Մարզերի հզորացումը շարունակում է լինել կարևոր առաջնահերթություն բոլորիս համար, որին ուղղված մեր գործատու ընկերությունները շատ հաճախ են տարբեր նախաձեռնություններով ներկայանում։ Դե ինչպես արդեն գիտեք, staff.am-ը նույնպես երբեք անմասն չի մնում մարզերի հզորացման, փոխօգնության ու գործակցության ծրագրերից։Այսպիսի կարևորագույն նախաձեռնություններից էր ապրիլի 2-ին և 3-ին TCF Armenia (Թի ՍԻ Էֆ Արմենիա) ընկերությունների խմբի կողմից կազմակերպության տարեդարձի առթիվ կազմակերպած Ֆորմուլա Գորիս 2-օրյա կոնֆերանսը։ Նպատակը նույնպես շատ ոգևորիչ ու արժեքավոր էր․ Սյունիքի և Արցախի երիտասարդներին ներկայացնել ժամանակակից տեխնոլոգիաներում հմտանալու և հաջողության հասնելու հնարավորություններն իրենց իսկ համայնքներում։
Կոնֆերանսը հագեցած էր թեմատիկ, գիտելիք, փորձ և հմտություն փոխանցող ելույթներով, մոտիվացիոն ելույթներով, վորքշոփերով, պանելային քննարկումներով և այլ կարևոր ծրագրերով, որոնց հրավիրված էին մասնակցելու տարբեր տեխնոլոգիական ընկերությունների հիմնադիրներ և ղեկավարներ իրենց փորձով ու գիտելիքներով համայնքների երիտասարդների հետ կիսվելու համար, ինչպես նաև ուղղորդելու թե ինչպես կարելի է հիմնել բիզնես և զարգացնել։
«Շուրջ 500 հոգի մասնակցեց կոնֆերանսին։ Արձագանքը շատ ոգեշնչող էր, մեծ ոգևորություն էր տիրում թե կոնֆերանսի ընթացքում, և թե դրանից հետո։ Ստացել ենք մեծ թվով շնորհակալական նամակներ և հաղորդագրություններ», – նշեց TCF ընկերությունների խմբի համահիմնադիր և կառավարող խորհրդի անդամ Մարիամ Համբարձումյանը։
Կոնֆերանսին ներկա էին գտնվում նաև staff.am և HireBee համահիմանդիր ղեկավար Վահե Ավետիսյանը և համահիմնադիր Լուիզա Ավետիսյանը՝ ունենալով կարիերայի զարգացմանն ուղղված հատուկ ելույթներ և ներգրավվելով կարևորագույն պանելային քննարկումներում։
Ինչպես է անհատի ինքնազարգացումը և աշխատասիրությունը փոխակերպում միջավայրը պանելային քննարկման ժամանակ staff.am և HireBee համահիմնադիր Լուիզա Ավետիսյանը կիսվեց թեմայի շուրջ իր տեսանկյունով․
«Հասարակությունը կազմված է անհատներից։ Իմ խորին համոզմունքն է, որ մեկ անհատն ի զորու է կատարել մեծ փոփոխություններ իր համայնքում, ոլորտում, երկրում և նույնիսկ աշխարհում։ Հստակ գիտակցելով դա՝ յուրաքանչյուր գիտակից մարդ պետք է կրի պատասխանատվություն միջավայրի՝ դեպի լավը փոխակերպելու գործում։ Ինքնազարգացում, ինքնակատարելագործում, ունեցած նվաճումներով չբավարարվելու և ավելիին ձգտելու մղում և, իհարկե, աշխատասիրություն. ըստ իս, սրանք են միջավայրի զարգացումն ապահովելու և դեպի լավը փոխակերպելու համար կարևոր որակները»։
Մեկ այլ թեմայով՝ «Մասնագիտական կողմնորոշում, որ մասնագիտություններն են պահանջված և ինչպես ընտրել» պանելային քննարկման ժամանակ staff.am և HireBee ընկերությունների համահիմնադիր և ղեկավար Վահե Ավետիսյանը իր խորհրդով ու փորձով կիսվեց․
