Մարտի 24-ին, staff.am–ը հյուրընկալվեց Գյումրու տեխնոլոգիական կենտրոնում մեր գործընկեր BSC ընկերության QuickStart նախագծի հետ միասին:
Գյումրեցիների հետ հանդիպումն անցավ շատ ջերմ և հաճելի մթնոլորտում: Հանդիպման ընթացքում ներկայացվեցին staff.am հարթակի գործիքները, հնարավորություններն ու ապագա ծրագրերը: Մասնավորապես, ներկայացվեց թե ինչպես գրանցվել staff.am-ում, ինչպես ստեղծել օնլայն ռեյզումե և դիմել աշխատանքի, ինչպես ստեղծել աշխատանքի ծանուցումներ staff.am-ում և հետևել աշխատանքի նոր հայտարարություններին: Մասնակիցները բավականին շատ հարցեր ունեին, որոնց սիրով պատասխանեցինք:
Մասնակիցներին հրաժեշտ տվեցինք խոստումով, որ շատ շուտով ևս մեկ հանդիպում ենք անցկացնելու, որի ժամանակ կխոսենք և կքննարկենք այնպիսի թեմաներ, ինչպիսիք են` խորհուրդներ աշխատանք փնտրողներին, ինչպես կառուցել լավ ռեզյումե, ինչպես լավագույնս ներկայանալ գործատուներին և գտնել աշխատանք: Հանդիպման մանրամասների համար նախօրոք կտեղեկացնենք մեր օգտատերերին։
Երիտասարդների հետ հանդիպումից հետո Գյումրիի տեղեկատվական տեխնոլոգիաների կենտրոնի գործադիր տնօրեն և Գյումրու տեխնոլոգիական կենտրոնի բիզնես մենեջեր Ամալյա Եղոյանը շրջագայություն կազմակերպեց կենտրոնում, որտեղ մենք առիթ ունեցանք հանդիպել Գյումրիում հիմնված ՏՏ ընկերություններից մի քանիսի հետ: Ուրախալի է այն փաստը, որ Երևանում հիմնական գրասենյակներ ունեցող ՏՏ ընկերություններից մի քանիսը գրասենյակներ ունեին նաև Գյումրիում՝ այդպիսով խթանելով քաղաքի ՏՏ ոլորտի զարգացմանը:
Գյումրու տեխնոլոգիական կենտրոնում գտնվող Թումո ստեղծարար տեխնոլոգիաների կենտրոնի ղեկավար Նարե Ավագյանի հետ հանդիպման ժամանակ նշվեց, որ կենտրոն հաճախող երեխաների թիվը մի քանի անգամ մեծ է նախատեսվածից, իսկ հաճախել ցանկացողների թիվը նույնիսկ ավելին է:
Այն աշխատանքը, որը կատարվում է այսօր մեր երեխաների և երիտասարդների հետ Գյումրու տեխնոլոգիական կենտրոնի հարկի տակ, անփոխարինելի է և մի քանի տարի հետո միանշանակ կունենա իր երկարաժամկետ դրական ազդեցությունը Հայաստանը տեխնոլոգիական կենտրոն դարձնելու ռազմավարական ծրագրերի կոնտեքստում:
Գյումրիում անցկացված մի քանի ժամերը շատ ոգեշնչող էին staff.am-ի թիմի համար: Գյումրու երիտասարդների խանդավառությամբ վարակված և էներգիայով լի վերադարձանք Երևան անպայման Գյումրի նորից այցելելու մեծ ցանկությամբ և անհամբերությամբ:
