Staff.am բլից հարց ու պատասխան ZERO CTO և Co-Founder Գևորգ Կարապետյանի հետ

1064

ZERO-ն, որի գլխամասը գտնվում է Կալիֆորնիայում և ներկայացուցչական ամենամեծ գրասենյակը Հայաստանում, արհեստական բանականության միջոցով աշխատանքի արդյունավետության բարձրացման և ավտոմատացման լուծումներ է տրամադրում ընկերություններին։

ZERO-ն նաև այն ստարթափներից է, որը բավականին կարճ ժամանակահատվածում ցույց է տվել մեծ արդյունքներ։ Հիմնադրվելով դեռևս 2015 թվականին՝ ZERO-ն ստեղծեց այնպիսի պրոդուկտ, որն ունի գլոբալ ազդեցություն կամ impact, ինչպես staff.am-ի հետ զրույցի ընթացքում նշեց ZERO Գլխավոր տեխնիկական տնօրեն և համահիմնադիր Գևորգ Կարապետյանը։

Շատ կարևոր ձեռքբերում եմ համարում այն, որ մենք ստեղծել ենք տեխնոլոգիա, մենք ստեղծել ենք պրոդուկտ, որը լավագույնն է աշխարհում իր գործառույթով։ Մենք ունենք գլոբալ ազդեցություն, և երբ որ տեսնում ես, որ այն դառնում է ամենօրյա կյանքի մի մաս հազարավոր օգտատերերի համար, դրանից մեծ ձեռքբերում չես պատկերացնում։

Այս անգամ սակայն մեր զրույցն ու այցի ձևաչափը բոլորովին այլ էր. բլից հարց ու պատասխան Գևորգ Կարապետյանի հետ, որոնց միջոցով լավագույնս բացահայտեցինք ZERO-ի մշակույթը, թիմային սովորույթներն ու առօրյան, և, իհարկե, ստացանք շատ ծրագրավորողների և որակի ապահովման մասնագետների համար կարևոր հարցի պատասխանը 🙂 QA, թե՞ Developer, իսկ պատասխանը կարող եք իմանալ տեսանյութում 🙂

Չնայած այցը ենթադրում էր կարճ հարց ու պատասխանի միջոցով վերհանել ընկերության լավագույն սովորույթներն ու առանձնահատկությունները, բայց թիմի և ապագայի պլանների մասին խոսելիս, անհնար էր պատասխանը եզրափակել մեկ կամ երկու բառով, առավել ևս, որ շատ հետաքրքիր համեմատականներ էին տարվում.

Մենք շատ կետերով ենք առանձնանում։ ZERO-ի համար մեր աշխատողները մեր ներդրողներն են։ Օրինակ, մենք՝ որպես տեխնոլոգիական ստարթափ, ունենք ներդրողներ, վենչուրային կապիտալի ֆոնդեր և այլն, և իրենք ներդրում են կատարում մեր արժեթղթերի փոխարեն, նույնն էլ աշխատակիցների դեպքում, որովհետև աշխատակիցները ներդնում են ամենաթանկը՝ ժամանակը և տաղանդը։ Եվ մենք՝ որպես ընկերություն, հետ ենք տալիս նրանց, թե արժեթղթեր, թե միջավայր, որոնցում նրանք աճում են որպես մասնագետ, և թե միջավայր, որտեղ հաճույքով աշխատում են։

Աշխատակիցների մասնագիտական աճը նույնպես շարունակական գործընթաց է ընկերությունում, ինչն էլ հնարավորություն է տալիս լավագույն տեխնոլոգիական լուծումները տրամադրել հաճախորդներին։

Այն ճանապարհը, որով բոլորս անցնում ենք, կրթության ճանապարհ է, յուրաքանչյուրիս համար էլ ավելի լավը դառնալու ճանապարհ է՝ որպես մենեջերներ, որպես ինժեներներ, և մենք մեր աշխատակիցներին հնարավորություն ենք տալիս աշխատել ամենաժամանակակից տեխնոլոգիաների հետ, աշխատել լավագույն մասնագետների հետ թե թիմի ներսում, և թե գլոբալ՝ տարբեր երկրներից ներգրավված խորհրդատուների հետ, ովքեր տվյալ ոլորտի լավագույն մասնագետներն են։

ZERO ընկերության ապագայի խոստումները կապված են ոչ միայն ընկերության, այլ նաև Հայաստանի աշխատաշուկայի զարգացման, նոր աշխատատեղերի ստեղծման և առհասարակ տեխնոլոգիական համայնքի զարգացման հետ։

Պլանները բավականին շատ են, քանի որ մեր բիզնեսը կտրուկ աճում է, և մենք մեծացնում ենք մեր թիմն ամբողջ աշխարհում և Հայաստանում։ Այս պահին մեր առաջնահերթ քայլերից մեկը Հայաստանի թիմի կրկնապատկումն է, – մեր զրույցը ոգևորությամբ եզրափակեց Գևորգը՝ խոսելով ընկերության խոստումնալից պլանների մասին։


Ոգեշնչվելով ևս մեկ հաջողության պատմությամբ՝ ամփոփենք մեր այցը։ ZERO-ի ստեղծումը, ձեռքբերումներըն ու ապագայի տեսլականները միմյանց հետ փոխկապակցված են ամուր կապով, քանի որ համառ աշխատանքը, խիզախությունն ու աշխատանքին պրոֆեսիոնալ մոտեցումը միասին ստեղծել են հզոր շարժիչ ուժ միմիայն դեպի առաջ շարժվելու, իրավաբանական ոլորտում այս խելացի լուծումները կատարելագործելու և այլ ոլորտներ ներմուծելու համար։