«Եթե զգում եք, որ արդեն մասնագիտական կողմնորոշման կարիք ունեք, դա արդեն իսկ շատ լավ է և նշանակում է, որ շատ շուտով կկողմնորոշվեք այդ ուղում։ Կարևորն այն է, որ այդ պահը գիտակցեք ու հասկանաք, որ ձեր մտքում ունեցած ցանկացած գաղափար կարող եք հաջողացնել։ Այս պահին ՏՏ ոլորտի գրեթե բոլոր մասնագիտությունները պահանջված են։
Հետևեք staff.am-ին, անպայման, բավականին շատ առաջարկներ կան գործատուների կողմից, փորձեք հասկանալ, թե ում ինչ արժեք կարող եք փոխանցել, այլ ոչ թե միայն վերցնել։ Այդ մոտեցումը պետք է ներկայացնել նաև գործատուներին հարցազրույցների ժամանակ, ինչը ցույց կտա ձեր պատրաստակամությունը պատասխանատվությունը վերցնելու ձեզ վրա և անդադար առաջ շարժվելու»:
Թվային կոնֆերանսի շրջանակներում ուշագրավ էր Կորիզ զարգացման գաղափարների մրցույթի կազմակերպումը (մրցանակային ֆոնդով), ինչպես նաև Instigate Mobile CJSC և VMware Armenia ընկերությունների թիմերի եւ Union of Advanced Technology Enterprises (UATE)-ի կողմից Քարահունջ գյուղում «Արմաթ» լաբորատորիայի հիմնումը։
Այսպիսով, կոնֆերանսը երկօրյա էր, բայց շատ բազմաբովանդակ ու արդյունաշատ՝ հետագա խոստումներով լի։
«Նախատեսում ենք շարունակական կապի մեջ լինել բոլոր մասնակցած և անգամ գրանցված, բայց ինչ-որ պատճառով մասնակցել չկարողացած մարդկանց հետ։ Նրանք կստանան բոլոր պրեզենտացիաները և դրանց կից ձեռնարկներ, ողջ կոնֆերանսի տեսաձայնագրությունը՝ բաժանված ըստ թեմաների և խոսնակների։
Բացի դրանից հարցում ենք իրականացնելու հասկանալու համար մասնագետների հետաքրքրվածության շրջանակները, խմբավորելու ենք և սկսելու ենք ըստ մասնագիտական ուղղությունների աշխատանքներ տանել այդ երիտասարդների հետ՝ վերապատրաստումների, զարգացման և մենթորինգի տեսքով։ Արդյունքները իրենց սպասել չեն տա»,- առաջիկա պլանների մասին պատմեց Մարիամ Համբարձումյանը։
Եվ ողջունելի է նաև այն փաստը, որ այս նախագիծը կարող է շարունակական լինել և այլ մարզերում նույնպես իրագործվել․
«նախատեսում ենք ամեն տարի մեր ծննդյան օրը նշել այս ֆորմատով տարբեր մարզերում ու խրախուսում ենք տարբեր ընկերությունների և անհատների միանալ այս նախաձեռնությանը և իրենց ծննդյան օրերը նշել որպես համայնքների ու հանրության հետ փոխօգնության և համագործակցության օր։ Դա կարող է լինել ցանկացած մասշտաբի միջոցառում, կարևորը, որ ունենա այդ բաղադրիչը՝ օգնել, աջակցել գիտելիք, հմտություն կամ փորձ փոխանցել։ Մենք շատ ենք ցանկանում, որ այս երևույթը դառնա ավանդույթ, որն անշուշտ մեծ օգուտ կբերի Հայաստանին և միջավայրային դրական փոփոխություններ տեղի կունենան մեր շուրջը»,- հավելեց Մարիամը։
Շնորհակալություն ենք հայտնում TCF ընկերությունների խմբին այսպիսի նախաձեռնության համար և ևս մեկ անգամ մեր շնորհավորանքներն ուղղում տարեդարձի կապակցությամբ։ Այս նախաձեռնությունը միավորեց շատ ընկերությունների ու մասնագետների հանուն մարզերի ու երիտասարդների զարգացման։ 🙂
