Բազմամբոխ դահլիճ․․․ Խլացուցիչ ծափողջույններ․․․ Հուզված և առկայծող աչքեր․․․
Բեմում է աշխարհահռչակ դերասան Քևին Սփեյսին։
Երևանի «Ոսկե ծիրան» 21-րդ միջազգային կինոփառատոնի շրջանակներում պատվավոր հյուրի կարգավիճակով Հայաստան էր ժամանել թատրոնի և կինոյի վաստակավոր դերասան, կրկնակի օսկարակիր Քևին Սփեյսին։ Հուլիսի 9-ին Կինոյի տունը իր դռներն էր բացել բոլոր արվեստասերների առջև․ հենց այստեղ էր տեղի ունեցել մեծագույն արտիստի հետ հանդիպումը, որի ականատեսն էինք նաև մենք։ Դե ինչ, անդրադառնանք հանդիպման հիշարժան դրվագներին։ Գնացի՜նք․․․
Դահլիճի լուսավորությունը սկսեց աստիճանաբար խամրել, շշուկները խլացան և մեծ էկրանին հայտնվեցին կադրեր Քևինի տարատեսակ ֆիլմերից։ Փոքրիկ տեսանյութը ջերմ արձագանքի արժանացավ ոչ միայն հանդիսատեսի, այլև Քևինի կողմից։ Դերասանն ինքը նշեց, որ հաճելի է, երբ մարդիկ իրեն հիշում են իր կերտած կերպարների անուններով․ նշանակում է` առաքելությունը կատարված է, դիտողներին թվում է, թե կերպարները իրական մարդիկ են։
Մեծարգո դերասանը խոսեց թատրոնի և կինոյի մասին՝ նշելով, որ դերասանական լավ խաղը միջավայր չի ճանաչում։ Սակայն, իհարկե, կան տեխնիկական հմտություններ, որոնք հատկապես բեմի մարդը պետք է ունենա, օրինակ՝ ձայնը։ Ձայնը այն հզոր գործիքն է, որը ստիպելու է հանդիսատեսին հարցնելու․ «Այդ ո՞վ նոր խոսեց»։ Հետո ավելացնում է, որ թատրոնը կենդանի է, թատրոնում անընդհատ ինքնակատարելագործվելու հնարավորություն ունես, իսկ կինոյում այլ է․ այստեղ մեկ անգամ է «ֆիքսվում» խաղդ, մինչդեռ թատրոնում ամեն անգամ կարող ես է՛լ ավելի բարելավել այն։
Քևինը հայտնի է մարդկանց նմանակելու իր բացառիկ տաղանդով։ Հարցին, թե երբվանից է սկսել իմիտացիաներով զբաղվել, Սփեյսին նշում է՝ դեռ մանուկ հասակից էր գիտակցել, որ ունակ է «լսելու» և լսածը զգալու։ Մայրիկի հետ հաճախ էր գնում ֆիլմեր և ներկայացումներ դիտելու։ Եվ երբ նկատում էր, որ մայրիկը ծիծաղում է, տուն վերադառնալուց հետո Քևինը սկսում էր նմանակել այն դերասանին, ով արժանացել էր մայրիկի ծիծաղին։ Այսինքն՝ մայրիկին ուրախություն պարգևելու ցանկությունն է ընկած այս ամենի ետևում։
Սփեյսին անդրադարձավ նաև դերասանի առաքելությանը։ Դերասանի աշխատանքը գրված սցենարին ծառայելն է․ «Երբ ես կարդում եմ սցենարը առաջին անգամ, ես շոկի եմ ենթարկվում, ինչպիսի՜ գեղեցիկ պատմություն․ հենց այս թարմ զգացողությունն է, որ դերասանը պետք է փոխանցի հանդիսատեսին»։ Քևինը պատկերավոր համեմատություն է անում՝ ասելով, որ դերասանը ներկապնակ է, որի օգնությամբ գունավորվում է ռեժիսորի նկարը։
Քննարկվեց նաև «դերասանական լավ խաղ» ասվածը․ «Ինձ համար դերասանական լավ խաղը այն է, երբ ընդամենը 10 րոպե է, ինչ դիտում եմ ֆիլմը կամ ներկայացումը և արդեն ամբողջությամբ հայտնվում եմ իրենց աշխարհում, հավատում եմ կերպարներին․ ահա դերասանական լավ խաղը»։
Ամփոփելով՝ նշենք, որ հանդիպումը իսկապես ստացված էր։ Քևինը խոսում էր բոլորին հասկանալի լեզվով՝ էմոցիաներով։ Հնչեցին բազում հետաքրքիր մտքեր էկրանից այն կողմ գտնվող աշխարհի, թատրոնի և դերասանական խաղի մասին՝ Քևինի անմիջական հումորների և դերասանական փոքրիկ խաղերի ուղեկցությամբ։ Իսկ մենք հավելենք, որ Քևինի նման մարդիկ գալիս են ապացուցելու, որ հաջողության համար կարևոր է ոչ թե մասնագիտությունը, այլ մասնագիտության համապատասխանությունը։ Ընտրեք ձեզ հոգեհարազատ և սիրելի մասնագիտություն, որ անհամբերությամբ սպասեք ոչ թե հանգստյան, այլ աշխատանքային օրերին։ Վերջում, խորհուրդ ենք տալիս դիտել մեր կողմից պատրաստված «Մասնագիտության ընտրություն և վերապրոֆիլավորում» տեսահոլովակը, որը վստահաբար կօգնի ձեզ մասնագիտության ընտրության հարցում։
