Հարցազրույցին պատրաստվելը և մանավանդ դրան նախորդող 15 րոպեն շատ կարևոր են: Առաջարկում ենք մի քանի խորհուրդ, որոնք կօգնեն առավել արդյունավետ օգտագործել Ձեր ժամանակը և հավուր պատշաճի ներկայանալ այդ կարևոր հանդիպմանը:
1. Ժամանել նշանակված ժամանակից շուտ, բայց ներս չմտնել
Ուշանալն ամենամեծ բացթողումն է հարցազրույցի գնալիս։ Բայց պետք է սպասել մեքենայի մեջ կամ մոտակա սրճարանում, քանի որ ժամանակից շուտ ներկայանալը կարող է ճնշել գործատուին, և այդպիսով հարցազրույցը սխալ ընթացք կստանա։ Շուտ ներկայանալն այնպիսի տպավորություն կստեղծի, ասես գործատուն պետք է թողնի իր բոլոր գործերը հարցազրույց անցկացնելու համար։
Խորհուրդ է տրվում մտնել գործատու կազմակերպություն հարցազրույցից ընդամենը 10 րոպե առաջ։
2. Պահպանել հանգստություն
Նյարդայնանալն ու հուզվելը խոչընդոտում են մարդու սթափ դատելու կարողությանը։ Այդ իսկ պատճառով անհրաժեշտ է պահպանել հանգստություն: Հարցազրույցից առաջ և դրա ընթացքում հանգիստ լինելը կօգնի ավելի ուշադիր լինել, լավ պատասխանել բոլոր հարցերին և գերազանց կերպով ներկայացնել քո հմտություններն ու պատրաստակամությունը։
3. Նշումներ անել
Հարցազրույցից առաջ անհրաժեշտ է կատարել նշումներ գործատուի, ինչպես նաև այն պաշտոնի վերաբերյալ, որին դիմել ես: Կարելի է նաև ընդգրկել մի քանի հակիրճ նախադասություն ինքդ քո մասին։ Նշումները կօգնեն քեզ պատրաստ լինել, երբ կտրվեն համապատասխան հարցերը, և իհարկե նվազեցնել հնարավոր սթրեսը:
4. Լրացուցիչ մանրակրկիտ հետազոտություն չանել
Իհարկե, պետք է հետաքրքրվել և նախապատրաստվել հարցազրույցին, սակայն հարցազրույցին նախորդող րոպեներն արդեն իսկ հարմար ժամանակ չեն գործատու կազմակերպության բոլոր նվաճումներն ու շահույթներն ուսումնասիրելու համար։ Վերջին պահին բազմաթիվ նախագծեր աչքի անցկացնելը կարող է շփոթեցնող լինել։
5. Մտովի նորից կրկնել թե քո որ հմտություններն ու հատկանիշներն ես ներկայացնելու որպես առանցքային
Դու կարողանո՞ւմ ես լավ հաղորդակցվել։ Նպատակասլա՞ց ես։ Կամ գուցե ուզում ես, որ նրանք հիշեն քո աշխատանքային փորձը։ Մի քանի հատկանիշների վրա կենտրոնանալը կօգնի, որ գործատուն քեզ ավելի լավ հիշի։
6. Պետք չէ չափից դուրս շատ նախապատրաստվել
Հարցազրույցին չափից ավելի պատրաստվելու արդյունքում կարող ես անբնական թվալ։ Պետք է հիշել ամենակարևոր կետերը, բայց հարցազրույցը երկկողմանի խոսակցություն է քո և գործատուի միջև։ Վստահի՛ր ինքդ քեզ և ամեն ինչ իր հունով կընթանա։
7. Հավաստիանալ, որ արտաքին տեսքդ անթերի է
Հարցազրույցի գնալուց առաջ անհրաժեշտ է համոզվել, որ արտաքին տեսքդ անթերի է։ Նամանավանդ, որոշ մասնագիտությունների դեպքում կոկիկ հագուկապը կարող է մեծ դեր ունենալ (օրինակ, այն աշխատանքները, որոնք ենթադրում են անմիջական շփում կազմակերպության հաճախորդների հետ):
8. Սիրալիր լինել անվտանգության և ընդունարանի աշխատակիցների հանդեպ
Գործատուի գրասենյակ մտնելիս, հիշի՛ր, որ պետք է սիրալիր լինել բոլոր աշխատակիցների հանդեպ։ Մեծ հավանականություն կա, որ հետագայում այդ աշխատակիցը քո մասին իր կարծիքն արտահայտի։
9. Ուշադրություն դարձնել, թե ինչ է կատարվում շուրջդ
Ընդունարանում սպասելիս կարելի է զննել գրասենյակի առօրյան։ Այդպես հնարավոր կլինի հասկանալ, թե ինչ միջավայրում ես աշխատելու հետագայում։ Այս ինֆորմացիան կարող է շատ օգտակար լինել նաև հարցազրույցի ժամանակ:
10. Խուսափել վատ մտքերից
Հաճելի բաների մասին մտածելը կօգնի ժպտալ և բարելավել ինքնազգացողությունդ, ինչն իր հերթին կնպաստի հարցազրույցին ավելի դրական տրամադրվելուն։ Իհարկե հարցազրույցի բնույթը կախված է լինում ոլորտից, կազմակերպությունից, ինչպես նաև այն պաշտոնից, որի համար հրավիրված եք հարցազրույցի, այդ իսկ պատճառով մենք ներկայացրել ենք խորհուրդներ, որոնք առավել ընդհանուր բնույթի են և մեծամասամբ անկախ են ոլորտից:
Հեղինակը՝ Նազելի Բադալյան
HR և հաղորդակցության մենեջեր, «DeepRed Media» ընկերություն
