Staff.am-ի թիմի կողմից ստեղծված HireBee.ai ստարթափն ընտրվել է որպես UC Berkeley SkyDeck ծրագրի մասնակից

667

Այս օրերին յուրաքանչյուրս մեր գործով՝ ստարթափ, թե արդեն կայացած բիզնես, պետք է նոր դիրքեր գրավենք՝ կլինի Հայաստանի սահմաններից դուրս, թե Հայաստանում։ Այս հաղթարշավով միայն կարող ենք հաստատուն կանգնել մեր հայրենի հողի վրա ու աշխարհին ցույց տալ ոչ միայն մեր բազկի զորությունը, այլ նաև մտքի։

Եվ այժմ կարևորում ենք ձեզ հետ կիսվել մեր հայկական՝ staff.am ստարթափի նոր հաջողության մասին։

staff.am մեր թիմն ընդգրկվել է Սիլիկոնյան հովտում մեծ ճանաչում ունեցող UC Berkeley SkyDeck ծրագրի մասնակիցների շարքում՝ ներկայացնելով արհեստական բանականությամբ աշխատող HireBee.ai HRTech պրոդուկտը։ Միևնույն ժամանակ, աշխատելով շուրջ 3000 միջազգային և տեղական ընկերությունների հետ, մենք արդեն քայլեր ենք ձեռնարկում համաշխարհային շուկա դուրս գալու համար։

staff.am-ը թողարկվել է Հայաստանում 2016 թվականի վերջին, 2019 թվականի մարտին ստարթափը բացեց իր ղազախական, ապա Կենտրոնական Ասիայի ներկայացուցչությունները, իսկ 2020թ․ ներկայացավ լիովին նոր պրոդուկտով՝ դիմումների կառավարման և հավաքագրման լիարժեք համակարգով։

«SkyDeck-ը ձեռնարկատիրության և ստարթափների զարգացման եզակի գլոբալ կենտրոն է Կալիֆորնիայի Բերկլի համալսարանում։ Ծրագրի շրջանակներում ստարթափները ձեռք են բերում պրակտիկ մենթորության, անփոխարինելի փորձի հնարավորություն, հասանելիություն են ստանում գիտահետազոտական լավագույն համալսարաններից մեկին և Սիլիկոնյան հովտի բիզնես համայնքի հսկայածավալ ռեսուրսներին՝ ներառյալ ներդրումներ, հետազոտական լաբորատորիաներից օգտվելու և համալսարանում ստարթափի զարգացման վրա աշխատելու հնարավորություն», – նշեց HireBee համահիմնադիր Վահե Ավետիսյանը։ 

Դեռևս ամռանը, հայտարարեցինք staff.am-ի կողմից ևս մեկ պրոդուկտի թողարկման մասին՝ HireBee.ai-ը SaaS պրոդուկտի, որը նախատեսված է HR մասնագետների և ռեքրութերների համար։ Համակարգը խնայում է թեկնածուների որոնման և կառավարման վրա ծախսվող ժամանակի 40%-ը՝ ամբողջությամբ ավտոմատացնելով մեխանիկական գործընթացները և իրականացնելով թեկնածուների սքրինինգ արհեստական բանականության ալգորիթմների միջոցով։

«HR ոլորտում մի շարք խնդիրների լուծման համար արհեստական բանականությունը լայնորեն կիրառություն ունի», – նշեց տեխնիկական գիտությունների թեկնածու, HireBee համահիմնադիր Լուիզա Ավետիսյանը։ «Մեր թիմն արդեն ավելի քան 2 տարի զբաղվում է մեծ տվյալների և մեքենայական ուսուցման ոլորտում սեփական մշակումներով։ SkyDeck նորարարական ծրագրին մասնակցությունը թույլ կտա մեզ լիարժեք իրացնել մեր ներուժն ու հնարավորությունները և արմատապես փոխել ստարթափի զարգացման ընթացքը»։

«HireBee.ai-ն արդեն հաջողությամբ ներդրվում է հայկական և այլ շուկաներում: Շատ ոգևորող է, երբ տեսնում ես, որ ընկերությունները գնահատում են նման համակարգի առավելությունները», նշեց HireBee հայկական գրասենյակի տնօրեն Նազելի Բադալյանը։ «Մեր պրոդուկտը եզակի է և ունի բավականին շատ առավելություններ, իսկ Սիլիկոնյան հովտում գլոբալ նորարարական կենտրոնի մասը դառնալու հնարավորությունն այն բոլորովին նոր մակարդակ կտեղափոխի՝ հնարավորություն տալով աշխատել գլոբալ հաճախորդների հետ»։

Ստարթափների համար նախատեսված այս ծրագիրը մեկնարկել է 2020թ․-ի հոկտեմբերի 26-ին և կտևի 6 ամիս, որից հետո HireBee.ai պրոդուկտը լիովին պատրաստ կլինի գլոբալ շուկա արտահանելու համար։

ՀԱՂԹԵԼՈՒ ԵՆՔ!