Երևան
Չիկագո
Ամստերդամ
Անչափ ուրախ ենք ներկայացնել ևս մեկ հայկական ՏՏ ընկերություն, որը 12 տարի գործում է Հայաստանում և արդեն ունի ներկայացուցչություններ Եվրոպայում և ԱՄՆ-ում։
Ընկերության գրասենյակը, ուր այցելել էինք վերջերս, շատ գեղեցիկ, տպավորիչ և կրեատիվ էր։ Հաճելիորեն զարմացանք հանգստի և աշխատանքի համար նախատեսված տարբեր գոտիներ տեսնելով, օրինակ՝ Սիրահարների այգին, լոնդոնյան ոճի կարմիր հեռախոսախցիկները, հարմարավետ ճոճաթոռը և այլն։ Այս ամենը տեսնելով՝ մեր թիմն արդեն չէր համբերում սկսել զրույցը SFL-ի ինժեներների և ՏՏ մասնագետների հետ՝ բացահայտելու նրանց աշխատանքի բոլոր մանրամասները։
Ուզում ենք հատուկ շնորհակալություն հայտնել Ավագ գործառնական ղեկավար (Chief Process Manager) Մարգարիտա Գևորգյանին՝ staff.am-ի թիմին մեծ սիրով հյուրընկալելու համար։
Դե ինչ, սկսենք։
Արսեն Գևորգյան, Chief Executive Officer
Մհեր Սարգսյան, Senior Back-end Developer
Երվանդ Աղաբաբյան, Chief Operations Officer
Մեր առաջին զրուցակիցը SFL ընկերության համահիմնադիր և տնօրեն Արսեն Գևորգյանն էր, ում հետ խոսեցինք SFL ընկերության ակունքների մասին։
SFL-ը Տեղեկատվական Տեխնոլոգիաների ոլորտում գործող ընկերություն է։ Մեր աշխատանքի նպատակն է՝ մեր կողմից ստեղծված տեխնոլոգիաների միջոցով դարձնել մարդկանց կյանքն ավելի հարմարավետ և ապահով, փոփոխել առօրյան դեպի լավը։ Այդ նպատակին ծառայել են մեր պրոյեկտներից շատերը, օրինակ՝ ստեղծել ենք հարմարավետ օնլայն բանկինգի հավելված, որի միջոցով բանկային շատ գործառնություններ դարձել են շատ ավելի դյուրին, ստեղծել ենք ծրագիր, որի միջոցով մեր սահմանապահ մարմինները կապահովեն անվտանգությունը կամ առցանց առևտրի մեծ հարթակ, որի միջոցով մարդիկ կկարողանան իրար նվերներ ուղարկել, և այլն։ Մեր աշխատանքի կոնցեպտը հետևյալն է՝ կա գաղափար, այն ունի տեխնոլոգիական իրականացման կարիք, մենք տրամադրում ենք տեխնոլոգիան՝ դարձնելով գաղափարն իրականություն։ Դա շատ մեծ առավելություն է մեզ տալիս և թուլյ չի տալիս մեր մասնագետներին լճանալ, քանի որ մենք ոչ թե ունենք մեկ կամ երկու նախագիծ, այլ մեր ինժեներները հնարավորություն ունեն աշխատելու տարբեր բնույթի պրոյեկտներում, տարբեր ոլորտներում և տարբեր տեխնոլոգիաներով։
Արսենից տեղեկացանք, որ ընկերությունն այս պահին ունի 80 աշխատակից, որոնց մեծ մասը հանդիսանում են տեխնոլոգիական ոլորտի մասնագետներ։
SFL ընկերությունը հիմնել ենք իմ գործընկերոջ հետ 2006թ-ին, և շարունակում ենք աշխատել միասին։ Պրոյեկտների թվի մեծացմանը զուգընթաց ընդլայնվել է նաև մեր թիմը։ Կուզեմ նշել, որ մենք երբեք չենք ունեցել մարքեթինգային թիմ, հիմնականում մեր ծառայություններից օգտվող գործընկերներն են մեզ խորհուրդ տվել այլ գործարարների և սկսել ենք նոր համագործակցություններ։
