Տեղեկատվական և հաղորդակցական տեխնոլոգիաների գործատուների միությունը (UEICT) 2019 թվականից ի վեր կազմակերպում է Սիլիկոնային լեռներ ամենամյա գագաթնաժողովը։
Ամեն տարի Silicon Mountains-ը համախմբում է մարդկանց, որոնք հետաքրքրված են ապագա տեխնոլոգիական զարգացումներով՝ պետական պաշտոնյաներին, միջազգային և տեղական փորձագետներին, ՏՀՏ համայնքին, ստարտափներին, ուսանողներին: Զեկուցողները և պանելային քննարկումների մասնակիցները ներկայացնում և քննարկում են իրենց կանխատեսումները սպասվող բարձր տեխնոլոգիական զարգացումների, թվային վերափոխման սոցիալ-տնտեսական ազդեցությունը համաշխարհային մակարդակում, ինչպես նաև առանձնացնում Հայաստանի համար կարևոր մարտահրավերները և հնարավորությունները: Սիլիկոնային լեռները գագաթնաժողովից բացի, ունի նաև տարվա ընթացքում անցկացվող մարզային ֆորումներ՝ ուղղված Հայաստանի մարզային զարգացմանը և տեխնոլոգիական հնարավորությունների առավել թիրախային ներկայացմանը։
Silicon Mountains-ի գաղափարախոսությունն է՝ խթանել բարձր տեխնոլոգիաների կիրառումը տնտեսության մեջ, Հայաստանը աշխարհում դիրքավորել որպես բարձր տեխնոլոգիական լուծումներ առաջարկող և միջազգային համագործակցությանը պատրաստ երկիր:
Ձևավորված ավանդույթի համաձայն՝ Silicon Mountains տեխնոլոգիական գագաթնաժողովին մասնակցում են և զեկույցով հանդես են գալիս Բարձր տեխնոլոգիական ոլորտում համաշխարհային ներդրման համար ՀՀ պետական մրցանակի դափնեկիրներները։ Այս տարի ևս, չխախտելով ավանդույթը, գագաթնաժողովի հատուկ հյուրը կլինի Բարձր տեխնոլոգիական ոլորտում համաշխարհային ներդրման համար ՀՀ պետական մրցանակի 2023 թվականի դափնեկիր Նարայանա Մուրթին:
Silicon Mountains 2024 երկօրյա գագաթնաժողովը կկայանա նոյեմբերի 15-ին Դվին Հոլլում։ Իսկ նոյեմբերի 16-ին տեղի կունենան B2B հանդիպումներ։ Այն նվիրված կլինի տնտեսության մեջ արհեստական բանականության կիրառությանը և մարտահրավերներին։ Միջոցառմանը կմասնակցեն մի քանի հազար մասնակից:
Silicon Mountains 2024-ը կլինի երկօրյա միջոցառում։
Օր առաջին
Առաջին օրը՝ նոյեմբերի 15-ին, տեղի կունենա Silicon Mountains տեխնոլոգիական գագաթնաժողովը, որը բաղկացած կլինի 3 զեկույցից և 3 պանելային քննարկումից, հետևյալ թեմաներով․
Industry.ai
Կքննարկվի, թե ինչու պետք է ջանքեր գործադրել արհեստական բանականության ստեղծման, զարգացման և կիրառման համար, որոնք են հաջողության նախադրյալները, ինչպես է արհեստական բանականությունը փոխակերպում տնտեսության բոլոր ճյուղերը, խթանում նորարարությունը: Ի՞նչ հնարավորություններ և մարտահրավերներ կան այդ ճանապարհին։
Invest.ai
Ուշադրության կենտրոնում կլինեն արհեստական բանականության ֆինանսական ասպեկտները․ ի՞նչ կտան արհեստական բանականության ստեղծման, զարգացման և կիրառման ուղղությամբ կատարված ներդրումները։ Ի՞նչ հնարավորություններ կընձեռի արհեստական բանականության կիրառությունը ֆինանսական կազմակերպություններին, ներդրումային հիմնադրամներին և անհատ ներդրողներին տնտեսության այլ ոլորտներում ներդրումների արդյունավետությունը բարձրացնելու և ներդրումային ռազմավարությունը ձևավորելու, ֆինանսական կանխատեսելիությունը բարձրացնելու տեսանկյունից։
Impact.ai
Կքննարկվի արհեստական բանականության ազդեցությունը սոցիալական փոփոխությունների, էթիկական խնդիրների, գաղտնիության, աշխատատեղերի ձևափոխման, և առօրյա կյանքի վրա ընդհանրապես։
Միջոցառման առաջին օրը կկայանա նաև Միկրոէլեկտրոնիկայի Միջազգային Օլիմպիադայի հաղթողների պարգևատրման արարողությունը։
Օր երկրորդ
Երկրորդ օրը՝ նոյեմբերի 16-ին, կկայանան B2B հանդիպումներ:
B2B հանդիպումների նպատակն է խթանել բիզնես կապերը մասնակիցների միջև, հնարավորություն ստեղծել երկկողմ և բազմակողմ քննարկումների և բանակցությունների համար։ Այն հնարավորություն կընձեռի ձևավորել նոր գործընկերային կապեր և բիզնես գաղափարներ, կխթանի բարձր տեխնոլոգիաների և հատկապես արհեստական բանականության կիրառումը տնտեսության տարբեր ոլորտներում։
