Հոկտեմբերի 26-ին Մերիդիան Էքսպո Կենտրոնում անցկացվեց Skill ընկերության կողմից կազմակերպված Career City Fest 2K23-ը․ 80 ընկերություն, 1500 մասնակից, պանելային քննարկումներ 15 խոսնակի կողմից, բազմաթիվ թափուր աշխատատեղեր, կրթական ծրագրեր ու մասնագիտական քննարկումներ, որոնց նպատակն էր աջակցել արցախահայերին` աշխատանք գտնելու հարցում։
Այս տարվա արտահերթ Career City Fest-ին իր մասնակցությունն ունեցավ նաև staff.am-ն առանձին տաղավարով, ինչպես նաև կազմակերպված կոնֆերանսին որպես խոսնակ ելույթ ունեցավ staff.am և Hirebee.ai համահիմնադիր Լուիզա Ավետիսյանը՝ «Ինչպե՞ս ներկայանալ ՀՀ աշխատաշուկայում» թեմայով, ծանոթացնելով այն հիմնական գաղափարներին, որոնք կօգնեն կարիերայի նոր հնարավորություններ փնտրողներին կողմնորոշվել ՀՀ աշխատաշուկայում։ Ներկայացվեց նաև staff.am-ի կողմից թողարկված միասնական աշխատանքային հարթակը՝ www.staff.am/artsakh/, որտեղ ՀՀ գործատուները հրապարակում են աշխատանքի հնարավորությունները մեր հայրենակիցների համար։
Ելույթի ընթացքում անդրադարձ կատարվեց նաև հոկտեմբերի 25-ին staff.am-ի կողմից անցկացված օնլայն վեբինարին, որի նպատակն էր օգնել Արցախից բռնի տեղահանված և ՀՀ-ում աշխատանք փնտրող մեր հայրենակիցներին։ Վեբինարի ընթացքում քննարկվեցին մի շարք կարևոր հարցեր, այդ թվում՝ ինչպե՞ս ստեղծել մրցունակ CV և ուղեկցող նամակ, ինչպե՞ս նախապատրաստվել հարցազրույցներին և ինչպես մուտք գործել ՀՀ աշխատաշուկա։
staff.am-ը մշտապես ներկայանում է տարբեր ծրագրերով, որոնք նպատակ ունեն օգնելու աշխատանքի նոր հնարավորություններ փնտրողներին, իսկ Career City Fest-ն այս անգամ ստեղծեց հնարավորություն արցախահայերի համար՝ ծանոթանալու ՀՀ աշխատաշուկային, մասնակից ընկերությունների աշխատանքի առաջարկներին և մասնագիտական նոր հմտություններ սովորելու հնարավորություններին։