SFL-ն այն սակավաթիվ ՏՏ ընկերություններից է, որը ԱՄՆ-ում ներկայացուցչություն է հիմնել ՀՀ-ում արդեն կայացած թիմ ունենալուց հետո։ Ընկերության ընդլայնված աշխարհագրության մասին նույնպես զրուցեցինք Արսենի հետ։
Ներկայում SFL-ն ունի գրասենյակներ Հայաստանում, ԱՄՆ-ում և Հոլանդիայում։ Հիմնականում այստեղ էլ կենտրոնացված է մեր պրոյեկտների մեծամասնությունը։ Հաճախ մեր աշխատակիցները 1 կամ 2 շաբաթով մեկնում են Եվրոպա` մեր հաճախորդների հետ ծանոթանալու և արտասահմանյան թիմերի հետ միասին աշխատելու նպատակով, իսկ ահա վերջերս էլ որոշեցինք ներկայացուցչություն բացել նաև ԱՄՆ-ում, որտեղ ունենք վաճառքի մասնագետներ և նաև զարգացնում ենք ԱՄՆ շուկայի համար որոշակի պրոդուկտների ստեղծման հնարավորությունները։
Իսկ, առհասարակ, խրախուսում ենք առանց սահմանների աշխատելաոճը՝ պահելով արժեքային համակարգը, այսինքն` մեր ինժեները կարող է աշխատել տնից, Երևանյան գրասենյակից, Ամստերդամից կամ Չիկագոյից, կարևորը միևնույն արժեքային համակարգի մեջ լինելն է։
Արսենի հետ զրույցն ամփոփեցինք՝ կադրերի ընտրության մասին խոսելով, որը կարծում ենք հետաքրքրում է մեր ընթերցողներից շատերին։
Մեր ընկերության տարիների փորձի արդյունքում եկել ենք այն եզրակացության, որ կարևորը մասնագետի՝ որպես հասուն մարդ կայացած լինելն է, այսինքն` հաճախ շատ խնդիրներ գալիս են հենց այդ հատկանիշի բացակայության պատճառով։ Իսկ հարցազրույցի ժամանակ ջանում ենք ամեն կերպ գնահատել ու հասկանալ հասուն և կայացած լինելը։ Մեր նոր թիմակիցն աշխատանքի ընդունվելիս գիտի, որ մենք իրեն համարում ենք ավելի խելացի մասնագետ՝ համեմատած մեզ հետ, կամ լավ պոտենցիալ ունեցող մասնագետ, որը կգերազանցի մեզ։ Մյուս կողմից էլ, մեր աշխատանքի հիմքում ընկած է «Ազատության և պատասխանատվության» գաղափարախոսությունը՝ երկու կարևոր արժեքներ, որոնք սխալ մոտեցման դեպքում ուղղակի չեն կարող աշխատել։
Մեր հաջորդ զրուցակիցը Մհերն էր, ում հետ խոսեցինք SFL-ի ամենամեծ նախագծերից մեկի՝ Greetz-ի մասին։
Greetz-ը անհատականացված բացիկների և նվերների մեծ առցանց հարթակ է Հոլանդիայում, Բելգիայում և Լյուքսեմբուրգում։ 2017-ին Հոլանդիայում այն արժանացել է «Տարվա լավագույն կայք» անվանակարգում գլխավոր մրցանակի։ Համակարգն ունի օրական ավելի քան 70,000 ակտիվ օգտատեր։ Տեխնոլոգիաների առումով բավականին բարդ լուծումներ ենք կիրառում, որոնց շնորհիվ համակարգի հասանելիության գործակիցը մոտ է 100%-ի։
SFL-ն ավելի քան 9 տարի հանդիսանում է Greetz-ի ծրագրային և տեխնիկական ապահովման պատասխանատուն։ Հարթակի զարգացման, արդիականացման և նորագույն տեխնոլոգիաների ինտեգրման աշխատանքները կատարվում են մեր կողմից։ Քանի որ տեխնոլոգիաների տեսանկյունից բարդ պրոյեկտ է, ապա նորարարական ինժեներական լուծումների կիրառումը այս պրոյեկտի շրջանակներում պարտադիր է։ Greetz-ը դինամիկ աճող համակարգ է, և մեր նպատակներից մեկն է՝ այդ աճին զուգընթաց դինամիկ զարգացնել տեխնոլոգիական շուկայի նոր սեգմենտներ։ Երկու թիմերի միասնական աշխատանքը հանգեցրել է Greetz-ի ինտենսիվ աճի՝ նախորդ տարվա ընթացքում նկատվել է արտադրական, մարքեթինգային և տեխնոլոգիական մեծ աճ։
