Չնայած գիտնական-համաճարակաբանները կանխատեսում են պանդեմիայի երկարատև գոյությունը, մի շարք երկրներ՝ այդ թվում նաև Հայաստանը, թուլացնում են արտակարգ դրության սահմանափակումները, և որոշ ոլորտներ վերադառնում են օֆիսային աշխատանքի։ Մի կողմից համաճարակը դեռևս դիմադրում է մեր միասնական ջանքերին, մյուս կողմից էլ տնտեսական ճգնաժամն է արդեն «իրենն ասում», և մարդիկ չեն կարող «հավերժ» տանը փակված մնալ, անհրաժեշտ է վերադառնալ աշխատանքի։
Իհարկե, աշխարհի փորձը ցույց է տալիս, որ պատերազմներից և համաճարակներից հետո տնտեսական կյանքն արագ վերականգնվում է, ավելին, հաճախ նույնիսկ կուտակված պահանջարկի թռիչքաձև աճ է տեղի ունենում, բայց այս պահին դժվար է գնահատել այն տնտեսական հետևանքները, որոնք կառաջացնի կորոնավիրուսը, որովհետև համավարակի դեդլայնը դեռևս tbd կարգավիճակում է (to be decided – պետք է որոշվի)։
Եվ այստեղ հարց է առաջանում՝ ինչպիսի՞ն կլինի մեկուսացումից հետո աշխատանքային շրջանը, և ինչպե՞ս պետք է վարվեն մեր գործատուները։
ՈՉ ՄԻԱՅՆ ՎԵՐԱԲԱՑՈՒՄ, ԱՅԼ ՆԱԵՎ ՆՈՐ ՍԿԻԶԲ
Ելնելով ստեղծված իրավիճակից՝ վերաբացվելիս ընկերությունները պետք է ակտիվորեն դիտարկեն հետևյալ հինգ կարևոր առաջնահերթությունները՝
1. Առաջին տեղում՝ մարդիկ
Այսօր բոլորս ենք ականատես լինում, թե ինչպես մեկս մյուսի մասին հոգ տանելով ու մտածելով` կարող ենք կյանքեր փրկել։ Եթե իսկապես ցանկանում եք ունենալ պրոդուկտիվ, ինկլյուզիվ թիմ, ապա անչափ կարևոր է նրանց հետ հաղորդակցվելը, նրանց կարիքներին ու մտահոգություններին ծանոթանալը։
Ըստ Accenture-ի կողմից կատարված ուսումնասիրության. «համաշխարհային մակարդակում աշխատուժի մոտ 64%-ն անհանգստանում է իր աշխատանքի կայունությամբ, իսկ մյուսները մտահոգված են, որ այլևս ավանդական սոցիալական շփումը չի լինի»։
Պրոակտիվ կերպով ֆիդբեք հարցրեք ձեր աշխատակիցներից, ծանոթացեք նրանց մտորումներին ու, անպայման, անհրաժեշտության դեպքում ուղղություն ցույց տվեք, ձեր ձայնը թող հասանելի լինի նրանց։
2. Վերադասավորեք աշխատավայրը և ապահովեք անվտանգությունը
Ստեղծեք անվտանգ աշխատանքային միջավայր, որը կերաշխավորի ձեր աշխատակիցների առողջությունը։ Հնարավորության դեպքում սահմանեք վիրտուալ/ֆիզիկական հիբրիդային աշխատանքային ռեժիմ։ Վերադասավորեք աշխատավայրն այնպես, որ հնարավոր լինի պահպանել սոցիալական հեռավորություն՝ 1,5 – 2մ, կրեք անձնական պաշտպանիչ միջոցներ՝ դիմակներ, ձեռնոցներ, կատարեք ջերմաչափումներ, տարածքի մշտական ախտահանում և հնարավորինս սահմանափակեք գործնական տեղաշարժը։
Պետք է բացառել նույն սենյակներում կամ վերելակներում բազմաթիվ աշխատակիցների ներկայությունը և նույն գրասենյակային իրերի օգտագործումն առանց ախտահանման։
