Staff.am-ը մեկնարկում է նոր համագործակցություն Հայաստանի Ամերիկյան Համալսարանի ( ՀԱՀ ) Գործարարության և Տնտեսագիտության ֆակուլտետի (ԳՏՖ) հետ՝ նպատակ ունենալով մի կողմից զարգացնել ուսանողական ներուժի մասնակցությունը գործնական խնդիրներում, իսկ մյուս կողմից ներգրավել ՀԱՀ գիտուժը աշխատաշուկայի վերաբերյալ լայնածավալ հետազոտություններ իրականացնելու գործում։
staff.am-ի հիմնադրումից ի վեր մենք անչափ կարևորել ենք Հայաստանում կրթական հաստատությունների կարիերայի կենտրոնների հետ համագործակցությունը։ Շուրջ 4 տարի առաջ
ՀԱՀ Շրջանավարտների և կարիերայի զարգացման գրասենյակի (Alumni and Career Development Office – ACDO) հետ համագործակցության արդյունքում ՀԱՀ ուսանողներին ներգրավել ենք մեր ընկերության աշխատանքներում, նպաստելով աշխատաշուկայի պահանջներին համապատասխան մասնագետների ձևավորմանը՝ այսպիսով ապահովելով գործատու – ուսանող կապը։ Այժմ էլ նրանք աշխատում են Հայաստանի առաջատար կազմակերպություններում,- ՀԱՀ-ի հետ համագործակցության ձևաչափերի մասին մեզ պատմեց staff.am և HireBee համահիմնադիր և ղեկավար Վահե Ավետիսյանը։
Նոր համագործակցությունը, որի համար հատուկ հուշագիր կնքվեց staff.am-ի և Հայաստանի Ամերիկյան Համալսարանի միջև, բոլորովին այլ հարթություն կտեղափոխի հնարավորությունները։ Եվ այսօր ուրախ ենք հարցազրույց ունենալ ՀԱՀ Գործարարության և Տնտեսագիտության ֆակուլտետի դեկան պրն․ Գաբրիելյանի և ՀՀ աշխատաշուկայի վերլուծության հետազոտական թիմի հետ։
Պրն․ Գաբրիելյան, շատ հաճելի է հյուրընկալվել Հայաստանի Ամերիկյան Համալսարանում և նման կարևոր թեմայի շուրջ Ձեզ հետ քննարկում ունենալ։
Նախ, փոքր-ինչ խոսենք Հայաստանի Ամերիկյան Համալսարանի Գործարարության և Տնտեսագիտության ֆակուլտետի հիմնական առաքելության մասին։ Ինչպես նաև ի՞նչ նախագծերով է այն առանձնանում թե համալսարանական, թե արտահամալսարանական շրջանակներում։
Մեր առաքելությունը գլոբալ առումով, եթե կարճ ձևակերպեմ, դա որակյալ կրթությունն է և այնպիսի կադրերի պատրաստումը, որոնք կարող են փոփոխություն իրականացնել կյանքում, Հայաստանի տնտեսությունում, հասարակական կյանքում: Եթե անդրադառնանք այն հարցին, թե մենք ինչ ենք ուզում բիզնեսի և գործարարության քոլեջում, ապա մենք ուզում ենք, որ մեր ուսանողներն ունենան ամենաժամանակակից կրթությունը և այդ կրթությունը հնարավորություն ընձեռի նրանց ոչ միայն ընդունել գիտելիքների որոշակի պաշար, այլև ունենալ դրանց քննադատաբար վերաբերելու և ամենակարևորը՝ գործնականում կիրառելու կարողություն։ Մենք շատ կարևորում ենք, որ մեր ուսանողներն ուսման ընթացքում հնարավորություն ունենան շփվելու գործատուների և կառույցների հետ, որտեղ հետագայում աշխատանք են ստանալու։ Եվ դա արվում է մի շարք ուղղություններով՝ ոչ միայն փորձնակության ծրագրերի միջոցով, այլև՝ նրանց ընդգրկելով առարկայական խնդիրներում։ Եթե դուք ուշադրություն դարձնեք, մեր կայքում զետեղված է տեղեկատվություն այն ծրագրերի մասին, որոնք իրական ժամանակում իրական ընկերությունների համար արել են մեր ուսանողները։