Հոլանդական և հայկական թիմերի համագործակցությունն ուժեղացնելու նպատակով թիմերի անդամները հաճախ մեկնում են փորձի փոխանակման ծրագրերի, որտեղ հնարավորություն ունեն միասին աշխատել և քննարկել Greetz-ի զարգացման նոր ուղղություններ։
Մհերի հետ խոսեցինք նաև SFL ընկերության մրցակցային առավելությունների մասին` որպես գործատու ինչպիսի հնարավորություններ է տալիս ՏՏ մասնագետներին և ինժեներներին։
Մենք օգտագործում ենք տարբեր տեխնոլոգիաներ` կախված պրոյեկտի ծավալից, բարդությունից և այլ առանձնահատկություններից, սակայն ամենակարևորը այն է, որ մեր նպատակը միշտ նույնն է՝ կատարել որակյալ աշխատանք, կիրառել տվյալ տեխնոլոգիայում ընդունված նորագույն և լավագույն մոտեցումները։ Մեր ընկերությունում միշտ կարևորվել է մասնագիտական հմտությունների զարգացումն ու դինամիկ աճը։ Պրոյեկտներում ունենք փորձարարական մոտեցում և երբեք չենք վախենում ձախողվելուց, քանի որ դրա արդյունքում նույնպես կատարելագործվում ենք որպես մասնագետ։
Մհեր, դուք հաճախ եք մասնակցում նոր աշխատակիցների հարցազրույցներին, ինչպիսի՞ գործընթաց է դա իրենից ներկայացնում SFL-ում։
Մասնագետը հարցազրույցների մի քանի փուլ է անցնում մեզ մոտ։ Պարբերաբար հայտարարում ենք նաև internship ծրագիր, որը ծրագրավորման ոլորտում սկսնակներին հնարավորություն է տալիս զարգացնել իրենց հմտությունները։ Տարիների ընթացքում մշակել ենք հարցազրույցների անցկացման հատուկ համակարգ, ինչը թույլ է տալիս շատ արագ կողմնորոշվել մասնագետների ընտրության հարցում։ Անգամ եթե տվյալ թեկնածուն աշխատանքի չի անցնում մեզ մոտ, բավականին սերտ համագործակցում ենք նրանց հետ՝ անհրաժեշտ գիտելիքները ձեռք բերելու ուղղությամբ, որից հետո կարող են կրկին փորձել իրենց ուժերը և համալրել մեր թիմը։
Մեր հաջորդ զրուցակիցը Երվանդն էր, ում հետ բավականին մանրամասն խոսեցինք SFL-ում կիրառվող տեխնոլոգիաների մասին։
Մենք մասնագիտացած ենք միջին և խոշոր էնթերփրայզ նախագծերի ծրագրավորման ուղղությամբ։ Այն ոլորտները, որոնց համար ստեղծել և ստեղծում ենք ծրագրային ապահովում, շատ տարբեր են՝ սկսած ազգային անվտանգությունից մինչև մեծ ծանրաբեռնվածությամբ աշխատող ինտերնետային հարթակներ: Բավականին հարուստ փորձ ունենք նաև fintech ոլորտում։ Օրինակ, Ինեկոբանկի ծրագրային ապահովման մեծ մասում ունեցել ենք և շարունակում ենք ունենալ մեծ դեր։ Բոլոր այս նախագծերում ուղղակի չենք կարող չկիրառել նորագույն տեխնոլոգիաներ։
Երվանդից նաև տեղեկացանք, որ SFL-ում հիմնական տեխնոլոգիաները Java-ն և JS-ն են:
