձնարարությունները, կատարել էլ ավելի թարմ գաղափարներով ու էներգիայով լի։
Լիցքաթափվեք՝ լսելով Ձեր սիրելի երգերը
Նրանք, ովքեր աշխատելիս լսում են իրենց սիրելի երաժշտությունը, ավելի մոտիվացված են, ստեղծարար և ավելի լավ են կատարում իրենց տրված առաջադրանքները։
Հաճախ շփվեք ընտանիքի ու ընկերների հետ
Ընտանիքի ու ընկերների հետ շփումը դրական ազդեցություն է թողնում մեզ վրա։ Հաճախ մենք պարզապես կարիք ենք ունենում հարազատ մարդկանց պատմելու մեր ձեռքբերումների, նպատակների և, առհասարակ, առօրյայի մասին։
Ակտիվ եղեք
Ֆիզիկական ակտիվությունն օգնում է աշխատել ավելի արդյունավետ, իջեցնել սթրեսի սանդղակը և պարզապես առողջ լինել։
