Նոր նախաձեռնություններն առողջություն են ուղեղի համար

Կյանքում նոր նախաձեռնությունները բնական միջոցներ են ուղեղի առողջության համար։ Հրաշալի նյարդաբան Ռիփսիմե Պոդոսյանի աջակցությամբ այս հոդվածում ներկայացնում եմ, թե կոնկրետ ինչ ազդեցություններ ունեն նոր նախաձեռնությունները մեր ուղեղի առողջության վրա, իսկ վերջում ներկայացնում եմ նպատակներ սահմանելու քոուչինգային իմ ամենասիրելի գործիքներից, որոնք կօգնեն վիզուալացնել նոր նախաձեռնությունների նպատակները՝ դրանց ավելի արագ և արդյունավետ հասնելու համար։

Առողջ ուղեղ առանց դեղամիջոցի

Դոֆամինը մեր ուղեղի կարևոր, լավ զգացողություններ պարգևող նյարդահորմոններից մեկն է։ Այն նպաստում է կենտրոնացմանը, հիշողության լավացմանը, ինչպես նաև օգնում է ունենալ լավ տրամադրություն, քուն, բարձր մոտիվացիա և արդյունավետություն, ազդում է մեր ինքնազգացողության վրա։ Եվ հակառակը՝ դոֆամինի բավարար չափաբաժնի բացակայությունն առաջացնում է սթրես, հոգնածություն, անքնություն, շատակերություն, հատկապես շաքար։

Երբ մենք նոր բան ենք նախաձեռնում և արդյունքում ունենում նոր դրական փորձառություն, մեր ուղեղը խթանում է դոֆամինի արտադրումը և առաջացնում մոտիվացիա, տեղի է ունենում նաև ադրենալինի և էնդորֆինների հոսք, որի արդյունքում ապրում ենք հպարտության զգացում։ Այդ բոլորը պահվում են մեր ուղեղի պահեստում՝ դարձնելով այն ավելի լավը։ Յուրաքանչյուր նոր հմտություն կամ փորձառություն փոխում է ուղեղը։

Որքան դժվար հասանելի և իրագործելի են մեր նախաձեռնություններն, այնքան ավելի լավ ուղեղի համար, այնքան ավելի մեծ կառուցվածքային փոփոխություններ են տեղի ունենում այնտեղ։

Նոր նախաձեռնություններն ակտիվացնում ու ստեղծում են նոր, նեյրոնալ / սինապտիկ կապեր, օգնում, որ էլեկտրական իմպուլսները մի նեյրոնից մուսն ավելի արագ փոխանցվեն, դարձնում մեր ուղեղն ավելի պլաստիկ, ճկուն և պրոդուկտիվ: Բացի այդ, նոր նախաձեռնությունները հաստացնում են միելինային շերտը կամ սպիտակ նյութը, ինչն ապահովում է առավել բարձր մտավոր ունակություններ, — պատմում է «Վարդանանց» նորարարական բժշկության կենտրոնի նյարդաբան Ռիփսիմե Պոդոսյանը,- այս երկուսի համակցումն օգնում է ավելի արագ և լավ սովորել, իրագործել հաջորդ նոր նախաձեռնությունն ու հաջողության հասնել, ինչպես նաև կանխել կամ գոնե հետաձգել տարբեր նեյրոդեգեներատիվ հիվանդություններ, ինչպես օրինակ դեմենցիայի զարգացումը։

Խոսքը միայն նոր բիզնես սկսելու կամ գործը փոխելու մասին չէ։ Նախաձեռնությունները կարող են լինել ամենատարբեր բնույթի և ոլորտի՝ նոր գիտելիք և հմտություն, նոր սպորտ, տարբերվող նախագծեր, կամավորական նախաձեռնություն, դասավանդում, ստեղծագործ աշխատանք, բարելավում մեր աշխատանքի մեջ, բարեփոխումներ կազմակերպությունում, ընտանեկան նոր սովորություններ և այլն։

Շատ հեշտ է, երբ ինչ-որ մեկն ինչ-որ բան է նախաձեռնում, և մենք ավտոմատ ընդգրկվում ենք դրա մեջ, հետաքրքիր մարտահրավերներ ենք հաղթահարում, տարվում ենք այդ գործով, մոտիվացվում ենք։ Իսկ եթե մենք հանդես գանք նոր նախաձեռնությամբ և իրականացմամբ՞․․․։

Սկսվում է․․․

դադարից՝ կենցաղի, առօրյա գործերի ու զվաղվածության, մեկուսացումից, կենտրոնացումից, վիզուալացումից, խորանալուց։

Նպատակներ

Ահա արդյունավետ վարժությունների շարք, որոնք խորհուրդ եմ տալիս պարտադիր կատարել թուղթ ու գրիչով։ Ձեռքով գրելն ակտիվացնում է մեր ուղեղը և բարձրացնում վերջինիս արդյունավետությունը։ Այստեղ հետաքրքիր մի գիտական փորձի մասին հոդված եմ տեղադրում այս մասին։

1. Մտավոր քարտեզի օգնությամբ գրեք 20 նպատակ, որոնց ցանկանում եք իրականացնել հաջորդ տարի։ 20-ը մեծ թիվ չէ։ Քանակի մեջ է ծնվում որակը։ Նպատակները ցանկալի է լինեն տարբեր ոլորտներից, որպեսզի բալանսը պահպանենք։

2. Հիմա պետք է որոշենք և առաջնահերթություններ տանք այդ նպատակներին, որպեսզի մեր կենտրոնացումն ու էներգիան ուղղենք դրանց իրականացման վրա։ 20-ից ընտրեք ամենակարևոր 15-ը, հետո դրանցից ընտրեք ամենակարևոր 10 նպատակը, իսկ վերջում ամենակարևոր 3-ը։

3. Հիմա աշխատենք ամեն նպատակի վրա անհատական։ Վերաձևակերպենք ձեր ընտրած յուրաքանչյուր նպատակ HARD նպատակների գործիքի օգնությամբ։

Heartfelt — գրեք ձեր մոտիվացիան այդ նպատակին հասնելու համար, ո՞րն է ամենակարևոր մոտիվացիան, ինչ՞ կտա ձեզ դրա իրականացումը։

Animated — հիմա փորձեք նկարագրել վերջնական արդյունքը, ի՞նչ պատկեր եք տեսնում և զգում։

Required — հիմա կապը ստեղծեք ձեր կազմակերպության նպատակների կամ ձեր կարևոր ամբիցիաների հետ։

Difficult — հիմա նկարագրեք, թե ինչ նոր գիտելիքներ եք սովորելու, հմտություններ ձեռք բերելու, ինչ մարտահրավերներ եք հաղթահարելու այս նպատակին հասնելուց հետո։ Նոր բան սովորելը ևս գայթակղիչ է և մղիչ ուժ։

4. Այժմ յուրաքանչյուր HARD նպատակի համար կրկին մտավոր քարտեզի օգնությամբ գրեք այն գործողությունները, որոնց շնորհիվ կհասնեք դրանց։

Այս վարժությունն օգտակար է հատկապես հիմա՝ տարեմուտին, սակայն հետևողական լինելը ողջ տարվա ընթացքում ավելի կարևոր է։