Մայիսի 15-ին staff.am-ի նախաձեռնած HR meetup-ը մեկտեղեց HR ոլորտի մասնագետներին՝ այս անգամ Coca-Cola HBC Armenia-ի «երջանկության գործարանում»։ Քննարկման առանցքում էին ՄՌԿ (HR) ոլորտի մարտահրավերները տեղական և միջազգային կազմակերպություններում։
HR համայնքի ներկայացուցիչները հյուրընկալվեցին միջազգային լավագույն պրակտիկաներ որդեգրած Coca-Cola HBC Armenia ընկերությունում։ Միջոցառման առաջին հատվածը մեկնարկեց ոչ ֆորմալ և հետաքրքիր մթնոլորտում՝ շրջայցով ընկերության այցելուների կենտրոնում, որտեղ մասնակիցները ծանոթացան իրենց սիրելի ըմպելիքի ստեղծման պատմությանը՝ գաղափարից մինչև արտադրություն։ Այստեղ մասնակիցները ծանոթացան նաև բրենդի կայացման պատմությանը և ընկերության կորպորատիվ սոցիալական պատասխանատվության ծրագրերին՝ տեսնելով ընկերության գործունեության մեծ պատկերը՝ մարդկային, բովանդակային և արժեքային մակարդակներում։
Meetup-ի երկրորդ հատվածը մեկնարկեց Coca-Cola HBC Armenia-ի Մարդկային ռեսուրսների կառավարման բաժնի տնօրեն Նելլի Փուրթոյանի ողջույնի խոսքով։ Նա շնորհակալություն հայտնեց staff.am-ին համագործակցության և նման հարթակ ստեղծելու համար՝ շեշտելով նման նախաձեռնությունների կարևոր դերը Հայաստանում նոր ՄՌ մշակույթի ձևավորման և համայնքի զարգացման գործում։ Այնուհետև նա ներկայացրեց ընկերության HR բաժնի կառուցվածքն ու թիմակիցներին՝ կիսվելով կազմակերպության ներքին աշխատանքի և զարգացման որոշ սկզբունքներով։
staff.am-ի համահիմնադիր Լուիզա Ավետիսյանը ևս ողջունեց մասնակիցներին, շնորհակալություն հայտնելով Coca-Cola HBC Armenia-ին ջերմ ընդունելության համար։ Լուիզան նաև ներկայացրեց staff.am-ի առաջիկա նախաձեռնությունները՝ ընդգծելով, որ նման հանդիպումները ոչ միայն հարթակ են գաղափարների փոխանակման, այլև համագործակցությունների ամրապնդման համար։
Հանդիպման առանցքային թեման
Հանդիպման հիմնական թեման վերաբերում էր HR ոլորտում առկա մարտահրավերներին՝ դիտարկելով դրանք տեղական և միջազգային ընկերությունների տեսանկյունից։ Մասնակիցներն ակտիվ քննարկեցին երկու տեսակի կազմակերպությունների առավելություններն ու թերությունները։
Քննարկման ընթացքում մասնակիցներն անդրադարձան այն տարբերություններին, որոնք ի հայտ են գալիս ՄՌԿ տեսանկյունից՝ համեմատելով միջազգային և տեղական կազմակերպությունների աշխատանքային միջավայրերը։
Իրավական հստակությունը, ընդգծված կառուցվածքային մոտեցումները և միջազգային փորձի ներառումը միջազգային ընկերություններին դարձնում են մարդկային ռեսուրսների կառավարման ոլորտում կայուն և համակարգված համակարգերի օրինակներ։ Այս կազմակերպություններում աշխատանքային գործընթացները ընթանում են հստակ սահմանված կանոնների, պատասխանատվության մակարդակների և ընթացակարգերի շրջանակներում՝ նվազեցնելով ռիսկերն ու ապահովելով կանխատեսելիություն։ HR գործառույթները հիմնված են գլոբալ ստանդարտների վրա՝ հնարավորություն ընձեռելով կիրառել ժամանակակից գործիքներ և լավագույն պրակտիկաներ։
