Հայաստանի լավագույն գրասենյակները․ Picsаrt -ի ազատությունը, թափանցիկությունը և բազմատաղանդ թիմը

7275

staff.am-ի այցերը շարունակվում են՝ բացահայտելու և ձեզ հետ կիսվելու Հայաստանի լավագույն գրասենյակների տպավորություններով։ Այսօրվա այցը յուրովի առանձնահատուկ էր, արվեստ ստեղծող ու արվեստով շնչող մեր սիրելի գործընկերներից՝ Picsart -ի գրասենյակ ենք այցելել։ staff.am-ի հիմնադրման ամենավաղ ժամանակներից սկիզբ է դրվել մեր համագործակցությանը, ու յուրաքանչյուր այցի ժամանակ այնպիսի տպավորություն է, որ ոչ թե հյուր ես գնում, այլ հարազատ միջավայրում ես գտնվում, ընկերությունն ասես քո տունը լինի ու այցեքարտն ամբողջ աշխարհի։ 

Այս անգամ էլ ավելի տպավորիչ ու գունեղ էր՝ նպատակն էր բացահայտել յուրաքանչյուր պատմություն, որն ընկած է ամեն դետալի, նկարի, արվեստի, գաղափարի ու միջավայրի ետևում։ 

Այցի ողջ ընթացքում մեզ ուղեկցեց և Picsart-յան պատմությամբ մեզ հետ կիսվեց Picsart ընկերության զարգացման և կրթության բաժնի ղեկավար, մեզ բոլորիս շատ հայտնի ու սիրված Մադլեն Մինասեանը։ Ի դեպ, Picsart-ում հիբրիդային աշխատանքային ռեժիմ է, Մադլենն էլ սիրում է շատ հաճախ աշխատել տնից, բայց մեծ սիրով գալիս է գրասենյակ, երբ ուզում է լիցքավորվել, թիմի հետ մեկ վայրում աշխատել, կամ երբ մեզ պես լավ հյուրեր է ունենում 🙂

Picsart

Դե ինչ, գնացինք առաջ՝ այց կատարելով Picsаrt-ի Երևանի, Մոսկվայի, Մայամիի, Նյու Յորքի և մյուս գրասենյակներ, որովհետև բոլոր գրասենյակները նույն կոնցեպտով են՝ Picsart-յան են :), և այնտեղ են աշխատում Picsаrt-ի «արվեստագետները»:


Մի պահ կանգ առնենք մուտքի մոտ և վերհիշենք Picsart-ի հետ մեր անհատական կապը։ Գրեթե բոլորս օգտվում ենք Picsart-ի հավելվածից և մեր անհատական կրեատիվ փորձառությունն ունենք այդ հավելվածի հետ։ Ու անցյալ տարի մեր հպարտությունն էր, երբ Picsart-ը ներգրավեց 130 մլն դոլար ներդրում և դարձավ հայաստանածին առաջին միաեղջյուր ընկերությունը (ավելի քան 1 միլիարդ դոլար արժողություն ունեցող):

Picsart
Միաեղջյուր դառնալու պատվին գրասենյակում տեղադրվել է #PicsartUnicorn-ը:

Այն, որ Picsart-ը գտնվում է Թումո ստեղծարար տեխնոլոգիաների կենտրոնի տարածքում, պատահական չէ։ Ըստ Մադլենի, այս ամենի հիմքում ընկած է Pay forward գաղափարը։ 

«Թումոն բավականին կարևոր դերակատարում ունի Հայաստանում, մեր երիտասարդների կրթման գործում։ Թումոյի դերը արդեն զգում ենք նաև մենք, Թումոյի առաջին սաներն արդեն մեծացել են և նաև մեզ մոտ են աշխատում։ Այսինքն՝ այս տարածքի վարձակալմամբ մի կողմից մենք ունենում ենք հաճելի աշխատավայր, որտեղ կարող ենք լինել ստեղծագործ, իսկ մյուս կողմից էլ՝ գնում ենք երազանք՝ ներդրում ունենալով Թումոյի արած լավ գործի և Հայաստանի պայծառ ապագայի մեջ»,- հաճույքով մեզ հետ էր կիսվում Մադլենը։ 

