staff.am բացառիկ հարցազրույցը Benivo հիմնադիր և տնօրեն Նիցան Յուդանի հետ

1086

staff.am-ում բացառիկ ավանդույթները շարունակվում են։ Այս անգամ «staff.am բացառիկ հարցազրույցներ» նախագծի շրջանակներում staff.am համահիմնադիր Լուիզա Ավետիսյանը հատուկ հարցազրույց է ունեցել Benivo հիմնադիր և տնօրեն Նիցան Յուդանի հետ՝ խոսելով նոր ներդրման ներգրավման, հայաստանյան թիմի, հայերի տեխնոլոգիական ներուժի ու աճի պլանների մասին։


Ողջույն, Նիցան, շնորհակալություն հրավերն ընդունելու համար։ Կկիսվե՞ք այն պատմությամբ, որն ընկած է Benivo-ի հաջողության ետևում։

«Երբ հիմնեցի ընկերությունը, այն շատ էր տարբերվում մեր նեկայիս բիզնեսից։ Սկզբում ես պատկերացում չունեի, որ ապագայում զբաղվելու եմ HR ոլորտում տեխնոլոգիաների ստեղծմամբ։

Benivo-ն սկիզբ է առել վեբկայքից, որը շատ նման էր Airbnb-ին։ Մենք բավականին մեծ ջանք ու եռանդ ենք ներդրել մեր ներուժը բացահայտելու, սահմաններից դուրս մտածելու և մեր առաքելությունը գտնելու մեջ։ Այս փուլում շատ տարբեր բաներ էինք փորձում, ինչն էլ ի վերջո ուղղորդեց Google-ի հետ հանդիպմանը։ Google-ում մեզ հետ կիսվեցին աշխատակիցների ռելոկացիայի ժամանակ ծագող խնդիրներով, որոնք հիմնականում կապված էին վճարման և փոխանցումների գործընթացը թվայնացնելու հետ։

Այն փուլը, որի ընթացքում մենք հանդիպեցինք Google-ի հետ, ես անվանում եմ ինտերնետի անորոշության դարաշրջան, իսկ այդ հանդիպումից ես դաս քաղեցի, որ ընկերություններին հետաքրքրում են ոչ թե պրոդուկտի տարբեր առանձնահատկությունները, այլ այն կոնկրետ խնդիրները, որոնք այդ պրոդուկտը լուծում են։ Եթե լուծես իրենց խնդիրը, քեզ կտրվի հնարավորություն, և նրանք կհետևեն քեզ։ Ահա թե ինչպես մենք սկսեցինք համագործակցել Google-ի հետ՝ որպես առաջին հաճախորդի, և վերափոխվեցինք B2B ընկերության, որը տրամադրում է տեխնոլոգիական լուծում աշխատակիցների ռելոկացիայի համար»։

Նի՛ցան, Google-ի հետ համագործակցությունն ընկերության առաջին մեծ ձեռքբերումներից է եղել։ Ո՞րն է ընկերության զարգացման տեսլականը մոտակա 12-18 ամիսների համար։

«Մենք մեր վերջին նեդրումը ներգավել ենք ոչ այն պատճառով, որ դրա կարիքն ունեինք․ իրականում մեր բանկային հաշվին առկա գումարը բավարար է առանց ներդրումների էլ առաջ շարժվելու։ Մենք այն ներգրավել ենք ռազմավարական առավելություն ստանալու համար։ Մենք առաջարկներ ունեինք 4 տարբեր ֆոնդերի կողմից, և ընտրեցինք Updata Partners-ին, քանի որ նրանց պորտֆոլիոյում գտնվող ընկերությունները մեծ հաջողություններ էին գրանցել։

Մենք որոշեցինք ընդունել առաջարկը և ստանալ գումարը, որպեսզի ունենանք կանխիկի մեծ պաշար Benivo-ի զարգացման հաջորդ փուլին ամբողջապես պատրաստ լինելու համար, ինչ էլ որ լինի։

