Այս դժվար ժամանակաշրջանում, երբ համաշխարհային պանդեմիան առաջացրել է համատարած անկայուն իրավիճակ, յուրաքանչյուր աշխատակից, ավելի, քան երբևէ, գնահատված լինելու կարիք է զգում։
Հատկանշական է, որ ցանկացած աշխատակից հաջողության հասնելու համար շատ է կարևորում «առողջ» ֆիդբեքի առկայությունը։ Իսկ ներկա պահի դրությամբ գործատուի կողմից մշտապես հնչեցվող ֆիդբեքն ավելի մեծ կարևորություն է ստանում։ Նույնիսկ քննադատական ֆիդբեքն այս օրերին կարելի է այնպես հնչեցնել, որ թիմակցին չպատճառի անհարմարություն, չառաջացնի հավելյալ սթրես կամ գնահատված չլինելու բարդույթ։ Կարելի է ոչ այդքան գոհացուցիչ աշխատանքի ֆիդբեքը, օրինակ, այսպես հնչեցնել՝ «Դու դա կարող ես նույնիսկ ավելի լավ անել»։
Իհարկե, զարմանալի չէ, որ գրեթե բոլորի կյանքն այս օրերին բավականին փոփոխության է ենթարկվել, որոշ առումներով նույնիսկ կենցաղային կյանքի և աշխատանքի միջև բալանսավորում պահելը դժվարացել է, գուցե նաև ոմանք ավելի են ծանրաբեռնվել, իսկ ոմանց մոտ էլ ապագայի անորոշությունը հանգեցրել է անկայունության։ Այս պարագայում շատ կարևոր է թիմակիցներին քաջալերելը, նրանց նկատմամբ դրական վերաբերմունք ցուցաբերելը և, ինչու ոչ, նաև գովասանքի արժանացնելը։
Վերջ ի վերջո, եկեք համաձայնենք, որ ֆիդբեք տալն այդքան էլ երկար ժամանակ չի խլում մեզնից, ամենաշատը՝ երկու-երեք րոպե։ Կարող եք աշխատանքային ժամի ավարտին 2 րոպե հատկացնել լավ ֆիդբեք տալուն (նույնիսկ, եթե ըստ Ձեզ աշխատանքն այդքան էլ հիասքանչ չէ կատարված, կարող եք պարզապես ասել, որ այն լավ է արված), և հավատացեք` Ձեր թիմակիցը կունենա օրվա լավ շարունակություն, և գուցե հաջորդ օրն էլ ավելի լավ և մեծ ոգևորությամբ կատարի իր աշխատանքը։
Պետք է նշել նաև, որ երախտագիտությունը և գնահատված լինելու զգացումը նպաստում են ավելի ամուր հարաբերությունների ձևավորմանը ղեկավարի և աշխատակցների միջև։ Երբ աշխատակիցները գործատուի մոտ իրենց ավելի լավ են զգում, անկաշկանդ կամ որոշակիորեն մտերիմ, իրենք ավելի պատրաստված են հաղթահարում մարտահրավերները և բաց են լինում նորարարությունների նկատմամբ։
Ահա մի քանի պարզ քայլ, որոնք կօգնեն Ձեզ այս հարցում՝
- Օրվա ընթացքում գոնե մեկ անգամ հասանելիություն պահպանեք Ձեր թիմի յուրաքանչյուր աշխատակցի հետ։ Նույնիսկ արագ հնչեցրած «Ողջու՜յն»-ը ցույց կտա, որ Ձեր թիմակիցների մասին հիշում եք։ Կարող եք նաև հարցնել՝ ինչպես է ընթանում աշխատանքը, քանի որ հեռահար աշխատելիս փոքր-ինչ բարդ է հասկանալ ծանրաբեռնվածության մակարդակը։
- Օրինակ, եթե զգում եք, որ թիմակիցը գտնվում է սթրեսային իրավիճակում, փոքր-ինչ ընկճված է, կարող եք նրան փոխադարձ ըմբռնման և կարեկցանքի արժանացնել՝ նույնիսկ աննկատելիորեն։
- Եթե զգում եք, որ աշխատակիցն իրեն լավ չի զգում կամ թույլ է, կարող եք թույլատրել որոշակի հանգիստ։
- Եվ, ամենակարևորը, աշխատանքի ավարտին նրանց տվեք խրախուսական, ոգեկոչող ֆիդբեք։ Հիմա ավելի, քան երբևէ լավ նորությունների և գնահատականների կարիք բոլորս էլ ունենք։
- Իհարկե, թիմակիցներին ֆիդբեքով քաջալերելուց բացի, կարելի է նաև կազմակերպել վիդեո զանգեր, որտեղ կքննարկեք կատարվող աշխատանքը, կվայելեք մեկմեկու հետ հաղորդակցվելու հաճույքը՝ ինչպես աշխատավայրում էր, կարող եք նաև այս տարբերակով միասին մեկ բաժակ սուրճ ըմպել, եթե ունեք նշելու առիթներ, հեռահար տարբերակով նշելն էլ վատ գաղափար չէ, կարելի է նաև մի քանի րոպե հատկացնել ինտելեկտուալ կամ միտքը հանգստացնող խաղերին։
Գուցե Covid 19-ը շատ բան է փոխել մեր կյանքում, բայց պետք է փորձենք չկորցնել մեր արդյունավետությունը և դրական վերաբերմունքը աշխատանքում՝ կլինի դա գործատուի լավ ֆիդբեքի, թե ինքներս մեզ մոտիվացնելու կարողության շնորհիվ։ Եվ ինչպես Չարլզ Դարվինն էր ասում, որը այս պահին շատ արդիական կլինի մեջբերել՝
«Ոչ թե ամենաուժեղները կամ խելացիները կհաղթահարեն, այլ նրանք, ովքեր լավագույնս կդրսևորվեն և կհարմարվեն փոփոխությանը»:
