Staff.am-ը, հավատարիմ մնալով իր առաքելությանը, շարունակում է ստեղծել հարթակներ հետաքրքիր զրույցների, փորձի փոխանակման և նոր կապերի ձևավորման համար։
Մարտի 7-ին HakTech-ի հյուրընկալ գրասենյակում տեղի ունեցավ staff.am-ի հերթական HR Meetup-ը, որը համախմբեց Հայաստանի առաջատար ընկերությունների HR մասնագետներին։ Հանդիպման նպատակն էր քննարկել տեխնոլոգիական ոլորտի թիմերում աշխատանքի ընթացքում առաջացող մշակութային առանձնահատկությունները, դրանցից բխող մարտահրավերներն ու լուծումների լավագույն փորձը։
Երեկոն մեկնարկեց staff.am և Hirebee համահիմնադիր, CEO Լուիզա Ավետիսյանի և HackTech ընկերության մարդկային ռեսուրսների կառավարման ղեկավար Հասմիկ Մովսիսյանի ողջույնի խոսքով։
Լուիզա Ավետիսյանն իր խոսքում շեշտեց տարբեր մշակույթների ներդաշնակ համադրման անհրաժեշտությունը արդյունավետ համագործակցություն ստեղծելու գործում՝ հատկապես տեխնոլոգիական դինամիկ ոլորտում։
HakTech-ի մարդկային ռեսուրսների կառավարման ղեկավար Հասմիկ Մովսիսյանն իր հերթին համառոտ անդրադարձավ ՏՏ ոլորտի տարբեր տարածաշրջանների թիմերում նկատվող մշակութային առանձնահատկություններին՝ հատուկ ուշադրություն դարձնելով հայկական թիմերի յուրահատկություններին։
Այնուհետև ներկայացան միջոցառման մասնակիցները՝ կիսվելով այն հիմնական մշակութային մարտահրավերներով, որոնց հետ բախվել են միջազգային թիմերի հետ աշխատելիս:
Հանդիպման հիմնական թեմաները
Հանդիպման հիմնական հատվածը կազմված էր հինգ թեմատիկ քննարկումներից, որոնց ընթացքում մասնակիցները կիսվեցին իրենց իրական փորձով և հաջողված լուծումներով։
- Մշակութային տարբերություններ և դրանց ազդեցությունը – Մասնակիցները շեշտեցին ներառական կորպորատիվ մշակույթի ձևավորման կարևորությունը, որն օգտագործում է մշակութային տարբերությունները որպես ռեսուրս և ապահովում է թիմի կայունությունը:
- Հաղորդակցման և աշխատանքային ոճերի բազմազանություն – Երկրորդ թեման վերաբերում էր հաղորդակցման տարբեր ձևերին տարբեր մշակույթներում։ Քննարկվեց, թե ինչպես նույն իրավիճակների ընկալումը կարող է տարբերվել՝ կախված մշակութային համատեքստից, և ինչ գործիքներով կարելի է հաղթահարել լեզվական և մշակութային պատնեշները, նաև, թե ինչպես կարելի է օգտագործել այս բազմազանությունը՝ նորարարական մոտեցումներ մշակելու և թիմում ստեղծագործական մտքի խթանման համար։
- Աշխատանքային ակնկալիքներ և կոնֆլիկտների լուծում – Հատուկ ուշադրություն դարձվեց կոնֆլիկտների կառավարմանը՝ հաշվի առնելով մշակութային տարբերությունները։ Մասնակիցները կիսվեցին իրենց փորձով, թե ինչպես են հաջողությամբ լուծում աշխատանքային ակնկալիքների անհամապատասխանությունից բխող մարտահրավերները կիրառելով միջմշակութային հաղորդակցման գործիքներ։
- Գործատուի բրենդավորումը աութսորսինգ թիմերում – Հանդիպման մասնակիցները քննարկեցին, թե ինչպես կարող են հայկական աութսորսինգային թիմերը կառուցել ուժեղ գործատուի բրենդ՝ ներգրավելով տեղական տաղանդներ: Նշվեց, որ ընկերության մշակույթը վճռորոշ դեր է խաղում՝ դիրքավորվելու որպես վստահելի գլոբալ գործընկեր:
Ամփոփենք
Այս միջոցառումը դարձավ կարևոր հարթակ բաց քննարկումների, փորձի փոխանակման և նոր մասնագիտական կապերի ստեղծման համար։
Քննարկումների ամփոփման ընթացքում տպավորիչ էր տեսնել, թե որքան տարբեր, բայց միևնույն ժամանակ նման էին մասնակիցների փորձառությունները: Բոլորին միավորում էր ընդհանուր նպատակը՝ ձևավորել վստահության, փոխադարձ հարգանքի և բաց հաղորդակցության վրա հիմնված արդյունավետ թիմեր: Դե իսկ HackTech-ի ջերմ հյուրընկալությունն ու հատուկ կազմակերպված հյուրասիրությունը ապահովեցին անմիջական և մտերմիկ միջավայր, որտեղ մասնակիցները հնարավորություն ունեցան ոչ միայն շարունակելու մասնագիտական քննարկումները, այլև ձևավորելու նոր կապեր և համագործակցություններ՝ ավելի ազատ և անկաշկանդ մթնոլորտում, որի մասին փաստում են լուսանկարները։
Իսկ մենք մեծ ուրախությամբ փաստում ենք, որ staff.am-ի հաջորդ HR meetup-ը սպասեցնել չի տա։ Եթե դուք էլ եք ցանկանում մասը կազմել հաջորդ HR meetup-ի և staff.am-ի մյուս միջոցառումների, ապա շտապեք համալրել մեր գործընկերների շարքը։