Նախընտրելի է աշխատավայրում դռները մեծամասամբ թողնել բաց՝ բռնակներին անընդհատ դիպչելուց խուսափելու նպատակով։ Եթե կա հնարավորություն աշխատակիցներին բաժանել մեկը մյուսից ապակիների միջոցով, ապա պետք է իրականացնել այդ։
«Առաջին բանը, որ մենք անում ենք՝ տալիս ենք աշխատակիցներին ընտրություն կատարել «գալ աշխատանքի, թե շարունակել աշխատանքը տանից» մոտեցումների միջև։ Ուժեղացվել են հիգիենայի ատրիբուտները, ստեղծել ենք կանոններ խոհանոցից օգտվելու համար՝ խոհանոցում առավելագույնը պետք է լինի երեք մարդ, պահվելու են պարետի կողմից նշանակված բոլոր նորմերը։ Тeam building-ները, staff meeting-ները և AMA session-ները կազմակերպվում են օնլայն, իսկ, ամենակարևորը, աշխատակիցների հետ մշտապես կապի մեջ ենք գտնվում և իրազեկված ենք պահում կարևոր նորություններին»,- նշեց DataArt Armenia ընկերության HR տնօրեն Իշխան Մարգարյանը։
3. Պլանավորեք փուլային անցում
Փուլային անցումն օֆիսային աշխատանքին ձեզ թույլ կտա վերակազմավորելու պրոցեսները և ստեղծելու agile աշխատանքային մոդել։ Սկսեք ձեր բիզնես ռազմավարությունից, զուգահեռներ տարեք ձեր բիզնես ռազմավարության և կրիտիկական այս ընթացիկ պրոցեսների հետ։ Հաջողությունը կախված է նրանից, թե որքան նորարար լուծումներ կտրամադրեք այս նոր պայմաններում։ Նաև կոորդինացրեք ձեր քայլերը կառավարության որոշումների հետ։ Ստեղծեք դիվերսիֆիկացված թիմեր, որոնք կզբաղվեն ձեր բիզնեսի ամենակարևոր գործառույթներով։ Եվ, իհարկե, «վերաբացեք» ձեր բիզնեսը նորովի՝ մշակելով և զարգացնելով նոր ուղղություններ, որոնք ավելի շահութաբեր են և նոր փուլ կտեղափոխեն ձեր ընկերությունը։
4. Ձևավորեք ծախսերի էլաստիկ փոխակերպման մշակույթ
Ստեղծեք ծախսերի շարունակական վերահսկման մտածելակերպ և մշակույթ՝ զուգահեռաբար որոշելով, թե որ բաժիններում է կարևոր ներդրումներ կատարելը։ Հետևողական եղեք աջակցման ծրագրերին նույնպես, որը կարող է ձեզ մրցակցային առավելություն տրամադրել։
5. Պատրաստ եղեք ապագային
Վերաբացման երկարատև հաջողությունը կապված է նոր հնարավորությունների ստեղծման հետ։ Սա այն ժամանակն է, որ կարող եք արագորեն բիզնես փոխակերպումներ իրականացնել և ձեր աշխատանքում ու պրոդուկտում ներդնել նորագույն տեխնոլոգիաները։ Լսեք ձեր հաճախորդներին և արձագանքեք շատ արագ։ Հաճախորդի կարծիքը թող լինի ձեր սրտում, ինչն էլ կորոշի ձեր զարգացման ուղղությունը։
Իսկ վերջաբանի փոխարեն, եթե դեռևս չենք կարող հաջողություն մաղթել կորոնավիրուսին, ապա կարող ենք պարզապես ասել․ «Հաջողություն վերաբացում, բարի գալուստ նորարարություն»:
