staffmedia.am-ը շարունակում է իր այցերը Հայաստանի լավագույն գրասենյակներ։ Այս անգամ մեր թիմը որոշեց ուղևորվել «քաղաքից դուրս», բացահայտելու Բեկոնի լավագույն գրասենյակը և ոչ միայն։ Վստահ ենք ձեր աչքից չի վրիպել այն մեծ ու գեղեցիկ շենքը որն այնքան բնականորեն է տեղավորվում բնության մեջ, որ կարծես միշտ այնտեղ է եղել՝ իր մեծ արտադրական համալիրով, հարմարավետ գրասենյակով և իհարկե նմանը չունեցող կանչապատ տարածքով։
Դե ինչ բարի գալուստ Բեկոն ընտանիք․․․
Բեկոնի գրասենյակի ամեն անկյուն մտածված է՝ աշխատակիցների հարմարավետությունն ապահովելու նպատակով։ Լուսավոր, ընդարձակ սենյակներն ապահովում են հարմարավետ, թթվածնով հագեցած միջավայր, որտեղ հեշտ է կենտրոնանալ, զարգացնել մտքեր և գտնել թիմային լուծումներ։
Բացի աշխատանքային տարածքների հարմարավետությունից, գրասենյակում առանձնահատուկ են նաև ընդմիջումները։ Այո՛, այո՛, Բեկոնում դրանք սովորական աշխատանքային դադարներ չեն։ Դրանք շփման, զրույցի, փոքր զբոսանքի, վերալիցքավորման և նոր էներգիայով վերադառնալու պահեր են։ Գրասենյակի կանաչապատ տարածքներում անցկացված մի քանի րոպեն արդեն բավական է՝ վերալիցքավորվելու ու շարունակելու օրը նոր էներգիայով։
Գրասենյակում առանձնահատուկ ուշադրություն է դարձված նաև թիմային քննարկումների սենյակներին։ Դրանք ոչ միայն ֆունկցիոնալ են, այլև՝ ոգեշնչող։ Այստեղ խոսքն ազատ է, գաղափարները՝ համարձակ, իսկ մթնոլորտը՝ վստահելի։ Ու հենց այդ մթնոլորտում էլ ծնվում են ամենահետաքրքիր նախագծերն ու լուծումները։
Դե իսկ արտադրական տարածքում աշխատանքը պարզապես եռում է: Հենց այստեղ է պատրաստվում շատերի սեղանների անբաժան մասը դարձած մսամթերքը: Ժամանակակից տեխնոլոգիաներով հագեցած արտադրական տարածքն ապահովում է ինչպես արտադրանքի բարձր որակը, այնպես էլ աշխատանքային ապահով և հարմարավետ միջավայր:
Սակայն, եթե մի պահ մի կողմ դնենք ինտերիերի դիզայնը, ներդաշնակ գույներն և ժամանակակից տեխնոլոգիաներով հագեցած արտադրական տարածքը, կմնա ամենակարևորը՝ մարդիկ։ Բեկոնի գրասենյակի իրական հմայքն այն աշխատակիցներն են, ովքեր իրենց ներկայությամբ ու ներդաշնակ համագործակցությամբ ձևավորում են ընկերության մշակույթը։ Ջերմ, միասնական ու աջակցող թիմն է կյանք ու շունչ հաղորդում գրասենյակին։ Եվ պատահական չէ, որ Լավագույն գրասենյակներ շարքը, որը սովորաբար ներկայացնում ենք լուսանկարներով, այս անգամ որոշեցինք ներկայացնել հենց բեկոնցիների աչքերով։
Դիտենք հոլովակը և բացահայտեք՝ ինչպիսին է լավագույն գրասենյակը՝ այն մարդկանց աչքերով, որոնք շուրջ 30 տարի ամեն օր ստեղծում են, ապրում թիմային մշակույթով և դառնում երկրի արդյունաբերական առաջընթացի մասը։
Եթե ամփոփենք. Մեր այցը Բեկոն բավականին տպավորիչ էր, այստեղ աշխատակիցները պարզապես վայելում են դրական աշխատանքային միջավայրն ու արդյունավետ կազմակերպում իրենց յուրաքանչյուր աշխատանքային օրը:
Եթե դուք էլ եք ցանկանում լինել Բեկոն ընտանիքի անդամ և կիսել աշխատանքային առօրյան այս ջերմ ու դրական միջավայրում, ապա հետևեք Բեկոնի կարիերային էջին staff.am-ում և բաց մի՛ թողեք ոչ մի հնարավորություն։