Այսպիսով, գերժամանակակից գիտելիքների տրամադրումը, արդի մեթոդների կիրառումը, ծրագրային ապահովումը մեր առաջնահերթություններից են։
staff.am կարիերայի հարթակի հետ համագործակցությունն ի՞նչ ուղղություններ է ներառում և ի՞նչ նոր հնարավորություններ կընձեռի ՀԱՀ-ին և ՀԱՀ ուսանողներին։
Առաջին հերթին, մենք բաց ենք համագործակցությունների համար և staff.am-ի հետ համագործակցությունը ներառվում է հայկական կառույցների հետ գործընկերության շրջանակների մեջ։ Երկրորդը, staff.am-ը բացի ստարթափ լինելուց, որը նաև մենք խրախուսում ենք մեր ուսանողներին մտածելու լայն և ձեռնարկատիրական առումով, ունի ինստիտուցիոնալ ներկայություն, այսինքն` ընկերությունը ոչ միայն կոնկրետ ծառայություններ է մատուցում, այլև վերլուծական տեղեկատվություն է ձևավորում ընդհանուր շուկայի վերաբերյալ և սպասարկում ինդուստրիային։ Այս առումով մենք հնարավորություն ենք ունենում շփվելու տեսանկյունից ավելի լայն պատկերի հետ հարաբերվել, քան եթե կենտրոնանայինք կոնկրետ լոկալ գործառնություն իրականացնող ընկերությունների վրա։ Մենք կարծում ենք, որ փոխադարձաբար կարող ենք օգտակար լինել, թե՛ վերլուծություններով, որովհետև մեր դասախոսներն ունեն եզակի հմտություններ՝ վերլուծական գործիքների շնորհիվ վերհանելու որոշակի օրինաչափություններ, թե՛ ուսանողների ներգրավվածությամբ, որոնք աշխատելով այդ նախագծերի վրա, կարող են աճել շատ ավելի արագ և կարող են նաև լինել շատ ավելի պատրաստ աշխատանքի շուկային։
Համագործակցությունը ենթադրում է նաև ԳՏՖ-ի կողմից նախատեսվող Աշխատաշուկայի հետազոտման կենտրոնի աշխատանքներին staff.am-ի աջակցություն։ Կներկայացնե՞ք, ի՞նչ գործառույթներ է իրականացնելու Աշխատաշուկայի հետազոտման կենտրոնն ու ի՞նչ բնույթի հետազոտություններ են թողարկվելու։
Մենք դեռևս նախագծման փուլում ենք, բայց չափազանց կարևորում ենք աշխատուժի հմտությունների բացի վերհանումը։ Մենք ունենք աշխատաշուկա, կա առաջարկ, պահանջարկ, և շատ հաճախ առաջարկի և պահանջարկի խզումը տեղի է ունենում հմտությունների բացակայության, կամ հմտությունների փոքր-ինչ բացակայության, կամ ամբողջովին չհամընկնելու պատճառով։ Մեր խնդիրը նա է, որ մենք վերհանենք այդ բացերը, թե՛ մակրոտնտեսական, թե՛ կոնկրետ կառավարման և գործարարական մենեջմենթի տեսանկյունից, և հնարավորինս վերլուծական նյութերով կարողանանք ավելի լավ կրթություն առաջարկել, որը երկարաժամկետ առումով այդ բացերին կանդրադառնա, ինչպես նաև հասկանանք ինչպիսին է իրավիճակը, ինչքանով է դա խոչընդոտում տնտեսության զարգացմանը։
Եվ վերջում ամփոփենք․ ի՞նչ ակնկալիքներ ունի այսօրվա ուսանողն աշխատաշուկայից։
