Սեպտեմբերի 19-ին ադրբեջանական զինված ուժերը սանձազերծեցին հերթական ռազմական ագրեսիան Արցախի Հանրապետության դեմ՝ ռմբակոծելով Ստեփանակերտն ու այլ բնակավայրերը։
Տեղահանված մեր հայրենակիցներին երկար ու դժվար ճանապարհ անցնելուց հետո ջերմությամբ ու մեծ հոգատարությամբ Հայաստանում առաջինը դիմավորեցին միջազգային կազմակերպությունների աշխատակիցներ, կամավորներ, ուսանողներ ու աշակերտներ, տարբեր մասնագիտության ու ազգության տեր մարդիկ, ովքեր համախմբվեցին միևնույն գաղափարի շուրջ․ ընդունել մեր հայրենակիցներին՝ փորձելով հոգալ նրանց առաջին անհրաժեշտության կարիքները․ սնունդ, ջուր, հագուստ՝ ստեղծելով այնպիսի միջավայր, որտեղ նրանք կզգան յուրաքանչյուրիս աջակցությունը։
Հնարավոր բոլոր միջոցներով արցախահայերին առաջնային օգնություն ցուցաբերելու համար հայաստանյան Կարմիր Խաչի աշխատակիցներն ու հատուկ պատրաստվածություն անցած տարբեր տարիքային խմբերի կամավորները Գորիսում, Կոռնիձորում, իսկ ավելի ուշ նաև Վայքում սկսեցին լայնածավալ աշխատանքները՝ գրանցելով անհրաժեշտ անձնական տվյալները, տրամադրելով չոր սնունդ, ջուր, հեռախոսի մարտկոցի լիցքավորման սարքեր, ինչես նաև առաջին օգնություն և հոգեբանական աջակցություն։
Սեպտեմբերի 24-ից սկսած կամավորական աշխատանքներում ներգրավվել էին նաև Գորիսի պետական համալսարանի շուրջ 60 ուսանող և տարբեր դպրոցների աշակերտներ։ Նրանց մի մասը զբաղվել է տեղահանված քաղաքացիների հաշվառմամբ, մյուս մասն այդ ընթացքում ջերմորեն և մեծ հոգատարությամբ ընդունել է արցախցի փոքրիկներին, որոշները միացել են Կարմիր խաչի կամավորներին և զբաղվել գիշերակացի, սննդի, հագուստի ու այլ կարևոր հարցերի կազմակերպմամբ:
Չմոռանանք անդրադառնալ նաև այս կարևորագույն աշխատանքներում ներգրավված մեր օտարազգի բարեկամներին՝ Հայաստանում բնակություն հաստատած անհատների, միջազգային կազմակերպությունների աշխատակիցների, ովքեր կամավորական հիմունքներով միացել են Գորիսում և ամբողջ Հայաստանում տարվող լայնածավալ աշխատանքներին, որոնք շարունակվում են մինչ այսօր։
Այս համակարգված աշխատանքները վկայում են այն բանի մասին, որ ցանկացած անելանելի թվացող ժամանակահատվածում մարդկանց աջակցությունն ու անշահախնդիր օգնությունը կարող են հույս արթնացնել ապագայի և կյանքի նկատմամբ, հաղթահարել դժվարություններն ու առաջ նայել։ Անհրաժեշտ է համախմբվել մեկս մյուսի մասին հոգ տանելու, իրար օգնելու և անդադար աշխատելու գաղափարի շուրջ և փոխել պատմության անիվի ընթացքը դեպի նոր հաղթանակներ։
