ԱՆՀԱՏԱԿԱՆ ԲՐԵՆԴԱՎՈՐՈՒՄ․ Ինչ է անհատական բրենդը և ինչպես այն կառուցել

Անհատական բրենդ հասկացությունն այսօր ավելի հաճախ են օգտագործում, և հավատացած եմ, որ լսել կամ կարդացել եք դրա մասին օրինակ վերջին 6 ամիսների ընթացքում, եթե ակտիվորեն հետևում եք աշխարհում տեղի ունեցող փոփոխություններին կարիերային և բիզնեսի կոնտեքստում:
Իհարկե այդ թեման ավելի շատ արևմտյան աղբյուրներում է արծարծվում, սակայն հավատացեք, որ անկախ բնակության վայրից, երկի առանձնահատկություններից և զբաղեցրած պաշտոնից, անհատական բրենդի ստեղծման և զարգացման անհրաժեշտությունն այդքան էլ հեռու չէ, ինչքան առաջին հայացքից կթվա։

Իսկ ինչ է իրականում իրենից ներկայացնում personal brand-ը, ում համար է այն ավելի ակտուլ, ինչպես է պետք վերաբերվել սեփական բրենդի կառուցմանը, ինչպիսի գործնական քայլեր է պետք ձեռնարկել, եթե արդեն որոշել եք դրանով զբաղվել, այս և այլ հարցերի շուրջ խոսել եմ StaffBlog-ի մեր այսօրվա անդրադարձում։

Ձեր անհատական բրենդը հիմնված է նրա վրա, թե ինչպես է Ձեր շրջապատը Ձեզ ընկալում, օրինակ ինչպես նրանք կնկարագրեին Ձեզ: Այսինքն անհատական բրենդը արժեքների և բնորոշ գծերի համախումբ է, որը նկարագրում է Ձեր անձը, Ձեր մասնագիտական և այլ հմտությունները, կատարած ընտրություններն ինչպես աշխատանքում, այնպես էլ կյանքում:

Հավատացնում ենք Ձեզ, որ այս հետաքրքիր նյութը կարդալուց հետո, Դուք այլ կարծիք կունենաք անհատական բրենդի կարևորության մասին:

Հուլիս ամսին, Workfront Armenia ընկերության կողմից հետաքրքիր առաջարկ ստացա ներկայացնելու Personal Branding-ի առանձնահատկությունները ընկերության հայաստանյան գրասենյակի ինչպես նաև ռեգիոնալ գրասենյակների աշխատակիցներին: Առաջին հարցը, որը հավատացած եմ առաջացավ հիմա նաև Ձեզ մոտ, ինչու է ըկերությունն առհասարակ մտահոգվում իր աշխատակիցների անհատական բրենդի կառուցման հարցով: Հետաքրքիր բացահայտումների շարք էր ինձ սպասվում, սկսած այս թեման առավել մանրամասն ուսումնասիրելուց մինչև talk-ից հետո աշխատակիցների հարցերին պատասխանելը: Employer Branding-ի և Employee Personal Branding-ի մասին առավել մանրամասն խոստանում եմ անդրադառնալ StaffBlog-ի հաջորդ թողարկումներում, իսկ հիմա մեծ ուրախությամբ կիսվում եմ Ձեզ անհատական բրենդի կառուցման իմ գիտելիքներով և փորձով, և հուսով եմ իսկապես կօգնեմ մեր ընթերցողին, անհատական բրեդինգին այլ տեսանկյունից նայելու:

Ո՞ւմ համար է անհատական բրենդը

Երբևիցե մտածե՞լ եք, որ անհատական բրենդը անհրաժեշտ է բոլորիս։ Ամենևին պարտադիր չէ լինել քաղաքական գործիչ, կամ ձեռնարկատեր և ունենալ սեփական բիզնես, որպեսզի կարևորենք անհատական բրենդի կառուցումը։ Ավելին, ի շնորհիվ վերջին տարիներին սոց. մեդիայի անզուսպ զարգացմանը, մենք անկախ մեզանից ունենք մեր անհատական բրենդը, այսինքն մեր շրջապատի մոտ արդեն ստեղծվել է կարծիք և գնահատական մեր մասին: Իսկ, այ թե ինչքանով ենք մենք կառավարում մեր բրենդը, ինչքանով է այն իսկապես համապատասխանում այն տպավորությանը, որը օրինակ մենք կցանկանայինք թողնել մեր պոտենցիալ գործատուի, բիզնես գործընկերոջ կամ առհասարակ մեզանով հետաքրքված մարդկանց վրա, իսկապես մտածելու տեղ է տալիս:

