Տեխնոլոգիաների զարգացմանը համընթաց Գործատուները ավելի հաճախ են սկսել օգտվել օնլայն հարցազրույցների հնարավորությունից, ինչի շնորհիվ կարողանում են մի քանի անգամ ավելի արագ կազմակերպել նոր աշխատակիցների հավաքագրումը։
Եվ եթե դուք այս պահին աշխատանք եք փնտրում, շատ հավանական է, որ հրավիրվեք օնլայն հարցազրույցի։
«Բայց չէ՞ որ ես ընդհանրապես չեմ մասնակցել օնլայն հարցազրույցի, ինչպե՞ս եմ մասնակցելու, իսկ եթե չկարողանամ ինձ դրսևորել․․․»…
Ա՜խ այս մտքերը, իսկ միգուցե և հաջողվի։ Ամեն ինչ ձեր իսկ ձեռքերում է, հավատացե՛ք։
Պարզապես խորհուրդ ենք տալիս նախապես պատրաստվել՝ հետևելով staff.am-ի կողմից առանձնացված օգտակար խորհուրդներին։
ԽՈՐՀՈՒՐԴՆԵՐ ԹԵԿՆԱԾՈՒՆԵՐԻՆ
Ստուգեք ձեր սարքավորումները
Մինչև հարցազրույցը հավաստիացեք, որ և՛ ձեր ինտերնետ կապը, և՛ տեսազանգի ծրագիրը աշխատում են ըստ պատշաճի առանց ձայնային հաճախականության կորստի։ Չէ՞ որ դուք զրուցելու եք ձեր հնարավոր գործատուի հետ և առաջին տպավորությունը շատ կարևոր է հետագա ընթացքի համար։
Կրեք համապատասխան հագուստ
Հագուստը ոչ պակաս կարևոր է օնլայն հարցազրույցների համար։ Պատկերացրեք, որ դուք գնալու եք հանդիպման գործատուի հետ, ի՞նչ հագուստ կընտրեիք։ Այս հարցին եկեք նայենք մեկ այլ տեսանկյունից ևս, բացի կոկիկ ու հաջողակ տեսք ունենալուց, դուք պետք է ձեր արտաքինով համահունչ լինեք նաև այդ ընկերության գործունեության ոլորտին։
Պատրաստ եղե՛ք հարցազրույցին
Ինչպես ձեր տնային աշխատանքը կկատարեիք, այնպես էլ օնլայն հանդիպումից առաջ պատրաստվեք հարցազրույցի ժամանակ ամենահաճախ տրվող հարցերին։ Գրի առեք պատասխանները, բարձրաձայն պատասխանեք, ձայնագրեք, այնուհետև լսեք ձեզ, միգուցե և որոշ շտկումների կարիք լինի։
Նախապես պատրաստեք նաև Գործատուին ուղղված ձեր հարցերը։
Ապահովե՛ք անձնային հաղորդակցություն
Հարցազրույցի հաջող ելքի ապահովումը ոչ միայն պայմանավորված է նրանով, թե ինչ մասնագիտական հմտությունների եք տիրապետում, այլ նաև թե ինչպիսի անհատականություն եք։
Վիրտուալ հարցազրույցի ժամանակ, իհարկե, սոֆթ հմտությունները դրսևորելը փոքր-ինչ մարտահրավեր է, սակայն վստահ եմ, որ դուք կարող եք․․․
Հաճախ ժպտացեք, ներգրավվեք գործատուի հետ զրույցում, հակիրճ զրույց ունեցեք նաև ստեղծված իրավիճակի մասին, իսկ այս ամենի ընթացքում չմոռանաք ամենակարևորի՝ «աչք աչքի» կոնտակտային շփման մասին։
Հեռացրեք ձեր ուշադրությունը շեղող իրերը
Սմարթֆոն, տարբեր իրեր, ոչ կոկիկ աշխատասեղան, այս ամենը կարող են շեղել ձեր ուշադրությունը և խոչընդոտել հարցազրույցի ընթացքին։ Հավաստիացեք, որ ձեր շուրջը կոկիկ դասավորված է, աղմուկը խլացված է և որևէ խանգարող հանգամանք չկա։
Եղե՛ք հետևողական
Հարցազրույցի ավարտից հետո ժամանակն է շնորհակալություն հայտնելու գործատուին։ Փոքրիկ գրառում կարող եք ուղարկել կամ նամակ՝ կախված գործատուի հետ շփման անմիջականությունից և հարցազրույցի մասնակիցների քանակից։
Ի դեպ, խորհուրդ ենք տալիս օգտվել staff.am ձեր օնլայն CV-ում տեսանյութ տեղադրելու հնարավորությունից։ Ձեր մասին պատմող տեսանյութի պատրաստումը մի կողմից կօգնի ադապտացվել վիրտուալ տիրույթում ինքներդ ձեզ ներկայացնելուն, իսկ մյուս կողմից ձեր CV-ին միանգամից կգրավի գործատուի ուշադրությունը։
