Այսօր ձեզ հետ կիսվելու ենք staff.am գործատուներից JTI Armenia-ի աշխատակիցների բարեկեցությանն ուղղված նոր քաղաքականության մանրամասներով։
Արդեն 8-րդ տարին անընդմեջ JTI Armenia-ն հավաստագրվում է որպես Լավագույն գործատու Հայաստանում, Եվրոպայում և աշխարհում, և այդ ամենն ի շնորհիվ աշխատակիցների բարեկեցությանն ուղղված նորարարական մոտեցումների։
Իսկ որո՞նք են այդ մոտեցումները, ի՞նչ է NWOW-ն`«Նոր աշխատանքային մեթոդներ» (New Ways of Working) քաղաքականությունը, որը ներդրվելով 2021 թվականից, այդքան կարճ ժամանակում դարձել է աշխատակիցների սիրելի քաղաքականությունը: Ի՞նչ հնարավորություններ է այն տրամադրում։
Այս նորարար մոտեցման բոլոր առավելությունները բացահայտելու համար մենք այցելեցինք JTI Armenia-ի գրասենյակ ու հատուկ հարցազրույց ունեցանք JTI Armenia-ի Տնօրեն Վադիմ Րեզնիչենկոյի հետ, ինչպես նաև զրուցեցինք JTI Armenia-ի թիմի ներկայացուցիչների հետ։
JTI ARMENIA-Ի ԹԻՄԸ NWOW-Ի ՄԱՍԻՆ ՏԵՍԱՆՅՈՒԹՈՒՄ
STAFF.AM ՀԱՐՑԱԶՐՈՒՅՑ JTI ARMENIA-Ի ՏՆՕՐԵՆ ՎԱԴԻՄ ՐԵԶՆԻՉԵՆԿՈՅԻ ՀԵՏ
Շնորհակալություն Վադիմ, շատ ուրախ ենք այսօր գտնվել JTI Armenia-ում և խոսել կառավարման մոդելում նման կարևոր ներդրման մասին։ Կպատմե՞ք՝ որտեղից առաջացավ NWOW-ի գաղափարը։
«JTI Armenia-ում աշխատակիցների բարեկեցությունը և կյանք-աշխատանք հավասարակշռության պահպանումը միշտ եղել և մնում են մեր արժեքների հիմնաքարը։ Իսկ NWOW-ն պատասխանն էր փոփոխվող աշխարհին, որի պահանջն ընկերությունում առաջացավ այն ժամանակ, երբ սկսեցինք տանից աշխատել։ Իհարկե, մինչև համավարակը, մենք արդեն իսկ մտածում էինք ավելի ճկուն կառավարման մոդելներ մշակելու և կիրառելու մասին, բայց Covid-ն էլ ավելի նպաստեց այս նոր աշխատանքային մոդելի ներդրմանը՝ խթանելով անձնակազմի ճկունությունն ու կատարողականը։
2021 թվականից սկսեցինք ներդնել NWOW-ն հետևողական և փուլային սկզբունքով՝ ընդգրկելով նաև այն բաժինները, որոնք նույնիսկ անհնար էր պատկերացնել այս նոր՝ հիբրիդային մոդելի շրջանակներում»։
Եթե փորձենք սահմանել, ապա ի՞նչ է NWOW-ն։
«NWOW-ն JTI-ի վճռական որոշումն է հեռանալ ավանդական աշխատանքային առօրյայից դեպի հիբրիդ մոտեցում, որի ժամանակ աշխատանքը դա ակտիվություն է, այլ ոչ՝ վայր կամ ժամանակ»։
Կառավարման մոդելի փոփոխությունը գրեթե միշտ ունենում է արժեքային հիմնավորում։ Որո՞նք են այն հիմնարար սկզբունքները, որոնք ընկած են NWOW-ի հիմքում։
«Ջնջելով շատ ավանդական խոչընդոտներ և ղեկավարման ոճեր ու մոտեցումներ՝ NWOW-ի շնորհիվ մենք ընկերությունում առաջին հերթին ապահովեցինք ճկունություն և հարմարավետություն։ Այս մոդելն ամբողջությամբ հիմնված է չորս սկզբունքների վրա, որոնց բոլորի առանցքում վստահությունն է՝
- Ճկունություն աշխատանքում,
- Պատասխանատու և հետևողական մոտեցում,
- Աշխատանք – կյանք հավասարակշռություն,
- JTI-ի կարևոր մասնիկը լինելու զգացում։
Արդյունքում, NWOW-ն JTI-ի աշխատակիցներին տրամադրեց զգալի առավելություններ, ինչպիսիք են, օրինակ, սթրեսի մակարդակի նվազեցումը, աշխատավայր հասնելու վրա ծախսվող ժամանակի կրճատումը և այլն։ Այլ կերպ ասած, աշխատանքում կարևորվում է արդյունքը ու միմյանց հանդեպ պատասխանատվությունն ու փոխվստահությունը»։