Տեսականից գործնական

Ստորև ներկայացրեք եմ գործնական քայլերի հաջորդականություն, որը կօգնի Ձեզ Personal Branding-ի կառուցման և զարգացման գործում: Հաշվի առնելով staff.am-ի ուղղվածությունը, ես այս ամենը դիտարկել եմ կարիերայի և բիզնեսի զարգացման տեսանկյունից:

1 Նախ և առաջ աուդիտ անցկացրեք. Ստուգեք, թե օնլայն հարթակներում ինչպիսին է Ձեր ներկայացվածությունը
Եթե ունեք էջեր սոց. ցանցերում, ապա անպայման ունեք նաև որոշակի բրենդ: Հավաստիացեք, որ այն լիարժեք ներկայացնում է Ձեզ այնիպիսին, ինչպիսին Դուք կցանկանայիք, որպեսզի Ձեզ տեսնեին: Գուգլեք Ձեզ անունը հասկանալու համար, թե որոնման ինչպիսի արդյունքներում եք հայտնվում: Եթե հաճախ հանդիպող անուն ազգանուն ունեք, ապա օգտագործեք Ձեր հայրանունը տարբերվելու համար:

2 Սկսեք մտածել Ձեր մասին որպես բրենդ
Օրինակ, ինչի՞ հետ կցանկանայիք ասոցացվեր Ձեր անունը։ Արդյո՞ք գոյություն ունի ինչ-որ որակական հատկանիշ, որ կցանկանայիք միավորել Ձեր բրենդի հետ։ Այս հարցերի պատասխանները ստանալուն պես անմիջապես կարելի է անցնել բրենդի կառուցման ռազմավարական մյուս քայլերին։

3 Երբեք մի մոռացեք, որ կարևորը բովանդակությունն է

Սոց․ կայքերում հաճախ կհանդիպեք մարդկանց, ովքեր տարբերվում են իրենց հետաքրքրաշարժ հրապարակումներով, և բնականաբար Ձեզ զարմացնում է, թե ինչն է նրանց ստիպում այդպես վարվել։ Օրինակ, ամենայն հավանականությամբ կունենաք Ձեր network-ում մարդկանց, ովքեր առաջինն են արձագանքում քաղաքական հարցերին, կամ օրինակ տեխնոլոգիական նորություններին: Հիմա պատկերացրեք, երկու դեպք, առաջինի դեպքում ուղղակի  share արված նորություններ և հոդվածներ, առանց որոշակի կապի միմյանց հետև առանց մեկնաբանությունների, և դեպք, երբ հրապարակումները կրում են անալիտիկ բնույթ, տրվում է կարծիք՝ հրավիրելով քննարկումների:
Հիշե՛ք, որ 21-րդ դարում, տեղեկատվական անկառավարելի հոսքի արդյունքում, շատ  մեծ տեղ է տրվում այն դեպքերին, երբ հեղինակն իսկապես կարևորում է, ոչ թե քանակը այլ բովանդակությունն ու որակը։ Այդ պատճառով պետք է շատ մեծ ուշադրություն դարձնեք, թե հատկապես ինչ հրապարակումներով եք կիսվում Ձեր լսարանի հետ, արդյո՞ք այն անմիջապես ասոցացվում է Ձեր անհատական բրենդի հետ և ինչ-որ արժեք է իրենից ներկայացնում է թե ոչ։

4 Կատարեք նպատակային գրառումներ

Բրենդի կառուցումը ամենօրյա գործընթաց է, որը երբեք չի դադարում: Յուրաքանչյուր թվիթ, հրապարակում Linkedin-ում, մասնակցություն միջոցառմանը, գրառում Facebook-ում, նկար Instagram-ում, որ կիսում եք Ձեր լսարանի հետ, աշխատում է Ձեր բրենդի կառուցման համար:  Ինչքան շուտ և հստակ պատկերացնեք, թե ինչպիսին եք ցանկանում տեսնել Ձեզ հանրության աչքերով, այնքան ավելի արագ և թիրախավորված կլինի Ձեր ջանքերը Ձեզ պատշաճ բրենդով ներկայանալու համար:

5 Ասոցացրեք Ձեր անհատական բրենդը ճանաչված այլ անունների հետ

Ձեր բրենդը հզոր կամ թույլ կարող է լինել՝ կախված նրանից թե ինչի հետ է ասոցացվում։ Գտեք և օգտագործեք այնպիսի բրենդներ, որոնք էլ ավելի կհզորացնեն այն։ Փոքր ինչ տարօինա՞կ է թվում: Չենք կարող չհամաձայնել: Իսկ ինչի՞ց սկսել: Պատասխանեք այս հարցեին:

• Որտե՞ղ եք սովորել։
• Որտե՞ղ եք աշխատում:
• Ինչպիսի մասնագիտական ասոցիացիաների եք անդամակցում:
• Արդյոք զբաղվում եք հասարակական գործունեությամբ, եթե այո ինչպիսի կազմակերպությունների եք անդամակցում կամ ինչպիսի հասարակական նախագծերի եք աջակցում:

Նման հարցերի միջոցով կհասկանաք ինչպիսի կայացած կառույցների հետ կարող եք ասոցացնել Ձեր բրենդը, և օգտագործել նման անդամակցությունները լավագույնս ներկայացնելու այն թեմաները որոնցով իսկապես հետաքրքրված եք:

Հնարավորության դեպքում, կատարեք գրառումներ այլ ընկերությունների հայտնի բլոգերում, կիսվեք նման հարթակների նորություններով, և ցույց տվեք Ձեր ներգրավածությունը, երբեք չմոռանալով բովանդակության մասին։

6 Տեղեկացված եղեք Ձեր ոլորտի մասին

Եթե օրինակ, ցանկանում եք, որպեսզի Ձեր շրջապատը ընկալի Ձեզ որպես Մարքեթինգային վերլուծությունների գիտակ, կամ Artificial Intelligence տեխնոլոգիաների ճատագով, ապա Դուք միշտ պետք է այսպես ասված <<լինեք թեմայի մեջ>>:
Միշտ հետևեք վերջին նորություններին, միտումներին և զարգացումներին։ Հավատացեք, որ այս կերպ, Դուք  կդիրքավորեք Ձեր անձը, որպես ոլորտի գիտակ, կարծիքի առաջնորդ՝ այսպիսով էլ ավելի բարձրացնելով Ձեր բրենդի ճանաչելիությունը։ Ընդ որում անպայման չէ աշխատանք փնտրելու միտում ունենալ, Դուք ուղղակի կարող եք անել դա Ձեր ընկերության շրջանակներում, այդպիսով տեղեկացնելով Ձեր շրջապատինՁեր մասնագիտական առավելույունների մասին:

7 Դարձեք նորությունների և տեղեկատվության վստահելի աղբյուր

Սոց․ մեդիայում Ձեր լսարանի հետ կիսվեք օգտակար հավաստի նորություններով՝ այսպիսով նվաճելով մարդկանց վստահությունը Ձեր նկատմամբ։ Երբեք մի կիսվեք հոդվածով կամ նորությամբ, որն ինքներդ չեք կարդացել, կամ չունեք խորը հետաքրքրվածություն: Միշտ հիշեք, որ Ձեր լսարանաը Ձեզանից բացի ունի հազարավոր այլ մարդկանց, ում կարելի է հետևել կամ առհասարակ ընդգրկել  network-ում:

Ամփոփենք.

Աշխատանք ե՞ք փնտրում, առաջին քայլե՞րն եք կատարում աշխատաշուկայում, ունեք Ձեր սեփական բիզնեսը, թե կարիերայում մեծ փոփոխություն եք ցանկանում կատարել, ուրեմն լրջորեն մտածեք Ձեր սեփական բրենդի կառուցման մասին: Այն կարող է իսկապես օգտակար լինել նոր աշխատանք գտնելու գործում, քանի որ գաղտնիք չէ, որ այսօր գործատուներն այցելում են թեկնածուի սոց. կայքերը:
Իսկ, եթե նույնիսկ համաձայն չեք personal brand-ի կարևորության հետ, ապա գոնե հավաստիացեք, որ Ձեր մասին առկա ինֆորմացիան իսկապես Ձեզ նկարագրում է լավագույնս:

Անհատական բրենդի ճիշտ օգտագործումը միանշանակ կօգնի Ձեզ զարգացնել Ձեր կարիերան կամ Ձեր բիզնեսը, կընդգծի Ձեր ինքնատիպությունը և կապահովի Ձեր կողմից առաջ քաշված գաղափարների առաջխաղացմանը։

Հուսով եմ գրառումս օգնեց Ձեզ առավել լավ պատկերացում ունենալ անհատական բրենդի կառուցման առավելությունների մասին, իսկ եթե կունենաք հարցեր, ուրախ կլինեմ պատասխանել դրանց:

Լուիզա Ավետիսյան|
staff.am հարթակի համահիմնադիր,
Մասնագիտական ոլորտներ՝ Պրոդուկտի զարգացում, Հաճախորդների բազայի կառավարում, Մարքեթինգային վերլուծություններ և ռազմավարություն, Նախագծերի կառավարում