Տեխնոլոգիաների ընտրությունը կախված է նախագծի առանձնահատկություններից։ Սկսենք՝ ինֆրաստրուկտուրայի թիմը օգտագործում է Kubernetes, Docker, Docker Swarm, Prometheus, CoreOS, Hyper-V, Ansible, որոնք հիմնականում Linux-ի վրա հիմնված տեխնոլոգիաներ են: Cloud ենք կիրառում, ունենք սերվերներ Amazon-ի,Google Cloud-ի (GCP) և Azure-ի վրա։ Տվյալների բազաների մասով ունենք PostgreSQL, MSSQ, MariaDB/MySQL, MongoDb, Neo4j, Oracle և Oracle RAC-ի կիրառման մեծ փորձ: Հարուստ փորձ ունենք Elastic Search-ի հետ, օրինակ՝ կլաստերներ որոնք 400GB գերազանցում են։ Ունենք BI թիմ, որի համար այս պահին մասնագետ ենք փնտրում։
Java-ի մասով նշեմ, որ արդեն կիրառում ենք Java9, պրոյեկտների մեծ մասը Spring –ով է արվում, multimodule բարդ պրոյեկտներ են հիմնականում։ Պրոյեկտներում ունենք բարձր ավտոմատացված CI (continuous integration) համակարգ՝ Jenkins, Bamboo և այլն։ Code quality-ի համար ակտիվորեն օգտագործում ենք SonarQube:
Front-end-ի մասով կիրառում ենք Angular.js կամ React.js:
Back-end-ում մեծամասամբ Hibernate ենք օգտագործում և վերջերս Spring Cloud ենք կիրառում։
Առհասարակ, որպեսզի պատկերացնեք մեր նախագծերի ծավալը, տիպիկ պրոյեկտում առկա են 100-ից ավելի dependency-ներ։ Հնարավորին չափ միշտ փորձում ենք օգտագործել open source լուծումներ։ Եվ ինքներս ունենք մի քանի open source նախագծեր github-ում։
Երվանդը նշեց նաև, որ այս պահին հետազոտություններ են տարվում որոշ նախագծերում machine learning ալգորիթմների կիրառության հնարավորության ուղղությամբ։
Մեր հարցին, թե արդյոք ընկերությունը դրական է վերաբերվում, երբ թիմակիցները ցանկություն են հայտնում նոր տեխնոլոգիայի մեջ հմտանալու և նոր բան սովորելու, Երվանդը պատասխանեց`
Շատ լավ ենք վերաբերվում նման նախաձեռնություններին։ Բնականաբար ամեն ինչ պետք է հիմնավորված լինի և միտված ավելի լավ արդյունք ստանալուն, և եթե ունենք թիմակիցներ, ովքեր Front-end-ում հմտանալուց հետո, ցանկություն են հայտնում նաև ուսումնասիրել, օրինակ, Back-end տեխնոլոգիաներ, ապա մենք անում ենք ամեն ինչ որպեսզի տանք իրենց այդ հնարավորությունը։
Վարդգես Վարդանյան, Junior Front-end Developer
Արփի Միքայելյան, Product Owner
Մարգարիտա Գևորգյան, Chief Process Manager
Վարդուհի Պետրոսյան, Hiring Manager
Մեր հաջորդ զրուցակիցը Վարդգեսն էր, ով համեմատաբար նոր է միացել SFL-ի թիմին՝ որպես Junior front-end developer։ Ի դեպ Վարդգեսը հաջողությամբ և առավել կարճ ժամանակահատվածում անցել է SFL Mentorship ծրագիրը։ Վարդգեսին տվեցինք մեր արդեն ավանդական դարձած հարցը՝ ինչը նրան ամենաշատը զարմացրեց SFL-ում։
