Աշխատանքային հարցազրույցներին ճիշտ ինքնաներկայանալը կարևոր և ուշադրության արժանի հարց է։ Նախ և առաջ աշխատանքային հարցազրույցի պրոցեսը չի սկսում և ավարտվում բուն հարցազրույցով․ այն կարող ենք բաժանել երեք ենթաբաժնի՝
1/ մինչ հարցազրույցը | pre-interview
2/ բուն հարցազրույց | interview
3/ հարցազրույցից հետո | post-interview
Ներկայացնեմ թեկնածուի կողմից այն քայլերը, որոնց հետևելը կօգնի որոշակիորեն տարբերվել մյուս թեկնածուներից ու բնականաբար ավելի հաջող կազմակերպել աշխատանքի փնտրման պրոցեսը։
Մինչ հարցազրույցը
Ուսումնասիրել Ընկերությունը
Հարցազրույցից առաջ ուսումնասիրել տվյալ Ընկերությունը` ուշադրություն դարձնելով առաքելության, նպատակների և արժեքների վրա: Կարևոր է նաև ուսումնասիրել տվյալ Ընկերության ծառայությունները, ապրանքատեսակները և ունենալ մրցակիցների վերաբերյալ գոնե նախնական տեղեկատվություն:
Գեղեցիկ և կոկիկ տեսք ունենալ
Գեղեցիկ և կոկիկը բնավ փողկապը չէ. Ձեր տեսքը պետք է համահունչ լինի տվյալ Ընկերության ոճին, և ինչն ավելի կարևոր է՝ հարմարավետ Ձեզ համար:
Անցնել ռեզումեի և աշխատանքի հայտարարության վրայով
Աշխատանքի հայտարարությունը կարդալիս հիմնական ուշադրությունն արժի դարձնել ներկայացված պահանջներին և ֆունկցիաներին: Կարդալիս յուրաքանչյուր տողի կողքին + և – դրեք։ Այն ինչը – է, պարտադիր ընդգծեք, որպեսզի մինչ հարցազրույցը կարդաք, ուսումնասիրեք՝ գոնե տեսական մակարդակով տիրապետելու համար: Իսկ Ձեր ռեզումեն ևս մեկ անգամ աչքի անցկացնելը կթարմացնի Ձեր հիշողությունը, կկարողանաք հասկանալ այն հիմնականը, որն արժի ներկայացնել:
Վերցնել նոթատետր, ռեզումեն և երաշխավորագրերը
Ձեր հետ վերցրեք Ձեր ռեզումեի օրինակը, նոթատետր՝ նշումներ անելու համար և երաշխավորագրերը, եթե ունեք: Հարցազրույցի ընթացքում նոթեր անելը կօգնի կարևոր ինֆորմացիան հետագայում չմոռանալ։
Հարցազրույցի ժամանակ
Նշում եմ մի քանի ստանդարտ հարցեր և վերջիններիս գրագետ պատասխանելու սկզբունքը։
«Մի փոքր պատմեք Ձեր մասին»
Պետք չէ սկսել ծննդյան տարեթվից կամ սինխրոն ասել այն ամենն, ինչը գրված է Ձեր ռեզումեում: Ցանկալի է, որ սկսեք Ձեր ուժեղ կողմից՝ այն կարևոր առավելությունից, որը առանձնացնում է Ձեզ տվյալ ոլորտում:
Նմանատիպ պատասխաններն անլուրջ են՝
«Դե Դուք հարցեր տվեք, ես կպատասխանեմ»
«Իսկ ի՞նչ եք ցանկանում, որ պատմեմ»
«Որտեղի՞ց սկսեմ»
«Այնքան շատ ասելու բան կա, Ձեզ ի՞նչն է հետաքրքիր»
«Որտեղի՞ց եք իմացել աշխատանքի մասին»
Իդեալական հարց է՝ ցույց տալու Ձեր մոտիվացիան: Նշեք, թե որտեղից եք իմացել՝ զուգահեռ խոսելով նաև այն մասին, թե ինչն է Ձեզ դրդել դիմել տվյալ աշխատանքին: Օրինակ. «Հայտարարությունը տեսել եմ Facebook սոցցանցում, քանի որ հետևում եմ Ձեր էջին։ Ինձ համար կարևոր և հետաքրքիր էր այն, որ միջազգային շուկայում եք գործում»:
«Ի՞նչ գիտեք մեր Ընկերության մասին»
Ցանկացած թեկնածու կարող է կարդալ Ընկերության «Մեր մասին» բաժինը և պատմել կարդացածը: Լավ կլիներ ոչ միայն ուղղակի պատմեիք, այլ նաև փորձեիք մեկնաբանել և Ձեր վերաբերմունքով կիսվել տվյալ Ընկերության վերաբերյալ:
«Ինչո՞ւ եք ուզում աշխատել մեզ մոտ»
«Դե ես աշխատանք եմ փնտրում» – ՈՉ
«Անկեղծ ասած՝ ինքս էլ չգիտեմ» – ՈՉ
«Դե հայտարարությունը տեսա, դիմեցի» – ՈՉ
Սկզբում ներկայացրեք մի քանի գործոն, որոնք Ձեզ համապատասխան են դարձնում տվյալ պաշտոնին, այնուհետև խոսենք թե ինչու եք ընտրել հենց այդ Ընկերությունը: Օրինակ, «Ինձ դուր է գալիս անընդհատ մարդկային փոխհարաբերությունների կենտրոնում լինել․ ես հաճույքով եմ սպասարկում մարդկանց։ Իսկ քանի որ Ձեր ընկերության սպասարկման ոճին ծանոթ եմ որպես հաճախորդ, վստահ եմ, որ այստեղ կգտնեմ ինձ»:
Ուրեմն՝
- նշել այն հիմնական բաները, որոնք գրավում են ոլորտում
- նշել, թե ինչու հենց այս Ընկերությունը
«Ինչու՞ պետք է Ձեզ ընտրենք» կամ «Որո՞նք են Ձեր առավելությունները»
«Ես չեմ սիրում ինձ գովել, դա Դուք պետք է ասեք» – ՈՉ
«Ես դժվարանում եմ խոսել իմ դրական կողմերի մասին» – ՈՉ
«Որովհետև ես Հայաստանի ամենալավ կադրն եմ» – ՈՉ
«Որովհետև ես մյուսներից առավել եմ իմ փորձի բազմազանությամբ» – ՈՉ
«Որովհետև ես բարի եմ և սիրում եմ աշխարհը» – ՈՉ
Այսինքն պետք է ոչ ավելորդ համեստություն անել, ոչ էլ ավելորդ ինքավստահություն ցուցաբերել: Ինչպես նաև պետք չէ խոսել այն մասին, թե ինչպիսի անձնավորություն եք այն մասով, որը չի վերաբերում աշխատանքին: Նորից և նորից, դիմեք Ընկերության և աշխատանքի բնութագրի օգնությանը: Մասնագիտական որակներից կամ հմտություններից նշեք երկու-երեք պատճառ, ինչը Ձեզ համապասխան է դարձնում տվյալ աշխատանքին:
Հարց աշխատավարձի մասին
Կարիերայի ճանապարհին որևէ պահ կա, երբ հստակ պատկերացնում ես քո ‹‹գինը››: Սա որոշակի մասնագիտական թրծվածության մասին է խոսում։ Մինչ այս հարցին պատասխանելը լավ կլինի Ձեզ համար հնարավորինս հստակ լինի, թե ինչ են Ձեզանից սպասում, ինչ ծավալի աշխատանքի մասին է խոսքը և թե ինչ բենեֆիթային փաթեթ է տրամադրում տվյալ Ընկերությունը: Կարող եք պատասխանել այսպես․ «Հիմնվելով աշխատանքի նկարագրի և իմ փորձի վրա, ես կարծում եմ, որ այսքան գումարն այն մինիմալ շեմն է, որը սպասում եմ տվյալ աշխատանքից։ Սակայն իմ պատասխանը քննարկման ենթակա է»:
Հարցազրույցից հետո
Հետևողական եղեք Ձեր աշխատանքին: Եթե Ձեզ չեն պատասխանել իրենց նշած ժամանակահատվածում, սպասեք ևս երկու օր և նամակ գրեք տվյալ Ընկերության կամ պատասխանատու անձի էլ.փոստին, որ ցանկանում եք տեղեկանալ հարցազրույցի արդյունքի մասին: Սա բնավ ամոթ չէ, ընդհակառակը՝ Դուք ավելի պատասխանատու մարդու տպավորություն կթողեք: Եթե չեն պատասխանում, փորձեք ևս երկու օր հետո զանգահարել: Եթե սա էլ է անպատասխան, ուրեմն իմաստ չունի այլևս որևէ քայլ անել:
Եթե Ձեզ մերժում են, անպայման շնորհակալություն հայտնեք՝ և գրավոր, և բանավոր տարբերակներում, նշելով, որ շնորհակալ եք իրենց ուշադրության համար և ուրախ էիք իրենց ճանաչել: Երբեք մի դրսևորեք բացասական վերաբերմունք այն անձի հանդեպ, ով Ձեզ տեղեկացնում է մերժման մասին:
Փորձեցի հնարավորինս հիմնական բաները ներկայացնել, բայց իհարկե սրանք քարե կանոններ չեն։ Անհատական և իրավիճակային մոտեցումներն այստեղ հատկապես ակտուալ են։
Ու մի բան էլ, առհասարակ հարցազրույցներին մասնակցելը շատ արժեքավոր փորձ է, հնարավորինս մասնակցեք։
Ձեզ հաջողություն եմ մաղթում նոր ձեռքբերումների ճանապարհին ու ցնդած վերելքներ կարիերայում ։)
Հեղինակ ՝ Անի Մարգարյան
Talent specialist (ՄՌԿ մասնագետ) Joomag, Inc.