Մեր ուսանողն աշխատաշուկայից ունի հետևյալ սպասումը։ Բավարար չէ, որպեսզի աշխատանքը լինի լավ վարձատրվող, այն պետք է լինի նաև խթանող ու հետաքրքիր և աճելու հնարավորություն տա։ Եվ մենք պետք է հասկանանք, որ ինֆորմացիոն խոսքերով գերհագեցած նոր սերունդը՝ այժմյան ուսանողներն, ունեն այլ պահանջներ աշխատանքի հնարավորությունների վերաբերյալ։ Շատ հաճախ հարցերին նայում են շատ ավելի գլոբալ կերպով, քան նախորդ սերունդները, որովհետև ապրում են և մեծացել են փոխկապակցված հոսքերով լեցուն, ինֆորմացիոն հոսքերով լեցուն աշխարհում։
Նշենք, որ staff.am-ի հետ համագործակցության շրջանակներում Հայաստանի Ամերիկյան Համալսարանի հետազոտական թիմն արդեն իրականացրել է ՀՀ աշխատաշուկայի վիճակագրական վերլուծություն՝ փորձելով վերհանել համաճարակի և պատերազմի ազդեցությունն աշխատաշուկայի տարբեր ոլորտների վրա։
Համաձայն աշխատաշուկայի ուսումնասիրության՝ համավարակը բացասաբար է ազդել տնտեսության բոլոր ոլորտների վրա: Մասնավորապես, բոլոր ոլորտները ներկայացնող ընկերություններն ավելի սակավ աշխատանքի հայտարարություններ են տեղադրել staff.am հարթակում: Առավել քիչ տուժած ոլորտներն են` «Ծրագրավորումը» և «ՏՏ ոլորտի այլ ենթաոլորտները»: Համաճարակով պայմանավորված անկումից հետո որոշ ոլորտներում արձանագրվել է հայտարարությունների թվի աճ: Վերը նշված երկու ոլորտներում աճը հանգեցրել է ոչ միայն մինչհամաճարակային հայտարարությունների թվի վերականգնման, այլ նաև թիվը գերազանցել է մինչհամաճարակային մակարդակը: Բանկային ոլորտն անկումից հետո շարունակում է պահպանել հայտարարությունների թվի նույն հետհամաճարակային մակարդակը: Վաճառքի և մարքեթինգի ոլորտները համաճարակի պատճառով ևս անկում են գրանցել, և հետհամաճարակային շրջանում պարբերաբար տատանումներ են գրանցում, սակայն տատանումների ընթացքում երբևէ չեն հասել մինչհամաճարակային մակարդակներին, – հետազոտության եզրակացությամբ մեզ հետ կիսվեց Արհեստական բանականության և տվյալագիտության փորձագետ Հրանտ Դավթյանը։
Աշխատաշուկայի փորձագետ, ՀԱՀ դասախոս Վարդան Բաղդասարյանը հավելեց.
Համաճարակի և պատերազմի ներգործությունը աշխատաշուկայի ակտիվության վրա համանման է եղել, թե՛ ազդեցության չափի, թե՛ վերականգնման չափի տեսանկյուններից։ Այս ցուցանիշներն էլ բավականին արդյունավետ գործիք կարող են լինել երկրի տնտեսական ակտիվության ցուցանիշը նախապես կանխատեսելու համար, ինչպես օրինակ՝ ԱՄՆ-ում նման ցուցանիշներն անվանում են leading indicator-ներ, այսինքն` աշխատաշուկայի տվյալների հիման վրա տնտեսական ակտիվությունն են կանխատեսում։
Շնորհակալություն ենք հայտնում հարցազրույցի և մեր լսարանի հետ ՀՀ աշխատաշուկայի ակտիվության վիճակագրությամբ կիսվելու համար։
Շատ շուտով ձեզ կներկայացնենք նաև ուսումնասիրության ծավալուն և համընդգրկուն տարբերակը, որտեղ թվային ցուցանիշներով կծանոթանաք 2020թ․-ին ՀՀ աշխատաշուկայի տենդենցներին։ Վստահ ենք, որ այս համագործակցությունը երկկողմանի արդյունավետ կլինի աշխատաշուկայի և պահանջարկին համապատասխան մասնագետների պատրաստման ու զարգացման տեսանկյունից։
