Հուլիսի 21-27, անսահմանափակ նեթվորքինգ, գիտելիքի և փորձի փոխանակում, ինտենսիվ բիզնես քննարկումներ, մենթորություն և շատ ավելին՝ կապուտաչյա Սևանի ափին՝ արևի, աստղերի և խարույկի ուղեկցությամբ․ անիրական թվացող շաբաթ ստարթափների համար կամ պարզապես Sevan Startup Summit 2024։
Sevan Startup Summit-ը ոչ ֆորմալ վրանային բիզնես ֆորում է, որը միավորում է ստարթափների հիմնադիրներին, փորձառու մենթորներին, տարբեր ոլորտների մասնագետներին և ներդրումային կազմակերպությունների ներկայացուցիչներին մեկ հարթակում։
Մեծ ոգևորությամբ նշում ենք, որ Sevan Startup Summit-ին այս տարի ևս մասնակցեց staff.am-ի և Hirebee-ի համահիմնադիր Լուիզա Ավետիսյանը։
Sevan Startup Summit-ի հետ staff.am-ի համագործակցության պատմությունը սկսվում է դեռևս 2017 թվականից, երբ այն մեկն էր մասնակից ստարթափներից։ Իսկ այսօր արդեն staff.am-ի և Hirebee-ի համահիմնադիր Լուիզա Ավետիսյանը մենթորությունների (Mentoring), աշխատարանների (Workshop) և խարույկի շուրջ մտերմիկ քննարկումների (Campfire Talk) ընթացքում ինքն է կիսվում իր գիտելիքով և փորձառությամբ։ Նշենք, որ անցած տարի ևս Լուիզան հանդես էր եկել որպես խոսնակ և մասնակիցների հետ կիսվել իր ասելիքով։
Ունենալով բազմամյա փորձ՝ Լուիզան մենթորության ծրագրի շրջանակում ուղղորդեց տարբեր ստարթափների, կիսվեց իր գիտելիքով և պատասխանեց նրանց հարցերին։
Լուիզան հանդես եկավ նաև լայն լսարանի առջև, ներկայացրեց իր անցած մարտահրավերներով լի ճանապարհը, ինչը շատ կարևոր է իրենց ստարթափներով այդ ճանապարհը նոր սկսողների համար։ Նա խոսեց ստարթափներում թիմերի կազմավորման նրբությունների մասին, կիսվեց իր խորհուրդներով և փորձով։
Իսկ երեկոյան բիզնես քննարկումները շարունակվեցին խարույկի ջերմության ներքո՝ ավելի անմիջական և մտերմիկ տրամադրությամբ։
Արդյունքում՝ ստացվեց մեկ ուսումնառատ և գերհագեցած օր։
Չորս պատերից այն կողմ, առանց փողկապների և առանց սև ու սպիտակ համազգեստի այս ոչ ստանդարտ բիզնես ֆորումը վստահաբար շատերը կհիշեն որպես նոր գիտելիքի և փորձառության, գործնական նոր կապերի և հաճելի էմոցիաների շաբաթ։ Իսկ ոմանց համար այն բեկումնային իրադարձություն էր, քանի որ հնարավորություն ընձեռեց տեղափոխելու իրենց ստարթափը հաջորդ մակարդակ։
Ամփոփելով նշենք, որ նման միջոցառումները իրոք մեծ նշանակություն ունեն հայաստանյան ստարթափ էկոհամակարգը զարգացնելու գործում։ Հուսանք, որ Sevan Startup Summit-ի մասին դեռ շատ ենք լսելու, և դեռ շատ ու շատ ստարթափներ գտնելու են իրենց ներդրողներին և Հայաստանը էլ ավելի լսելի են դարձնելու միջազգային շուկայում։
