Շաբաթվա գիրքը | Փիթեր Թիլ «Զրոյից մեկ»

staffmedia.am-ը շարունակում է «Շաբաթվա գիրքը» շարքը։
Նախորդ հոդվածում դիտարկել էինք Ջո Նավարոյի «Եղի՛ր բացառիկ»-ը։
ԱՄՆ Հետաքննությունների դաշնային բյուրոյի նախկին աշխատակցից սովորեցինք բացառիկ դառնալու այն բոլոր նրբությունները, որոնք օգնում են մեզ թե՛ անձնական կյանքում, թե՛ աշխատավայրում։
Հեղինակի գործնական փորձից ծանոթացանք, թե ինչպես կարելի է զարգացնել ներքին հավասարակշռությունը, տիրապետել վերբալ ու ոչ վերբալ հաղորդակցման առանձնահատկություններին, լինել հոգեպես հանգիստ անգամ ամենաբարդ իրավիճակներում և այլն։
Շաբաթվա գրքի շրջանակներում մեզ այս անգամ հետաքրքրել է Փիթեր Թիլի «Զրոյից մեկ»-ը, որը սիրված ու ճանաչված գիրք է ինչպես համաշխարհային, այնպես էլ հայ ընթերցողի համար։ 
Այս գիրքը New York Times-ի բեսթսելլերների շարքում է։ Գրքի համահեսինակը Բլեյք Մասթերսն է։ 
Ձեռնարկատեր և ներդրող, PayPal-ի համահիմնադիր Փիթեր Թիլն այս գրքում ներկայացնում է ստեղծելու և որակապես նոր մակարդակի հասնելու եզակի ուղիները։
Թիլը կարծում է, որ մենք ապրում ենք տեխնոլոգիական լճացման դարաշրջանում։ Նա պնդում է, որ տեղեկատվական տեխնոլոգիաներն իսկապես արագ զարգացում են ապրում, բայց պետք չէ առաջընթացը սահմանափակել միայն համակարգիչներով կամ «Սիլիկոնյան հովտով»։ Առաջընթացի կարելի է հասնել բոլոր ոլորտներում։ Պարզապես պետք է ինքնուրույն մտածել սովորել։
Ներկայացնում ենք հեղինակի «Զրոյից մեկ» գրքից մի քանի առանցքային մտքեր, որոնք, վստահաբար, օգտակար ու նորարար են ժամանակակից ընթերցողի համար։

Քայլել 0-ից դեպի 1

Ըստ հեղինակի՝ պետք է ստեղծել նորը և ոչ թե պատճենել արդեն իսկ առկա գաղափարները։ Ճշմարիտ առաջընթացի հիմքը նորարարությունն է և ոչ թե աստիճանական բարեփոխումները։
Թիլն այստեղ պնդում է, որ պետք է կառուցել հիմնովին նոր բան, որն արժեքավոր կլինի աշխարհի բարօրության համար՝ այսպիսով 0-ից գալով դեպի 1։
Հեղինակը ձեռներեցներին խորհուրդ է տալիս, որ վերջիններս կենտրոնանան ստեղծարար և նոր լուծումների վրա և փորձեն գտնել առկա լուծման եղանակների այլընտրանքները։ 
Ըստ Թիլի՝ երբ մարդիկ կրկնում են այն, ինչն արդեն արվել է, որևէ արժեք չի ստեղծվում և մարդկությունը նույն կետում է մնում։
Որևէ նոր բան ստեղծելով՝ զրոյական կետից մարդկությունը մեկ քայլ առաջ է անում։

