PMI Հայաստան համայնքն ուրախությամբ տեղեկացնում է, որ այս տարվա նոյեմբերի 3-ին տեղի է ունենալու Project Management Awards 2024-ը՝ առաջին միջոցառումը, որը ներկայացնելու և ըստ արժանվույն գնահատելու է Հայաստանում իրականացվող լայնամասշտաբ նախագծերը։
Միջոցառման նպատակն է ընդգծել նախագծերի կառավարման կարևորությունը՝ Հայաստանի տնտեսության զարգացման և նորարարական մոտեցումների համար։ Ներկայացնելով օրինակելի նախագծերը՝ մենք կարևորում ենք նաև այդ նախագծերի հետևում կանգնած հմուտ պրոֆեսիոնալների մասին խոսելը, ինչը ևս մեկ անգամ կհանրայնացնի նախագծերի կառավարման էական ազդեցությունը՝ հատկապես լայնամասշտաբ և պետական կարևորություն ունեցող նախագծեր իրականացնելիս։
Մրցանակաբաշխությունը 4 անվանակարգ ունի՝
1. Տարվա նախագծի ղեկավար
2. Նորարարության նախագծի ղեկավար
3. Կայունության նախագծի ղեկավար
4. Սոցիալական ազդեցության նախագծի ղեկավար
Այս անվանակարգերում նախագծերը ներկայացնելու համար անհրաժեշտ է լրացնել այս ձևաթերթը՝ մինչև հոկտեմբերի 25-ը։ Նախագծերն ամենայն մանրամասնությամբ քննվելու են պրոֆեսիոնալ և հեղինակավոր ժյուրիի կողմից։
Միջոցառման բոլոր մասնակիցները նաև հնարավորություն կունենան հանդիպելու PMI-ի տնօրենների խորհրդի նախագահ ԼուԱնն Պիկարդին՝ համաշխարհային հեղինակություն ունեցող պրոֆեսիոնալին։
Project Management Awards 2024-ի շրջանակներում ոլորտի պրոֆեսիոնալները նաև ելույթներ, զեկույցներ կունենան, կկիսվեն իրենց փորձով, կներկայացնեն ոլորտի նորարարությունները, մարտահրավերները և դրանց լուծման տարբերակները։
PMI Հայաստանը PMI-ի տեղական մասնաճյուղն է և հիմնադրվել է 2015 թվականին։ PMI-ը աշխարհի առաջատար ոչ առևտրային մասնագիտական և անդամակցության վրա հիմնված ասոցիացիա է՝ նախագծերի, ծրագրերի և պորտֆելի կառավարման մասնագետների համար: Հիմնադրվելով 1969-ին՝ PMI-ը իր արժեքների շուրջ է համախմբում ավելի քան 2․9 միլիոն մասնագետների, որոնք գործունեություն են ծավալում աշխարհի գրեթե բոլոր երկրներում՝ գլոբալ հաղորդակցության, համագործակցության, կրթության և հետազոտության միջոցով:
Հավելյալ տեղեկությունների համար կարող եք հետևել PMI Հայաստանին Facebook և LinkedIn սոց․ հարթակներում։
