Ինեկոբանկը քո կողքին | Կրթական ծրագիր ուսանողների համար

Բազմիցս առիթ ենք ունեցել պատմելու Ինեկոբանկի տարբեր ծրագրերի մասին: Անցյալ տարի խոսել էինք «Ինեկո SLASH Երիտասարդ» թեմայից, իսկ վերջերս անդրադարձել էինք InecoPeople նոր բրենդին։
Այս անգամ մեր ուշադրությունը գրավեց արդեն երկրորդ անգամ հայտարարված «Ինեկոբանկը քո կողքին» վարձավճարների փոխհատուցում կամ ֆինանսավորվող պրակտիկա արտերկրում ծրագիրը։ Այն նախատեսված է չորրորդ կուրսի և մագիստրատուրայի ուսանողների համար։ Հոդվածում անդրադարձել ենք ծրագրի մանրամասներին, պատմել ենք՝ ով կարող է միանալ, և ինչ առավելություններ այն կտա մասնակիցներին։ 

«Ինեկոբանկը քո կողքին» ծրագրի մանրամասները

Ինեկոբանկն իր գործունեության ողջ ընթացքում մեծ կարևորության է արժանացրել կորպորատիվ սոցիալական պատասխանատվությունը, և հատկապես՝ կրթությունը։ Բանկն ունի ծրագրեր ինչպես աշխատակիցների, այնպես էլ ուսանողների համար՝ հնարավորություն տալով ստանալ բուհական կրթության վարձավճարի 100% փոխհատուցում կամ մասնակցել արտերկրում ֆինանսավորվող պրակտիկայի։

2023-ին առաջին անգամ իրականացված «Ինեկոբանկը քո կողքին» ծրագիրը մեծ տարածում գտավ ուսանողության շրջանում։ 4 բուհերից 8 ուսանողներ դարձան հաղթող, իսկ այս տարի ֆինանսավորելու են 12 ուսանողների։

«Ինեկոբանկը քո կողքին» ծրագրի կառուցվածքը

Ծրագիրը նախատեսված է չորրորդ կուրսի ուսանողների, ինչպես նաև մագիստրատուրայում սովորողների համար՝ ԵՊՀ, ՀՊՏՊ, ՀՖՀՀ, ՀՌՀ, ՀԱՊՀ համալսարաններից։ Դիմորդ-թեկնածուները երկու շաբաթվա ընթացքում անցնում են մրցութային փուլ՝ թեստավորում և անհատական հարցազրույց։ Ընտրված 30 ուսանողները մենթորների աջակցությամբ երեք շաբաթում իրականացնում են պրոյեկտներ տարբեր ուղղություններով, իսկ ավարտից հետո ներկայացնում են իրենց նախագծերը։ Ողջ ընթացքում ուսանողները մենթորների ուշադրության կենտրոնում են, իսկ վերջիններս էլ հատուկ մշակված համակարգի միջոցով գնահատում են յուրաքանչյուր մասնակցին։

Ուսանողների վերջնական արդյունքները հաշվարկվում են՝ հիմնվելով հետևյալ կետերի վրա.

• Թեստավորման և անհատական հարցազրույցի արդյունք
• ՄՈԳ (միջին որակական գնահատական)
• Մենթորի կողմից ծրագրի իրականացման շրջանակներում գնահատում
• Նախագծերի ներկայացման գնահատում

Իրականացվող քեյսերը տարբեր են և կախված են Բանկի բիզնես նպատակներից։ 2023 թվականին, օրինակ, մասնակից խմբերից մեկն իրականացրել ու ավարտին է հասցրել «High Five» գովազդային արշավը PayLater պրոդուկտի համար։ 

Մենթորներն Ինեկոբանկի տարբեր ստորաբաժանումներից են։ Այս տարի նրանք կլինեն Մանրածախ և Կորպորատիվ բիզնեսի, ՏՏ-ի, ՄՌԿ-ի, Մարքեթինգի, Ռազմավարության և ֆինանսների ուղղություններից։

2023 թվականի արդյունքներով ծրագրի ավարտից հետո 20 մասնակից, այդ թվում նաև հաղթող 8 ուսանող, ցանկություն են հայտնել շարունակել կամ սկսել իրենց կարիերան Ինեկոբանկում։

Դե ինչ, վստահ ենք, որ «Ինեկոբանկը քո կողքին» ծրագիրն իսկապես օգտակար ու կարևոր փորձառություն կլինի մասնակիցների համար։ Հավելենք, որ այս տարվա դիմում-հայտերի փուլն արդեն ավարտված է։ Այնպես որ, հետևեք Ինեկոբանկի էջին staff.am-ում՝ հետագա հնարավորությունները բաց չթողնելու համար։