Ես SFL-ին միացել եմ որպես Front-end ծրագրավորող և այժմ առավել խորը ուսումնասիրում եմ և հմտանում JavaScript-ի մեջ (Angular.js, React.js)։ Հաճելիորեն զարմացած եմ ընկերության կորպորատիվ մշակույթով, որի հիմքում երկու արժեք է ընկած՝ Ազատություն և Պատասխանատվություն, այսինքն այստեղ ամեն ինչ արվում է, որպեսզի մասնագետն իրեն առավելագույնս լավ զգա, ստեղծի իր հարմարավետության գոտին՝ ունենալով մեկ նպատակ՝ ապահովել լավագույն արդյունքներ։ Կան շատ ընկերություններ, որտեղ մոտեցումը շատ տարբեր է, և շատերը մտածում են, որ եթե մասնագետը մնա առանց անմիջական խիստ վերահսկողության, ապա գործն առաջ չի գնա։
Վարդգեսն ասաց, որ ինքը ոչ միայն շատ կարճ ժամանակահատվածում SFL Mentorship—ի միջոցով բավականին հմտացել է Front-end տեխնոլոգիաներում, այլ նաև սկսել է ուսումնասիրել Java։
Ընկերներիցս մեկը, ով բավականին երկար ժամանակ ապրել է արտասահմանում, բայց վերադարձել էր Հայաստան, կրկին մտածում էր արտագաղթելու մասին։ Հստակ գիտեի, որ կհամապատասխանի SFL-ին և ուղղորդեցի նրան այստեղ։ Նա ոչ միայն ընդունվեց SFL, այլ նաև չի մտածում այլևս արտագաղթելու մասին ☺
Product թիմից մեր զրուցակիցը Արփին էր, ով արդեն բավականին երկար ժամանակ աշխատում է SFL-ում որպես Product Owner. Ի դեպ, Արփին հանդիսանում է Ինեկոբանկի 4 հիմնական նախագծերի ղեկավարը։
Շատերի մոտ կա կարծիք, որ Product Owner-ը խիստ տեխնիկական մասնագիտություն է, սակայն դա այդքան էլ ճիշտ չէ։ Product Owner-ը պետք է գիտելիքներ ունենա թե՛ տեխնոլոգիաներից, թե՛ այն ոլորտից, որին պատկանում է տվյալ պրոդուկտը։ Այն հանգամանքը, որ ՍՖԼ-ին միանալուց առաջ բավականին երկար աշխատել եմ բանկային համակարգում, մեծապես նպաստել է բանկային հավելվածի վրա որպես Product Owner աշխատանքի հաջողությանը։
Հայաստանում Product Owner-ը նոր ձևավորվող մասնագիտություն է և չկա որևէ ուսումնական հաստատություն, որը կպատրաստեր կադրեր այս ոլորտում աշխատելու համար։ Հմտություներն ու գիտելիքը ձեռք են բերվում առավելապես փորձառական եղանակով՝ հիմնվելով ինքնակրթության, ոլորտի հեղինակավոր դեմքերի փորձի և սեփական պրոյեկտներում աշխատանքի արյունքում հմտանալու վրա։
Արփիի հետ խոսեցինք նաև Ինեկոբանկի հետ համագործակցության մասին, և արդյո՞ք ՏՏ ընկերության և Բանկի միջև համագործակցությունը դյուրին է եղել՝ հաշվի առնելով այն տարբերությունները, որոնք կան աշխատելաոճերում։
Իրականում ճիշտ եք, մարտահրավերներ եղել են սկզբում, բայց Ինեկոբանկի թիմն իսկապես շատ բաց է եղել մեր կողմից առաջարկվող մեթոդոլոգիաների և աշխատելաոճի հետ։ Համագործակցության արդյունքում ստեղծել ենք աշխատանքային սխեմա, որը թույլ է տալիս նոր ֆունկցիոնալություն ստեղծել և օգտատերերին հանձնել սեղմ ժամկետներում։
Արփիին հարցրեցինք, թե արդյո՞ք ունի նպատակներ հմտանալու որևէ այլ ոլորտում, օրինակ Front-end development-ի մեջ:
Սիրում եմ իմ մասնագիտությունը և հենց դրանում էլ ցանկանում եմ շարունակել մասնագիտանալը։ Կարծում եմ դեռ շատ անելիքներ և հետաքրքիր նվաճումներ կան առջևում։
Արփիի հետ զրույցը ամփոփեցինք՝ վերջերս InecoMobile հավելվածի նոր release-ի մասին խոսելով։
InecoMobile-ի վերջին release-ի ընթացքում օգտատերերի դատին ներկայացված ամենամեծ փոփոխությունը եղել է Touch ID ներմուծումը, որի միջոցով օգտատերը կարող է մեկ հպումով մուտք գործել հավելված։
Շատ դրական արձագանքներ ենք ստացել, release-ին հաջորդող 2 օրերի ընթացքում հեռախոսս վայր չէի դնում, այդքան շատ էին դրական արձագանքները։ Ամենամեծ նորությունը, որը ներկայացրել ենք ոչ միայն Ինեկոյի այլ նաև ՀՀ բանկային համակարգի համար՝ InecoFriend հնարավորությունն է, երբ Ինեկոբանկում հաշիվ ունեցող ընկերոջդ գումար ես փոխանցում՝ քո կոնտակտներից ուղղակի նրա հեռախոսահամարն ընտրելով։ Կարիք չկա հիշել բանկային կամ քարտային հաշվի համարը։
Մեր զրույցը շարունակեցինք Մարգարիտա Գևորգյանի հետ, ով խոսեց ընկերության կորպորատիվ մշակույթի մասին։
Մեր օրերում ընկերության հաջողության գրավականն իր թիմն է, իսկ թիմի արդյունավետ աշխատանքի վրա ուղղակիորեն ազդում է կորպորատիվ մշակույթը։ Մենք ջանք չենք խնայում ստեղծելու մի աշխատանքային միջավայր, որտեղ մարդիկ կկարողանան իրացնել իրենց մասնագիտական պոտենցիալը: SFL-ն առաջնորդվում է կորպորատիվ արժեքների մի համակարգով, որը ձևավորվել է մեր գրասենյակի գործունեության ավելի քան մեկ տասնամյակի ընթացքում։
Այդ արժեքներից առաջինը Ազատությունն ու Պատասխանատվությունն է։ Սա նշանակում է, որ թիմակիցն ազատ է կազմակերպելու իր աշխատանքը այնպես, ինչպես իրեն է հարմար՝ միևնույն ժամանակ հիշելով, որ պատասխանատու է արդյունքների համար։
Մյուս արժեքն աշխատանքդ սիրելն է։ Եթե սիրում ես աշխատանքդ, ապա ձգտում ես լինել լավագույններից քո ասպարեզում։ Դրա մասին կարող է վկայել, օրինակ, թե որքան մասնագիտական գրականություն, նորություններ ես կարդում, որքանով ես աշխատում զարգացնել մասնագիտական հմտություններդ։ Մի՛ վախեցիր էքսպերիմենտներից և սխալվելուց՝ սա ևս մեր արժեքներից է, քանի որ միայն այն մարդը չի սխալվում, ով ոչինչ չի անում։ Եվ վերջինը՝ այդ բոլորը պետք է անպայման լինի հետաքրքիր և հավեսով ։) Ունենք շատ միջոցառումներ, որոնց նպատակը լիցքաթափվելն ու լավ ժամանակ անցկացնելն է։
SFL-ի Hiring & Happiness manager Վարդուհին էլ հավելեց՝
Իրականում այն արժեքները, որոնց մասին Մարգարիտան նոր խոսեց, անմիջական ազդեցություն ունեն staff retention-ի վրա։ Օրինակ, մեր թիմակիցներն ունեն տնից աշխատելու հնարավորություն, և մենք դրան իսկապես լուրջ ենք վերաբերվում։ Ունենք Front-end ծրագրավորող, ով սիրում է աշխատել քաղաքի սրճարաններից մեկում, և քանի որ պրոդուկտն ու նախագիծը դա թույլ են տալիս, ապա այլ խոչընդոտներ ուղղակի չկան։
Benefits և perks
