Տա-դա-դաաա՜մ, բացահայտում ենք մեր թիմի նոր ու շա՜տ առեղծվածային անդամների ինքնությունը։ Ստելլան ու Ստեփանը՝ staff.am-ի կարիերայի խորհրդատուները (career coach-երը), միացել մեր թիմին բոլորովին վերջերս, բայց արդեն էլ չենք պատկերացնում մեր կյանքն առանց նրանց։ Լինելով անասելի ու անբացատրելի տարբեր՝ միաժամանակ նաև շա՜տ նման են ու խենթի պես սիրում են իրենց աշխատանքը կամ, ինչպես իրենք են սիրում ասել, առաքելությունը։
Երկուսն էլ հավատում են, որ յուրաքանչյուր մարդու մեջ տաղանդ է ապրում և այդ փաստը նրանց շա՜տ է ոգեշնչում։ Հերիք է մի քանի բառ փոխանակել նրանց հետ, ու քեզ իսկական սուպերհերոս ես զգում, ուզում ես աշխարհի բոլոր բարձունքները գրավել։ Հենց այդպես էլ բացահայտում են մարդկանց իրական ներուժն ու ամեն ինչ անում են, որ ինքդ էլ հավատաս։
Դե ինչ, այսքանը նմանությունների մասով, իսկ հիմա յուրաքանչյուրի անհատական հատկանիշների մասին՝ առանձին։
Ստելլա
Դիմավորեք մեր Ստելլային (որ ասում ենք Ստելլա, laptop-ն էլ հետն է), ով միշտ շատ «խառն» է ու վազքի մեջ, բայց միևնույն ժամանակ չափազանց նրբանկատ է, ուշադիր, ու ոչինչ չի վրիպում նրա աչքից։
Ստելլան իր կյանքը չի պատկերացնում առանց մարդկանց հետ շփման, ֆիլմերի, թատրոնի, ճամփորդությունների, բնության, շոփինգի, թթու կանաչ խնձորի ու դե մի քիչ էլ ուշանալու։) Այս ամենի հետ մեկտեղ ինչ-որ կախարդանքով հասցնում է հմտանալ ամենատարբեր ոլորտներում՝ ՏՏ-ից մինչև լուսանկարչություն։
Դե, ինչպես նշեցինք, սիրում է ճանապարհորդել ու ծանոթանալ իր ոլորտի (և ոչ միայն) մասնագետների հետ փորձի փոխանակման և նորը սովորելու համար։ Դե ինչ արած, իր հետ սառնարանի մագնիս չի բերում, փոխարենը միջազգային փորձ է բերում։)
Չնայած սովոր ենք նրան միշտ կենսուրախ ու ժպիտով տեսնել, բայց բավական է, որ աշխատանքի հայտարարություններում տեսնի սահմանափակումներ՝ պայմանավորված սեռով, տարիքով․․․ վեեեերջ, ավելի լավ է աչքին չերևալ։
Ստեփան
Հերթը Ստեփանինն է, ով անկախ իր կամքից ամեն օր օրը մի քանի անգամ լսում է հետևյալ նախադասությունները՝ «Ստյոպ ջան, ձեր մոտ մի հատ լավ գործ չկա՞ իմ համար», «Ախպեր, որ աչքովդ լավ գործ ընգնի, խաբար արա», «Ինձ ի՞նչ թեթև գործ կառաջարկես տնից, ազատ գրաֆիկով ու ամենակարևորը բարձր աշխատավարձով» նախադասությունները։
Արդեն հասկացաք, որ Ստեփանը շատ համբերատար է։ Նաև մեր ամենակենդանասեր թիմակիցն է։ Շա՜տ է սիրում համեղ պատրաստել, էլ ավելի շատ սիրում է հյուրասիրել մեզ իր պատրաստածը։
Ստեփանն իսկական էքպերիմենտատոր է, հատկապես երբ խոսքը վերաբերում է սանրվածքին։
Հիմա կասեք՝ էլ ի՞նչ առեղծվածային, ինչ կար-չկար պատմեցիք, բայց հավատացեք՝ դեռ շա՜տ բաներ ունենք պատմելու, ու խոստանում ենք պարբերաբար կիսվել։
Ստելլային և Ստեփանին արդեն ավելի հաճախ կտեսնեք, քանի որ նրանք ամեն օր ուսումնասիրում ու առանձնացնում են կարիերայի լավագույն հնարավորությունները՝ աշխատանքներ, դասընթացներ, պրակտիկաներ․․․ և պատրաստվում են կիսվել դրանցով ձեզ հետ։