Ֆոնդերի զգալի մասն օգտագործելու ենք մեր աճի աքսելերացիայի համար, ինչպես նաև ներդրումներ ենք կատարելու մեր տեխնոլոգիաներում։Մենք մեծացնելու ենք մեր թիմը, հատկապես Հայաստանում։ Մենք անչափ հպարտ ենք այն տեխնոլոգիայով, որը ստեղծել ենք Հայաստանում»:

Դուք խոսեցիք Benivo-ի կողմից ստեղծված տեխնոլոգիաների մասին, որոնք մի շարք մրցանակների են արժանացել։ Մի փոքր ավելի մանրամասն պատմեք այդ մասին, հավատացած եմ, որ հատկապես Ձեր ապագա թիմակիցներին մանրամասները հետաքրքիր կլինեն։

«Մենք կիրառում ենք ամենաժամանակակից տեխնոլոգիական հնարավորությունները և նորարարությունները։ Սակայն կցանկանամ նշել, որ այս պարագայում միայն տեխնոլոգիան չի կարող տալ մրցակցային առավելություն։ Կարևոր է այն արժեքն ու օգուտը, որն ընկերությունն ստեղծում է այդ տեխնոլոգիայի միջոցով։

Benivo-ում մենք կիրառում ենք տվյալագիտությունը, կատարում ենք կանխատեսող վերլուծություններ, հավաքում ենք տարբեր աղբյուրների տվյալները և կոնսոլիդացնում ենք մեկ պլատֆորմում՝ մշակելով տեխնոլոգիա, որը լիովին վերափոխում է մեր հաճախորդների կյանքը։ Մենք օգնում ենք HR մասնագետին բացահայտել խնդիրները մինչ դրանց ի հայտ գալը»։

Նի՛ցան, Դուք հիմնել եք հայկական գրասենյակը 7 տարի առաջ։ Հայաստանում ՏՏ գրասենյակ հիմնում են հիմնականում ծագումով հայ հիմնադիրները։ Դուք, փաստորեն, բացառություն եք այս առումով։ Կիսվեք, թե ինչու որոշեցիք հիմնել գրասենյակ հենց ՀՀ-ում։

«7 տարի առաջ մենք որոշեցինք, որ պետք է ընդլայնենք տեխնոլոգիական թիմը։ Մենք դա չէինք կարող անել Լոնդոնում կամ Միացյալ Թագավորությունում տաղանդների սուղ լինելու պատճառով։ Այսպիսով, մենք դիտարկում էինք չորս տարբեր երկիր, իսկ Հայաստանն ընտրելու պատճառը այն էր, որ Granatus Ventures-ից Երվանդ Սարգսյանը, որն ինձ հետ ուսանում էր London Business School-ում, առաջարկեց դիտարկել Հայաստանը։

Հաջորդ փուլով ես հանդիպեցի և հարցազրույց անցկացրի ավելի քան 30 ծրագրավորող-ինժեներների հետ Չինաստանից, Իսրայելից, Հայաստանից և Ուկրաինայից։ 

Երբ հանդիպեցի հայ մասնագետների հետ, ես ուղղակի ապշած էի նման տաղանդների առկայությամբ՝ իրենց որակով, երկրի մշակույթով, և ինչու չէ, նաև ուտելիքով, որին ես այդքան սովոր էի իմ մանկության տարիներից։ Այսպիսով, ես միանգամից զգացի կապը Հայաստանի հետ և որոշեցի փորձել։

Մենք սկսեցինք ընդամենը մեկ աշխատակցով։ Գոհար Աղաբաբյանը մեր առաջին աշխատակիցն է։ Այնուհետև մենք որոշեցինք աշխատանքի վերցնել երկրորդ մասնագետին։ Շուշան Պետրոսյանը նույնպես մինչ օրս աշխատում է մեզ հետ Benivo-ում։

