Այս անգամ կխոսենք մեր գործընկերներից STAN-ի մասին (Գիտության և տեխնոլոգիաների հրեշտակների ցանց)՝ հաշվի առնելով վերջինիս կողմից նախատեսվող առաջիկա երկու միջոցառումները։
Հիշեցնենք, որ նախկինում staffmedia.am-ը ևս անդրադարձել էր կազմակերպության գործունեությանը, երբ STAN-ը դեռ FAST-ի կազմում էր։ Այժմ այն անկախ կազմակերպություն է և շարունակում է իր գործունեությունը։
Նախ՝ կազմակերպության կողմից նախատեսվող միջոցառումների մասին, որոնց կարող են մասնակցել տեխնոլոգիական ներդրումներով և ներդրումների հավաքագրմամբ հետաքրքրվողները։
1․ Առաջին միջոցառումը՝ նախատեսված տեխնոլոգիական ներդրումներով հետաքրքրվողների համար
Ապրիլի 11-ին տեղի կունենա միջոցառում, որը STAN-ի կողմից նախագծվել է տեխնոլոգիական ներդրումներով հետաքրքրված մարդկանց համար։ STAN-ի ներդրող Ռեմ Դարբինյանը, որը 60-ից ավել ներդրումներ է կատարել, կպատմի, թե ինչ է նշանակում լինել բիզնես հրեշտակ ու ինչպես կայացնել ներդրումների մասին որոշումները։ Այդ միջոցառումը օնլայն է տեղի ունենալու, և միանալու են նաև միջազգային գործընկերները։
2․ Երկրորդ միջոցառումը․ Խուսափել ներդրումների հավաքագրման ժամանակ տեղի ունեցող հիմնական սխալներից
Հաջորդ միջոցառումը կկայանա Ապրիլի 15-ին։ Կկազմակերպվի հանդիպում Corpora ընկերության համահիմնադիր և տնօրեն Ստեփան Խզրթյանի հետ, որը ստարթափ հիմնադիրներին կներկայացնի, թե ինչպես է հնարավոր խուսափել ներդրումների հավաքագրման ժամանակ տեղի ունեցող հիմնական սխալներից և կներկայացնի ոլորտի լավագույն փորձը։
Միջոցառումը տեղի է ունենալու FAST հիմնադրամի գրասենյակում (Հակոբ Հակոբյան 3՝ Մերգելյանի ինստիտուտի տարածքում)։
Այս միջոցառման մասնակցությունն ամրագրելու համար պետք է գրանցվել ստորև հղումով․
Խոսենք STAN-ի հիմնադրման և առաքելության մասին
STAN-ը հիմնադրվել է 2018-ի փետրվարին՝ նպաստելու հայկական տեխնոլոգիական ստարթափների զարգացմանը, ինչպես նաև երկրում տեխնոլոգիական ձեռնարկատիրության լավագույն միջազգային փորձի տարածմանը։ Գործունեության առաջին 5 տարվա ընթացքում STAN-ը գործել է որպես FAST հիմնադրամի ծրագրերից մեկը։
Ժամանակի ընթացքում հասունանալով ու դառնալով կայուն զարգացող ծրագիր՝ 2023 թվականի հուլիսի 1-ից STAN-ն առանձնացավ FAST-ից՝ դառնալով առանձին կազմակերպություն՝ իր սեփական թիմով և կառավարման համակարգով։ Առանձնացման արդյունքում STAN-ի թիմը կենտրոնացրեց իր ողջ ջանքերը STAN-ի առաքելության կատարման վրա։
STAN-ի գործառույթներն ու թիրախային լսարանը
STAN-ը պարբերաբար կազմակերպում է pitching միջոցառումներ, որոնց ընթացքում բիզնես հրեշտակները հանդիպում են ընտրված ստարթափներին և նախանշում ներդրման հնարավորությունները։ Pitching միջոցառումների ավարտից հետո կազմակերպության թիմը համակարգում է բիզնես հրեշտակների և ստարթափների հետագա աշխատանքը՝ կատարելով նախագծերի մանրակրկիտ ուսումնասիրում ու ներդրման իրականացում։
