Ինչպես գիտեք staff.am-ի առաքելությունն է մարդկանց երջանիկ տեսնելը, երբ նրանք գտնում են սիրած աշխատանք կամ տաղանդավոր աշխատակից։ Այդ առաքելությամբ և մեծ ոգևորվածությամբ մենք ապրիլի 21-ին այցելեցինք Վանաձորի տեխնոլոգիական կենտրոն հանդիպելու Լոռու մարզի երիտասարդների հետ, ովքեր հետաքրքրված են իրենց կարիերայի զարգացմամբ և փորձում են գտնել իրենց ցանկալի աշխատանքը։
Դեռևս ժամանակ կար հանդիպման մեկնարկին, իսկ երիտասարդների հոսքը, ակտիվությունը, Վանաձորի տեխնոլոգիական կենտրոնի կառավարման անձնակազմի ջերմ ընդունելությունն ու կենտրոնի վառ ինտերիերն արդեն իսկ հաջողված հանդիպում էին խոստանում 🙂 :
Կարելի է ասել, որ հանդիպումը կազմակերպված էր «քննարկում-խորհրդատվություն» ձևաչափով։ Նախ, մասնակիցներին ներկայացվեց staff.am աշխատանքի նոր հարթակն իր բոլոր առավելություններով և գործիքներով․ թե ինչպես կարող են աշխատանք փնտրողները գրանցվել հարթակում, լրացնել իրենց օնլայն CV-ն հատուկ ֆորմատով և դիմել մարզերում ու Երևանում առկա թափուր աշխատատեղերին մեկ click-ով։
Մարզի երիտասարդներին մանրամասն ներկայացվեցին այնպիսի պրակտիկ հմտություններ, ինչպես, օրինակ․
Ինչպե՞ս գրել ուղեկցող նամակ (cover letter) անմիջապես հարցազրույցի հրավիրվելու համար
Ինչպե՞ս պետք է ներկայանալ գործատուներին աշխատանքային հարցազրուցի ժամանակ՝ խուսափելով կրկնել ամենատարածված սխալները
Ինչպես սոց․ ցանցերի միջոցով ստեղծել սեփական բրենդ և առաջին անգամ մուտք գործել աշխատաշուկա
staff.am-ն այս անգամ նույնպես առանձնացավ իր նորույթով, որին մեծ անհամբերությամբ սպասում էին երիտասարդները։ Կազմակերպվեց անհատական հանդիպում այն երիտասարդների համար, ովքեր ցանկանում էին ստանալ խորհրդատվություն իրենց CV-ների վերաբերյալ։
Հանդիպում-քննարկումը տևեց ավելի քան 2 ժամ, որից հետո շրջագայություն կազմակերպեցինք և ծանոթացանք կենտրոնի պատմությանը։
Շնորհակալություն ենք հայտնում Վանաձորի տեխնոլոգիական կենտրոնի Բիզնես մենեջեր Պատվական Հախինյանին և Հանրային կապերի պատասխանատու Նոռա Մինասյանին նման հաճելի հյուրընկալության համար։
Բավականին տպավորված էինք երիտասարդների ակտիվությամբ և ուրախ, որ նման հանդիպումների շրջանակում կիսվում ենք օգտակար խորհուրդներով։