Ուժեղ մասնագիտական թիմ,
Ժամանակակից տեխնոլոգիաներով իրականացվող պրոյեկտներ եւ նոր հմտություններ ձեռք բերելու լայն հնարավորություններ,
Մենթորության ծրագիր,
Մրցունակ աշխատավարձ,
Մասնակցություն միջազգային կոնֆերանսներին, փոխանակման ծրագիր արտասահմանյան գործընկերների հետ,
Աշխատանքային ճկուն ժամային գրաֆիկ եւ տնից աշխատելու հնարավորություն,
Անսահմանափակ վճարվող “Day off”-եր,
Հավելավճարներ (referral բոնուսներ, ամուսնության, երեխայի ծննդյան կապակցությամբ),
Բժշկական ապահովագրություն,
Ժամանակակից, հարմարավետ եւ ուրախ գրասենյակ,
Լանչի կազմակերպում, միրգ, սուրճ, բնական հյութ,
Մերսում,
Օրվա ընթացքում քնելու եւ հանգստանալու հնարավորություն (Մեծ,
հարմարավետ բազմոց եւ տաք ծածկոց ։)) )
Թիմային, կորպորատիվ միջոցառումներ։
Training, Development և Mentorship
Մեր աշխատակիցները ակտիվորեն մասնակցում են Հայաստանում և դրա սահմաններից դուրս անցկացվող մասնագիտական միջոցառումներին։ Օրինակ, SFL-ցիները հաճախ ելույթ են ունենում այնպիսի միջոցառումների ընթացքում, ինչպիսիք են BarCamp-ը, Product Tank-ը, GoNative-ը և այլն։ Միայն 2017թ-ի BarCamp Yerevan միջոցառմանը SFL-ից 11 խոսնակ է ներկայացել, – ասաց Մարգարիտան և ավելացրեց, որ
Ընկերությունը շատ է կարևորում նաև արտերկրում հեղինակավոր կոնֆերանսների մասնակցությունը։ Օրինակ՝ վերջին 3 տարիների ընթացքում 20-ից ավելի թիմակիցներ մասնակցել են 7 տարբեր կոնֆերանսների արտերկրում: Դրանք են՝
2017-ին՝ Joker (Սանկտ Պետերբուրգ)
2016-ին` CloudCom (Լյուքսեմբուրգ), DevCon (Մոսկվա), JPoint (Մոսկվա),
2015-ին` Mind The Product (Լոնդոն), Devoxx (Անտվերպեն), Web Summit (Դուբլին)։
Կցանկանայի ներկայացնել նաև մեր մենթորշիփի ծրագիրը, որը բավականին հետաքրքիր է,- ասաց Վարդուհին,- մենք չունենք ստանդարտ փորձաշրջան, դրա փոխարեն ունենք mentorship ծրագիր, երբ նոր ընդունված մասնագետն ունենում է իրեն կցված մենթոր։ Սովորաբար այս ծրագիրը տևում է 3 ամիս։ Բոլոր մենթորներն ավագ ծրագրավորողներ են, ովքեր օգնում են ավելի կրտսեր մասնագետների արագ ստանալ անհրաժեշտ գիտելիքներն ու հմտությունները։
Employer Branding
Հաշվի առնելով, որ նորագույն տեխնոլոգիաների կիրառումը մեզ համար միշտ առաջնային է, մենք փորձում ենք մեր գործատուի բրենդավորումն էլ կառուցել մասնագիտական այն հնարավորությունների շուրջ, որոնք առկա են մեր ընկերությունում։ Օրինակ, շատ ակտիվորեն վարում ենք մեր բլոգը medium.com-ում, որտեղ կիսվում ենք մեր փորձով, կլինի դա նոր տեխնոլոգիայի կիրառման կամ նոր պրոդուկտի հետ կապված հետաքրքիր և օգտակար կոնտենտ։ Մեր մասնագետներն էլ մասնակցում են այս գործընթացին,- ասաց Մարգարիտան։
Վարդուհին էլ հավելեց, որ գործատուի բրենդավորման տեսանկյունից մեծ ուշադրություն են դարձնում նաև ռեքրութմենթի գործընթացին.