Այսպիսով, NWOW-ի կարևորագույն սկզբունքներից մեկը դա անցումն է աշխատանքային նոր՝ հիբրիդ մոդելի, կմանրամասնե՞ք՝ ինչպես է այդ մոդելը գործում JTI Armenia-ում։
«JTI Armenia-ում հիբրիդ աշխատանքային մոդելը բաժինների մեծամասնությունում հնարավորություն է տալիս աշխատակիցներին աշխատաժամանակի 50%-ն աշխատել հեռավար, 50%-ը՝ գրասենյակից։ Արդյունքում մենք ստեղծում ենք նույնքան արդյունավետ հեռավար աշխատանքային միջավայր, որքան գրասենյակում է։
Իհարկե, բիզնեսի բնականոն գործունեությունն ապահովելու համար NWOW-ն ունի որոշ սահմանափակումներ, հատկապես երբ խոսքը գնում է վաճառքի կամ տեխնիկական աշխատանքներ իրականացնող թիմերում այս քաղաքանության ներդրման մասին։ Եվ հաշվի առնելով այս բաժիններում աշխատանքների առանձնահատկությունը՝ NWOW-ի շրջանակներում մենք հատուկ հիբրիդ մոդելներ մշակեցինք»։
Կառավարել հիբրիդ մոդելը նշանակում է, որ Ձեր ընկերությունը կարող է համակցել հեռավար և գրասենյակային աշխատանքի բոլոր առավելությունները, իսկ աշխատանքի արտադրողականության բարձրացմանն ուղղված ինչ աջակցություն է տրամադրում ընկերությունը։
«Աշխատանքը տանից կատարելիս շատ կարևոր է նաև հարմարավետ միջավայր ունենալը, որի համար շատ հաճախ անհրաժեշտ է լինում ձեռք բերել նոր գույք, համակարգչային և այլ պարագաներ։ Աշխատանքի արտադրողականությունը բարձրացնելու նպատակով JTI Armenia-ն աշխատակիցներին տրամադրում է միանվագ լրավճար տան համար գույք և այլ պարագաներ ձեռք բերելու և տանը հարմարավետ աշխատանքային միջավայր ստեղծելու նպատակով»։
Որո՞նք են NWOW-ի մյուս առավելությունները, որոնք լրացուցիչ ճկունություն են տրամադրում աշխատակիցներին։
«NWOW-ի մեկ այլ կարևոր ուղղությունը հիմնական և ճկուն աշխատանքային ժամերի ապահովումն է։ Աշխատակիցը կարող է սկսել իր աշխատանքային օրը կամ ավարտել այն ոչ թե 9-ից 6-ը գրաֆիկով, այլ, օրինակ 10-ից 7-ը կամ 8-ից 5-ը։ Այս մոդելն օգնում է կազմակերպել առօրյան առավել արդյունավետ, առանց լրացուցիչ սթրեսի, ինչպես նաև ապահովել աշխատանք – կյանք հավասարակշռությունը։
JTI-ը (Japan Tobacco International) Japan Tobacco-ի՝ աշխարհի խոշորագույն ծխախոտային ընկերություններից մեկի միջազգային բաժանմունքն է: Այն գործում է ավելի քան 130 երկրում, ինչի համար շատ կարևոր էր ևս մեկ ուղղություն ներդնել, այն է՝ արտերկրից աշխատելու հնարավորություն տրամադրելը։ NWOW-ի շնորհիվ JTI-ի աշխատակիցները հնարավորություն ունեն տարեկան 10 աշխատանքային օր աշխատել արտերկրից, որը չի դիտարկվում որպես արձակուրդ»։
Նշենք, որ մեր այցի ժամանակ Բրենդ մենեջեր Նարեն, ով այս տարի ստացել էր առաջխաղացում և տեղափոխվել JTI Դանիայի գրասենյակ աշխատելու, գտնվում էր հայաստանյան գրասենյակում՝ համատեղելով իր ամենօրյա աշխատանքը և կարճաժամկետ այցը Հայաստան:
Շնորհակալություն, Վադիմ, հավատացած ենք, որ NWOW-ի քաղաքականությունն առավել կընդլայնվի JTI Armenia-ում ու լավագույն փորձի դրսևորում կլինի հայաստանյան աշխատաշուկայի համար։
Այսպիսով, NWOW-ն դա նոր աշխատանքային մեթոդ է, որը կոտրում է ավանդական կարծրատիպերը ու ներդնում է առավել ճկունություն աշխատանքային պրոցեսում, ապահովում է աշխատանք-կյանք հավասարակշռությունը և միաժամանակ բարձրացնում է միմյանց ու աշխատանքի նկատմամբ պատասխանատվությունը՝ թույլ տալով բոլորին լինել JTI-ի մեծ ընտանիքի կարևոր մասնիկը։
