Օրեցօր աճող և դինամիկ փոփոխվող աշխատաշուկայում բրենդի ստեղծումը շատ կարևոր է։ Եվ եթե բոլորը վաղուց արդեն սովոր են, որ բրենդինգն ընկերությունների ու պրոդուկտների առաջխաղացման անբաժան մասն է, ապա այժմ բրենդինգը մուտք է գործել նաև անհատների դաշտ և գրավել իր ուրույն տեղը։
Անձի բրենդավորումը հնարավորություն է ստեղծում ակտիվ աշխատաշուկայում առանձնանալ այլ մասնագետներից և, ավելի ճանաչելի դառնալով, մեծացնել ձեր՝ լավ աշխատանք գտնելու ու միշտ պահանջված մասնագետ լինելու շանսերը։ Խոսքն ամենևին ձեզ հանրային դեմք ու սելեբրիթի դարձնելու մասին չէ, այլ՝ ձեր կարևոր մասնագիտական ու մարդկային հատկանիշները ճիշտ ընգծելու, զարգացնելու և պոտենցիալ գործատուների համար տեսանելի դարձնելու մասին։
Անձի բրենդավորման հիմքում ընկած է ճիշտ տպավորություն գործելու արվեստը, բայց չմտածե՛ք, որ դրա համար կարելի է պարզապես ունենալ գեղեցիկ կոստյումով ու համակարգչի առջև արված պրոֆեսիոնալ լուսանկարներ, թեև երբեմն դա էլ կարող է պետք գալ։ Ճիշտ տպավորությունը պետք է լինի հիմնավորված և արտացոլի իրականությունը, որովեհտև լավ մասնագետի կերպարանքի տակ թաքնված վատ մասնագետին կարելի է բացահայտել անգամ հարցազրույցի փուլում։ Ուստի անձի բրոնդավորման համար կարևոր է նաև անձի մշտական զարգացումն ու աճը։
staff.am-ը հավաքել է մի քանի հայտնի (և ոչ այնքան), օգտակար ու հարմար հարթակ ձեր մասնագիտական զարգացման, անձի բրենդավորման և աշխատաշուկայում լավագույնս ներկայանալու համար։
LinkedIn-ը նոր գործնական կապեր ստեղծելու և հներն ամրապնդելու համար լավագույն և ամենահայտնի սոցիալական ցանցն է։ Վերջին տարիներին ցանցը Հայաստանում ևս շատ պոպուլյար է դարձել՝ հեշտացնելով HR մասնագետների աշխատանքը, չէ՞ որ այստեղ կարելի է գտնել գրեթե բոլոր ոլորտների մասնագետներին ու տեղում ստանալ նրանց մասին ամենակարևոր տեղեկատվությունը, ինչպես նաև աշխատանքի հրավեր անել։ Մեր ժամանակներում լավ մասնագետը պարզապես իրավունք չունի անտեսելու այս հարթակը։ Ձեր՝ LinkedIn-ում լինելով կամ չլինելով՝ պոտենցիալ գործատուն կարող է ձեր մասին կարծիք կազմել
Facebook-ը Հայաստանում ամենահայտնի ու մարդաշատ սոց․ցանցն է։ Երբեմն տպավորություն է ստեղծվում, որ այստեղ կան բոլորը։ Սակայն միևնույն ժամանակ այն հաճախ ընկալվում է որպես բացառապես ժամանացային հարթակ։ Լավ մասնագետը կարող է հեշտությամբ օգտագործել Facebook-ն իր գործունեության վրա ուշադրություն գրավելու, ինչպես նաև մասնագիտական համայնք ձևավորելու կամ արդեն իսկ ձևավորվածի անդամակցելու և գործնական կապեր ստեղծելու համար։ Բացի այդ, որոշ դեպքերում գործատուներն ակնկալում են ձեր CV-ում տեսնել նաև սոց․ցանցում ձեր էջի հղումը, որպեսզի նախապես ավելի լավ կարողանան տպավորություն կազմել ձեր անձի վերաբերյալ։
Instagram-ը շատ վաղուց ուղղակի գեղեցիկ լուսանկարներով կիսվելու հարթակ չէ։ Instagram-ի օգտատերերը ոչ միայն պատրաստ են հետևելու ակնահաճո կոնտենտ մատուցող էջերի, այլև ուզում են կարդալ հետաքրքիր մտքեր, տեսնել այլոց փորձը և կիսվել սեփականով։ Իսկ եթե դուք վիզուալ պրոդուկտների հետ կապ ունեցող ոլորտի մասնագետ եք (լուսանկարիչ, դիզայներ, վիդեոգրաֆ), այս հարթակը ձեզ համար #musthave է։ Instagram-ն անփոխարինելի է նաև մարքեթինգի, վաճառքի և հարակից ոլորտների մասնագետների համար։
Twitter-ն անձի բրենդավորման տեսանկյունից ևս կարևոր հարթակ է։ Թեև Հայաստանում այն համեմատաբար վերջերս է ակտիվացել, արդեն հասցրել է դառնալ պոպուլյար ու առանձնանալ իր ուրույն ձևավորված համայնքներով, որոնք թե՛ մտքերի արտահայտման ոճով, թե՛ դրանց բովանդակությամբ տարբերվում են այլ սոց․ցանցերի օգտատերերից։ Հարթակը հնարավորություն է տալիս ձեզ համար կարևոր ու հետաքրքիր թեմաների վրա հրավիրել այլ օգտատերերի ուշադրությունը՝ հատկապես ակտիվ գործածելով հաշթեգերը։