Այսօր մենք այստեղ ունենք ավելի քան 50 թիմակից, ինչի համար շատ հպարտ եմ։ Սա աութսորս պրոյեկտներ կատարող թիմ չէ, սա մեր բիզնեսի հիմնական բաղադրիչն է։ Բոլոր այն մրցանակները, որոնց մենք արժանացել ենք, հաճախորդները, որոնց ներգրավել ենք, և արժեքը, որը ստեղծել ենք, ամբողջին հնարավոր է եղել հասնել 100%-ով Հայաստանում ստեղծված թիմի կողմից։ Եվ սրանով մենք անչափ հպարտանում ենք»։

Շնորհակալ եմ, Նի՛ցան, շատ ոգեշնչող է։ Շարունակելով Հայաստանի թեման՝ կիսվեք մեզ հետ՝ որոնք են Ձեր պլանները Հայաստանում։ Ես գիտեմ, որ հայկական թիմը դինամիկ աճում է, Դուք նոր մասնագետներ եք ներգրավում։ Կիսվեք մեզ հետ, թե ինչպիսի կառուցվածք ունի հայկական թիմը, և ինչ մասնագետների կարիք ունեք։

«Մենք այս պահին հավաքագրում ենք Front-end և Back-end ծրագրավորողների, որակի վերահսկման ինժեներների, պրոդուկտ մենեջերների, Scrum master-ների և տեխնոլոգիական ոլորտի այլ մասնագետների։ Մեր նպատակն է հավաստիանալ, որ այն տեխնոլոգիան, որը  մենք ստեղծում ենք այստեղ, մեծ ազդեցություն ունի ոչ միայն մեր հաճախորդների համար, այլ նաև շատ ավելի գլոբալ մասշտաբով։ Հատկապես հիմա, երբ տեխնոլոգիան մեր հնարավորությունն է Հայաստանը միջազգային շուկայում առաձնացնելու համար։ 

Շատերը չգիտեն այն մասնագետների և պոտենցիալի մասին, որը կա Հայաստանում։ Benivo-ում մենք առաքելություն ունենք՝ փոխելու իրավիճակը։ Իհարկե, մենք բոլորս էլ վճարվում ենք մեր աշխատանքի դիմաց, բայց Benivo-ում մենք դրան զուգահեռ մեծ ազդեցություն ենք ստեղծում մեր կատարած աշխատանքով։ Մեկ օրինակ բերեմ։ Յուրաքանչյուր անգամ, երբ ես խոսում եմ Benivo-ի մասին, միշտ նշում եմ, որ շատ հպարտ եմ, որ Benivo-ն ստեղծվել է Հայաստանում։ Երբ հայտարարեցինք մեր ներգրաված նոր ներդրման մասին, գլոբալ թոփ 10 ընկերություններից մեկի ղեկավարներից մեկն ինձ հետ կապի դուրս եկավ, շնորհավորեց և զարմացած խնդրեց մանրամասնել Հայաստանում մեր թիմի և գործունեության մասին։

Դա ինձ համար հնարավորություն էր՝ կիսվելու, որ Հայաստանը միայն այն չէ, ինչ շատերը կարդում են նորություններում։ Սա տաղանդների երկիր է, իսկ մեր թիմը ֆենոմենալ աշխատանք է կատարում՝ օգնելով մեզ մրցանակներ ստանալ։ 

Իմ ծանոթներն այս մասին լսելուց շատ են զարմանում և միշտ ցանկանում են իմանալ ավելին, և սա լավ հնարավորություն է՝ մեր ազդեցությունը աշխարհի մասշտաբով ունենալու»։

Անչափ շնորհակալ եմ, Նի՛ցան։ Շատ հետաքրքիր և ոգեշնչող զրույց էր անձամբ ինձ համար էլ՝ որպես ձեռներեց։ Ես ցանկանում եմ Benivo-ին շատ ձեռքբերումներ ու հպարտանալու առիթներ, քանի որ այն իսկապես ստեղծված է Հայաստանում, ինչի համար մենք նույնպես պետք է հպարտ լինենք և աջակցենք հետագա զարգացմանը։

Powered by staff.am.