Գործատուի բրենդավորումը կառուցելով տեխնոլոգիական նորարության վրա՝ մենք հասել ենք նրան, որ ունենք բավականին շատ staff referral-ներ հենց մեր աշխատակիցներից, ավելի կոնկրետ մեր թիմակիցները 100-ից ավելի թեկնածուներ են ուղղորդել SFL-ում աշխատելու համար 2017թ․-ի ընթացքում։
Մենք թեկնածուին հարցազրույցի երկրորդ փուլ հրավիրելիս տրամադրում ենք տվյալ տեխնոլոգիայի հետ կապված թեսթերի և առաջադրանքի օրինակներ, քանի որ մեր նպատակը ոչ միայն համակարգված ռեքրութմենթի գործընթաց ունենալն է, այլ նաև, օրինակ Java Community ուժեղացնելն է,- նշեց Վարդուհին։
Նաև յուրաքանչյուր հարցազրույցից հետո, մոտ 15 րոպե հատկացնում ենք ներկայացնելու մեր ընկերությունը, այն նախագծերը, որոնք այս պահին ունենք և այլն։ Այսինքն՝ մեր թեկնածուները գիտեն, որ ունենալու են իմաստավորված աշխատանք, նախագծեր, որոնք հետաքրքիր են, իսկ իրենք էլ ունենալու են ազատություն այդ նախագծերի զարգացման գործում իրենց ներդրումով։
SFL-ում տեղեկացանք, որ ընկերությունում կա հետաքրքիր պրակտիկա տեխնոլոգիական ուղղվածությամբ ուսանողներին հրավիրել գրասենյակ, հեքըթոններ կազմակերպել, կամ օգնել ուսանողներին՝ իրենց տեխնոլոգիական նախագծերում ուղղություն տալով։
Արդեն առիթ ենք ունեցել հյուրընկալելու Ամերիկյան համալսարանի, ԱՅԲ դպրոցի, Մայքրոսոֆթ Ինովացիոն Կենտրոնի ուսանողներին,- ավելացրեց Մարգարիտան։
Թիմային միջոցառումներ
https://www.youtube.com/watch?time_continue=1&v=2UmEM5lBHjU
SFL-ի 2017թ․-ի ամանորյա անակնկալը
Միջոցառումներին առհասարակ SFL-ում շատ լուրջ են վերաբերվում և տարվա ընթացքում ունենում ենք մի շարք թեմատիկ միջոցառումներ։
Օրինակ, ամեն տարի նշում ենք SFL-ի ծննդյան օրը՝ հունիս ամսին։ Հավաքվում է կամավորների թիմ մեր աշխատակիցներից, որը պատասխանատու է միջոցառման անցկացման համար։ Օրինակ, մի անգամ հետաքրքիր quest ենք կազմակերպել ամբողջ թիմի համար։ Մասնակիցները բաժանվել էին թիմերի և պետք է հուշումներ գտնեին ամբողջ քաղաքով մեկ՝ միջոցառման անցկացման վայրը հասկանալու համար։ Թիմերից մեկի անդամները, օրինակ, պետք է գնային Հայաստանի ռադիոկայաններից մեկը, հարցազրույց տային և հետո նոր ստանային մյուս քայլի հուշումը, կամ, օրինակ, այցելեին պատկերասրահ՝ հերթական հանելուկը լուծելու համար ☺ Նման հետաքրքիր քայլեր անցնելով և տարբեր հանելուկներ լուծելուց հետո, մասնակիցները պետք է գուշակեին SFL—ի ծննդյանը նվիրված party-ի անցկացման վայրը։
Ladies of SFL or We know how to act, SFL-ի 2016թ․-ի ամանորյա անակնկալը
SFL—ը՝ նկարներում
Ամփոփենք․
Յուրահատուկ կորպորատիվ մշակույթ ունեցող այս կոսմոպոլիտան ընկերությունում աշխատում են խելացի և փորձառու ինժեներներ, ովքեր սիրում են իրենց աշխատանքը և հաճույքով կիսվում են իրենց փորձով ՀՀ-ում տարբեր tech event-ների ժամանակ։
Այստեղ ազատ են աշխատանքային ժամերի և վայրի ընտրության առումով, սակայն պատասխանատու վերջնական արդյունքի համար։ Երբեք չեն դադարում սովորել և կիրառել նոր տեխնոլոգիաներ, ապահովելով տարբեր ոլորտներում ՏՏ լուծումներ՝ ազգային անվտանգությունից մինչև fintech։ Այստեղ կարևում են սովորելու ձգտումը, որպես հասուն մարդ կայացած լինելը և երբեք չեն մոռանում աշխատանքը դարձնել հաճելի, կազմակերպել տարբեր միջոցառումներ՝ hackathon-ներից՝ մինչև թիմբիլդինգ և party-ներ։
Մեծ բավականություն ստացանք SFL մեր այցելությունից, և հուսով ենք մեր ընթերցողին նույնպես հաղորդեցինք այդ տրամադրությունը։