Medium-ը բլոգային հարթակ է հանրային լրագրության համար։ Այն ստեղծվել է Twitter-ի համահիմնադիրների կողմից և շարունակում է այդ հարթակի տրամաբանությունը՝ միևնույն ժամանակ չսահմանափակելով ձեզ նիշերի քանակով։ Այսինքն՝ այստեղ դուք կարող եք ձեր մտքերն արտահայտել ավելի ծավալուն հրապարակումների տեսքով՝ ձեր մեսիջը տեղ հասցնելով բազմաթիվ բլոգերների, լրագրողների և հետաքրքրված ընթերցողների։ Սա հնարավորություն է նաև կարդալու այլոց հետաքրքիր մտքերը և քննարկելու դրանք։
YouTube-ը ոչ միայն երգեր լսելու ու տեսահոլովակներ դիտելու հարթակ է։ Այն նաև լավ հնարավորություն է գրեթե ցանկացած մասնագիտական տեղեկատվություն ստանալու և փոխանցելու համար։ Այստեղ դուք կգտնեք միլիոնավոր դասընթացներ թե՛ անգլերենով, թե՛ ռուսերենով ցանկացած ոլորտում և կարող եք ինչպես զրոյից ձեռք բերել որոշ գիտելիքներ, այնպես էլ խորացնել ունեցածները։ Իսկ լրագրողների, բլոգերների ու կոնտենտ ստեղծողների համար հարթակը նաև բազում հնարավորություններ է ստեղծում մեծ լսարան ձեռք բերելու համար։
Quora-ի մասին Հայաստանում գուցե քչերն են լսել, սակայն հարթակը լայն հնարավորություններ է ընձեռում «հարց-պատասխան» ձևաչափով ցանկացած տեղեկատվություն ստանալու և կիսվելու համար։ Եվ այստեղ շատ կարևոր է նաև պատասխանների որակը, քանի օր այլ օգտատերեր կարող են գնահատել ձեր պատասխանը, և բարձր գնահատականների դեպքում դուք կստանաք փորձագետի համաբավ, որն արժեքավոր տեղեկատվություն է հաղորդում։
Pinterest-ը շատ ունիվերսալ հարթակ է, որը հնարավորություն է ընձեռում ոչ միայն կիսվել գեղեցիկ պատկերներով և ստեղծել թեմատիկ հավաքածուներ, այլև գտնել գրեթե ցանկացած թեմայով լուսանկարների և պատկերների մեծ ընտրանի՝ ստանալով անհրաժեշտ վիզուալ տեղեկատվությունը ու զարգացնելով ճաշակը։ Այս հարթակը հատկապես կգնահատեն մարքեթինգի մասնագետները, դիզայներները, լուսանկարիչները, իլյուստրատորները և վիզուալ կոնտենտի հետ կապ ունեցող այլ ոլորտների մասնագետներ։
Tiktok-ի մասին կարծիքները հակասական են՝ հիացմունքից մինչև ատելություն։ Այնուամենայնիվ, հարթակն ունի իր առավելությունները․ դուք կարող եք շատ արագ ձեռք բերել մեծ լսարան ու տեղ հասցնել վիդեոյի տեսքով ձեր ուղերձը՝ լինի դա ժամանցային որևէ տեսանյութ, թե, օրինակ, մասնագիտական խորհուրդ։ Առավելություններից մյուսն էլ այն է, որ ձեզ հասանելի է աշխարհի բոլոր երկրներից միլիոնավոր մարդկանց կոնտենտ, ինչը կարող է ոգեշնչման անսպառ աղբյուր հանդիսանալ։
Սեփական կայք այս դարում ունենալն այդքան էլ մեծ ճոխություն չէ։ Համացանցում կարելի է բազում մատչելի տարբերակներ գտնել սեփական փոքրիկ կամ նույնիսկ լիարժեք կայք ունենալու համար։ Դա կարող է լինել այցեքարտ կայք, որը բաղկացած կլինի ընդամենը մեկ էջից և կպարունակի պարզապես ձեր կոնտակտային տվյալները, կամ մի քանի բաժնից կազմված բլոգ, որտեղ դուք կհավաքեք ձեր կատարած աշխատանքները։ Կայքը հարմար է ամեն ինչ մեկ տեղում ունենալու և CV-ի մեջ մեկ հղմամբ ամենը զետեղելու համար, ինչպես նաև կարելի է ասել, որ կայք ունենալու փաստը որոշ կշիռ է ավելացնում մասնագետին։
Վերը նշված հարթակներից բացի, անձի բրենդավորման շրջանակում գործատուների կողմից նկատվելու համար կարող եք գրանցվել staff.am հարթակում, ստեղծել ձեր CV-ն մեզ մոտ և ստանալ աշխատանքի առաջարկներ անմիջապես գործատուներից։ Ի դեպ, գրանցվել և CV կազմել կարելի է ոչ միայն կայքում, այլև staff.am հավելվածում։ Դա նաև լավ հնարավորություն է ձեռքի տակ միշտ ունենալու գրագետ կազմված CV, որը պարբերաբար թարմացնելու դեպքում դուք կշարունակեք մրցակցային դիրք զբաղեցնել աշխատաշուկայում։