Ընկերության աշխատանքը չի ավարտվում ներդրմամբ՝ ներդրումից հետո անընդհատ կապի մեջ լինելով ստարթափների հետ և օգնելով իրենց հետագա զարգացումներում։ Ստարթափների հետ աշխատանքին զուգահեռ կազմակերպությունը նաև ակտիվ կերպով աշխատում է տեխնոլոգիական ստարթափներում ներդրումներ կատարելու ցանկություն ունեցող անհատների հետ՝ անընդհատ համալրելով բիզնես հրեշտակների թիմը։
STAN-ի հավակնոտ ծրագրերը
Տարիների ընթացքում 18 հիմնադիր բիզնես հրեշտակներ միավորող ցանցից STAN-ը դարձավ աշխարհի 6 երկրներում գործող շուրջ 40 բիզնես հրեշտակից բաղկացած ցանց։ Այդ ընթացքում STAN-ի բիզնես հրեշտակները ներդրումներ են կատարել 17 տեխնոլոգիական ստարթափ ընկերության մեջ՝ ընդհանուր առմամբ կատարելով 800 հազար դոլարը գերազանցող ներդրում հայկական ստարթափ էկոհամակարգում։ Առաջիկայում պլանավորվում է խոշոր ներդրումային միջոցառում կազմակերպել արտերկրում՝ նպատակ ունենալով ավելի մեծ թափով միավորելու Սփյուռքը Հայաստանի տեխնոլոգիական ոլորտի աջակցման նպատակով։ Մոտ ժամանակներս լրացուցիչ տվյալներ կհայտարարվի այդ առթիվ։
Ովքե՞ր են ներդրողները
Բիզնես հրեշտակների շուրջ 80%-ը Սփյուռքից է, իսկ մնացածը՝ Հայաստանից: Ներդրողների մեծամասնությունն ԱՄՆ-ից է։ Բիզնես հրեշտակները բազմապիսի փորձ ունեն։ Ընկերությունն ունի ունիկալ ստարթափ փորձ ունեցող ներդրողներ, որոնց նախկին ստարթափները հաջողությամբ վաճառվել են ոլորտի գիգանտներին բազմամիլիոն դոլարի գործարքներում։ Կան ներդրողներ ֆինանսական, խորհրդատվական, առողջապահական, էներգետիկայի և այլ ոլորտներում։
Ներդրումների մասին որոշումները կայացվում են՝ հաշվի առնելով ստարթափի ներկայացրած նախագծի հատկությունները, նորարարությունը և ամենակարևորը՝ միջազգային ասպարեզում զարգանալու հնարավորությունը։ Կան ստարթափներ ոչ միայն գիտահեն ոլորտներում՝ երաժշտական լուծումներից մինչ առողջապահություն, կրթական համակարգերից՝ ռադար տեխնոլոգիաներ։
Վերջում ամփոփենք կազմակերպության տնօրեն Ռուբեն Օսիպյանի խորհրդով՝ ուղղված գաղափարի փուլում գտնվող հիմնադիրերին․
Փորձառու հիմնադիրներին կմաղթեմ իրենց նախագծերում հրթիռային աճ ու նորանոր հաջողություններ։ Գաղափարի փուլում գտնվող հիմնադիրներին կհորդորեմ հնարավորինս շատ գաղափարներ զարգացնել, ժամանակից շուտ չսիրահարվել իրենց գաղափարներին, լինել մաքսիմալ բաց քննադատությանը, չհապաղել չաշխատող նախագիծը փոխելու գործում ու նախագծել այնպիսի լուծումներ, որոնք կարող են հաջողել միջազգային ասպարեզում։ Եվ ամենակարևորը՝ մաքսիմալ շատ ճամփորդեք ու ճանաչեք միջազգային շուկաները,- STAN-ի տնօրեն Ռուբեն Օսիպյան
STAN-ի նախորդ միջոցառումները՝ լուսանկարներում