Մտածել ինքնուրույն

Թիլն անչափ կարևորում է ինքնուրույն մտածողությունը։
Ըստ նրա՝ հաջողակ գործարարները պետք է ունենան բիզնեսի  հստակ տեսլական՝ կարողանալով գնահատել անկրկնելի հնարավորությունները։ Նա խորհուրդ է տալիս ոչ թե կուրորեն հետևել ժամանակակից բիզնեսի թրենդներին, այլ ունենալ քննադատական մտածողություն՝ հայտնաբերելու շուկայում առկա բացթողումները։ 
Հարցի տակ դնելով համընդհանուր իմաստությունը՝ ձեռներեցները կարող են բացահայտել այնպիսի նորարար լուծումներ, որոնք անմատչելի կարող են թվալ այլոց համար։

Ինքնուրույնությունը ոչ թե համընդհանուր գաղափարներին հակառակվելն է, այլ քո ուրույն ճանապարհով քայլելը

Հեղինակն իր գրքում խոսում է նաև այն մասին, թե ապագայի բիլգեյթսերն ու իլոնմասկերն այլևս մրցակցության մեջ չեն մտնի որևէ մեկի հետ։
Նա այն կարծիքին է, որ անհավասար և անիմաստ մրցակցությանը տրվելու փոխարեն՝ վերջիններս եզակի արժեք կստեղծեն ու երկարաժամկետ հեռանկարում ամենալայն ու համապարփակ իմաստով կնպաստեն տեղեկատվական տեխնոլոգիաների զարգացմանը։ 

Տեխնոլոգիական լճացում

Թիլը պնդում է, որ մինչ մենք բոլորս համոզված ենք, որ առաջընթացը կայանում է տեխնոլոգիական սարքավորումների ու ծրագրերի կատարելագործման մեջ, մեր ուշադրությունից վրիպում են իրապես բեկումնային նորամուծությունները։ 
Գրքում ընգծվում է, որ  տեխնոլոգիական առաջընթացում չի նկատվում անցյալի նորամուծությունների փոխակերպող ուժը։ 

Հաճախորդներին ոչ թե հետաքրքրում է թվային ու տեխնոլոգիական առաջընթացը, այլ թե դրա միջոցով ինչ խնդիրներ են լուծվում՝  լավագույնս ու արագ:

Թիլը նշում է, որ կարիք ունենք առավել էական առաջընթացի, որոնք ստեղծում են նոր հնարավորություններ և ոչ թե արդեն իսկ առկա գյուտարարությունները պարզապես բարելավումն ու կատարելագործումը։

Թիլը բոլոր ձեռնարկատերերին առաջարկում է տեխնոլոգիական առաջընթացից անդին ունենալ զարգացման ու նորարարության տեսլական այլ բնագավառներում ևս։
Այդ նորամուծությունների նպատակը պետք է լինի բեկումնային և չնախատեսված փոփոխությունների սկիզբը։ 

Ստորև ձեզ համար գրքից առանձնացրել ենք հեղինակի մի շարք մեջբերումներ, որոնք լավագույնս կարող են մոտիվացնել ձեզ նորարարության ճանապարհին։ 

«Եթե պատրաստ եք հարցականի տակ դնել այն, ինչը ներկայացվում է որպես անվիճելի ճշմարտություն, ապա սկսե՜ք», 

«Հաջողության հատուկ բանաձև չկա, մրցակցությունը չի նպաստում աճին, իսկ տեխնոլոգիական առաջընթացը խիստ սահմանափակ է»,

«Զրոյից կաճեն և մեկի կհասնեն միայն բեկումնային որոշումներ կայացնող և նոր արժեք ստեղծող մարդիկ»,

«Կա մի կարևոր նախադրյալ՝ չկրկնել այն, ինչն արդեն արվել է»,

«Թռիչքի ժամանակն է։ Զրոյից մեկ․ ստեղծել ստարթափ, որը կփոխի ապագան»։

Այսպիսով, ապագան տեսնելու և կառուցելու համար «Զրոյից մեկը» առաջարկում է գործնական, փորձված ու մշակված խորհուրդների հրաշալի պաշար, որոնք, վստահաբար, կիրառելի կլինեն՝ իրագործելու ձեր թարմ ու ստեղծարար գաղափարները։