ՏԵԽՆՈ-ՈՒՐԲԱԹ. Ահա այսպես է կոչվում հանդիպումների և սեմինարնեի շարքը, որը տեղի է ունենում յուրաքանչյուր ուրբաթ Գյումրու տեխնոլոգիական կենտրոնում: Միջոցառումների շարքը մեկնարկել է 2016թ-ից: Մոտիվացնող և տեղեկատվական հանդիպումներ՝ ՏՏ ոլորտով հետաքրքվող երիտասարդների, ՏՏ ստարտափների համար:
Միջոցառման շրջանակում տեխնոլոգիական մարտահրավերների մասին են խոսում ոլորտի ամենահաջողակները. սխալներ, ձախողումներ ու դրանց արդյունքում ՀՀ և արտասահմանյան շուկայում ամենաամբիցիոզ լուծումները ստեղծելու և ճանաչելի դարձնելու գաղտնիքներն են բացահայտում:
Վերջիններս ներկայացնում են նաև հաջողության պատմություններ, խոսում հատուկ կարևորության ու պահանջարկ ունեցող թեմաներից։ Տեխնո-ուրբաթի երկարաժամկետ նպատակը մասնագետների աջակցությամբ մարզի երիտասարդների իրազեկվածության և կարևորության գնահատականի բարձրացումն է՝ անկախ ապրելու վայրից։
«Առհասարակ կարևորում եմ նմանատիպ միջոցառումների դերը և նշանակությունը ներկայիս` Գյումրեցի և ինչու չէ նաև մարզերի երիտասարդների համար։ Սեմինարները իրենց բնույթով և՛ գիտական, և՛ ինտելեկտուալ, և՛ մոտիվացնող, և՛ զարգացնող էին, ինչը միանգամայն կարող եմ ասել մի նոր քայլ է ուղղված գրագետ հասարակության ձևավորմանը»,-նշում է Տեխնո-ուրբաթի մշտական մասնակից Հասմիկ Հակոբյանը:
Տեխնո-ուրբաթը հյուրընկալել է այնպիսի ընկերությունների հիմնադիրների և ներկայացուցիչների, ինչպիսիք են՝ ARLOOPA, Microsoft Information Center Armenia, Synergy, PicsArt, BSC support Center, FimeTech, HelpSystems, Onex, staff.am, RenderForest, ggTaxi, AYB Educational Foundation, ISTC և այլն:
