«Դասավանդի՛ր հանուն Հայաստանի» կրթական հիմնադրամը և «Իզի Փեյ» ընկերությունը ստորագրել են համագործակցության հուշագիր՝ նպատակ ունենալով խթանել կրթական նախաձեռնությունների հասանելիությունը և հանրային ներգրավվածությունը նորագույն տեխնոլոգիական լուծումների միջոցով։
Հուշագիրը ստորագրվել է «Դասավանդի՛ր հանուն Հայաստանի» կրթական հիմնադրամի առաջխաղացման գծով տնօրեն Վարդան Փարթամյանի և «Իզի Փեյ» ՍՊԸ-ի գործադիր տնօրեն Մհեր Գալստյանի կողմից։
Կողմերը կարևորում են կրթական ոլորտի զարգացման գործում հասարակության ակտիվ մասնակցությունը և վստահ են, որ ֆինանսական ու տեխնոլոգիական գործիքների կիրառումը կարող է էական դեր ունենալ կրթական ծրագրերի կայուն զարգացման և ազդեցության ընդլայնման գործում։
Համագործակցության շրջանակում կողմերը միավորում են իրենց ջանքերը՝ ստեղծելու արագ, հարմար և հասանելի թվային հնարավորություններ «Դասավանդի՛ր հանուն Հայաստանի» հիմնադրամի ծրագրերին աջակցել ցանկացողների համար։ Մասնավորապես, հիմնադրամը ներկայացված է «Իզի Փեյ»-ի վճարային տերմինալներում և easywallet հավելվածում, ինչը հնարավորություն է տալիս հանրությանը պարզեցված ընթացակարգով կատարել նվիրատվություններ՝ աջակցելով կրթական առաքելությանը։
Նվիրատվություն կատարել հնարավոր է տերմինալների և հավելվածի «Բարեգործություն» բաժնում, ինչպես նաև easywallet-ի վճարման էջում գտնվող easydonation կոճակի միջոցով։
«Դասավանդի՛ր հանուն Հայաստանի» կրթական հիմնադրամի առաջխաղացման գծով տնօրեն Վարդան Փարթամյանը նշել է․
Մենք վստահ ենք, որ կրթության ոլորտում կայուն փոփոխությունները հնարավոր են միայն տարբեր ոլորտների համագործակցության միջոցով։ «Իզի Փեյ»-ի հետ այս գործընկերությունը հնարավորություն է տալիս մեր կրթական ծրագրերը դարձնել ավելի հասանելի և բաց յուրաքանչյուր քաղաքացու համար, ով ցանկանում է իր ներդրումն ունենալ կրթության զարգացման գործում:
«Իզի Փեյ»-ի գործադիր տնօրեն Մհեր Գալստյանն ընդգծել է․
«Իզի Փեյ»-ում մենք վստահ ենք, որ երկրի կայուն զարգացման հիմքում որակյալ կրթությունն է։ «Դասավանդի՛ր հանուն Հայաստանի»-ի հետ համագործակցությունը մեզ համար արժեքային համընկնում է․ մենք միավորում ենք մեր ջանքերը՝ նպաստելու Հայաստանի համայնքներում կրթական հնարավորությունների ընդլայնմանը և երիտասարդների ներուժի բացահայտմանը։ Այս հուշագիրը կարևոր քայլ է մեր սոցիալական պատասխանատվության ռազմավարության շրջանակում, և մենք ուրախ ենք արդեն 4-րդ տարին շարունակ աջակցել մի նախաձեռնության, որն ուղղված է երկարաժամկետ ու համակարգային փոփոխություններին կրթության ոլորտում:
Հիմնադրամի և «Իզի Փեյ» ընկերության միջև համագործակցությունը սկսվել է դեռևս 2021 թվականից։ Այս տարիների ընթացքում «Իզի Փեյ»-ի աջակցությամբ Ուսուցիչ-առաջնորդները հնարավորություն են ստացել դասավանդել և իրականացնել կրթական ծրագրեր մի շարք համայնքներում՝ նպաստելով տեղական կրթական միջավայրի զարգացմանը։ Համագործակցության շրջանակում Ուսուցիչ-առաջնորդներ են տեղակայվել Կոտայքի մարզի Հատիս համայնքում, Արագածոտնի մարզի Ծաղկահովիտ համայնքում, իսկ ներկայումս ծրագիրը շարունակվում է Կոտայքի մարզի Զառ համայնքում։