Այնուամենայնիվ, նման համակարգվածությունը հաճախ նաև մարտահրավերներ է ստեղծում։ Մասնակիցները նշում էին, որ բազմաթիվ ռազմավարական որոշումներ և նախագծեր ընկերություններին փոխանցվում են գլոբալ կենտրոններից՝ արդեն պատրաստի տեսքով, ինչը սահմանափակում է տեղական նախաձեռնությունների դերը։ Որոշումների կայացումը պահանջում է երկարաժամկետ հաստատման փուլեր և վերադաս կառույցների ներգրավվածություն, ինչն էլ խոչընդոտում է օպերատիվ արձագանքման հնարավորությունները՝ հատկապես փոփոխվող և դինամիկ միջավայրերում։
Ի տարբերություն դրա, տեղական կազմակերպություններն աչքի են ընկնում իրենց մեծ ճկունությամբ և շուկայի պահանջներին ավելի արագ արձագանքելու կարողությամբ։ Նրանց առավելություններից է նաև նորարար գաղափարներ և լուծումներ փորձարկելու ազատությունը՝ առանց գլոբալ սահմանափակումների և բարդ հաստատման շղթաների։
Մասնակիցներն ընդգծում էին, որ հենց այդ բաց կառուցվածքը և ազատությունը հաճախ կարող է վերածվել ուժեղ կողմի։ Այն հնարավորություն է տալիս ճկուն կերպով ձևավորել ռազմավարություններ՝ հարմարեցված կոնկրետ բիզնես միջավայրի առանձնահատկություններին և աշխատաշուկայի տեղական պահանջներին։
Այս համեմատական քննարկումն ընդգծեց, որ ինչպես միջազգային, այնպես էլ տեղական կազմակերպություններն ունեն յուրահատուկ ուժեղ և բարելավման ենթակա կողմեր, և որ HR մասնագետների գործն է առավելագույնս արդյունավետ համադրել երկու մոտեցումները՝ ստեղծելով հարմարվող, ժամանակակից և մարդակենտրոն միջավայր։
Մասնակիցներն առաջարկեցին լուծումներ՝ սկսած մասնագիտական կողմնորոշման ծրագրերից և համագործակցային կրթական դասընթացներից մինչև ոլորտային ակադեմիաների ստեղծում՝ աշխատաշուկայի պահանջներին համապատասխան մասնագետներ պատրաստելու համար։
Միջոցառման պաշտոնական մասից հետո մասնակիցներին սպասում էր ոչ պակաս հետաքրքիր հատված՝ նեթվորքինգը և Coca-Cola HBC Armenia-ի համեղ հյուրասիրությունը, որի ընթացքում մասնակիցները հնարավորություն ունեցան ոչ ֆորմալ մթնոլորտում շարունակելու իրենց մասնագիտական շփումները։
Այս ընթացքում հնչեցին նոր գաղափարներ, ծավալվեցին խորքային քննարկումներ և ձևավորվեցին նոր կապեր՝ հիմնված փոխադարձ հետաքրքրությունների, ընդհանուր մասնագիտական մարտահրավերների և համագործակցության հնարավորությունների վրա։ Այս անկաշկանդ մթնոլորտում զրույցները ստացվեցին առավել անկեղծ ու բովանդակալից՝ նպաստելով ոչ միայն մասնագիտական մտքերի փոխանակմանը, այլև HR համայնքի ամրապնդմանը։
staff.am-ի HR meetup-ները շարունակում են զարգանալ որպես համայնքի ամրապնդման, փորձի փոխանակման և նոր բիզնես համագործակցությունների խթանման կարևոր նախաձեռնություն։
Միացեք մեզ դառնալու այն փոփոխության շարժիչ ուժը, որն ուղղված է մարդկային ռեսուրսների կառավարման արդյունավետ, մարդակենտրոն և ստեղծագործ մոդելի ձևավորմանը։