Թումո ստեղծարար տեխնոլոգիաների կենտրոնի շենքը, որտեղ գտնվում է նաև Picsart-ի գրասենյակը

Picsart-ի հանդիպումների Պիկասո սենյակը

Picsart-ում ստեղծագործելուն և ստեղծագործ լինելուն ոչինչ չի խանգարում։ Գրասենյակում չկա դուռ, պատ գաղափարը, որը կարող է միմյանց միջև որևէ խոչընդոտ լինել։ Ամբողջությամբ open space է, իսկ հանդիպումների ու զանգերի սենյակներն առանձնացված են հայելիներով կամ ապակիներով՝ խորհրդանշելով Picsart-ի արժեքներից կարևորագույնը՝ թափանցիկությունը։ 

«Այն, որ ես գիտեմ, որ Միկան՝ մեր Chief Product Officer-ը, այնտեղ նստած է, և կարող եմ քայլելով անցնել և ասել՝ «Միկ ջան, այ սենց խնդիր ունեմ, այ սենց օգնության կարիք ունեմ», կամ «տեսնո՞ւմ ես՝ ինչ լավ հյուրեր ունենք, կբարևե՞ս»։ Դա է տարբերությունը, որը շատ հաճախ մեր չափի ընկերություններում չի պահպանվում», – պատմեց Մադլենը։

Այլ կերպ ասած՝ միջավայրն իր գույներով, պատկերներով և ուղերձներով Picsart-ի հայելին է և արտացոլում է ընկերության արժեքներն ու մշակույթը: 

Շուրջ բոլորը տեսնում ենք նկարազարդ պատեր ու դռներ, առանձին նկարներ, կտավներ, դեկորի գունավոր տարրեր, արձանիկներ: Միանգամից հասկանում ես, թե ուր ես եկել։

Picsart-ի գրասենյակը սկզբից մեկ սենյակ է եղել, հետագայում այն ընդլայնվել է, ու անգամ սենյակներն են գաղափարական անվանումներով՝ կա Վան Գոգի սենյակ, Պիկասոյի, դա Վինչիի, ինչպես նաև Բենքսիի, Ֆրիդա Կալոյի, Սարյանի, Այվազովսկու և այլոց։ Իսկ գրադարանը Ուիլյամ Սարոյանի պատվին է կոչվել։ Մեծ արվեստագետների պատվին կոչված սենյակներում Picsart-ի թիմը ոգեշնչվում է՝ ստեղծելով ավելին։ 

Պիկասոյի սենյակ

Վան Գոգի սենյակ

Դա Վինչիի սենյակ

Ինչպես նշեցինք, Picsart-ը Հայաստանի այցեքարտն է ոչ միայն երկրից դուրս, այլ նաև՝ անմիջապես Հայաստանում։ Picsart հաճախ են այցելում տարբեր դպրոցներից, կրթական և այլ հաստատություններից ու հիացմունքով լցվում նման գրասենյակ տեսնելիս, իսկ երեխաների համար դա նաև հավելյալ մոտիվացիա է սովորելու, զարգանալու և ապագայում նման աշխատավայրում աշխատելու համար։

Բացի երիտասարդ այցելուներից, Picsart են այցելում նաև հայտնի մարդիկ՝ նախագահներ, հայտնի հասարակական ու պետական գործիչներ, աշխարհահռչակ երաժիշտներ ու դերասաններ։ Յուրաքանչյուր Հայաստան ժամանած անվանի ու պատվավոր հյուր իր օրակարգում է ներառում նաև այց Picsart-ի գրասենյակ։ 

Եվ, իհարկե, Picsart-ում յուրաքանչյուր այց արտացոլվում է հատուկ նախատեսված պատի վրա՝ իրենց կողմից թողնված մեսիջներով ու բնավորությամբ, ինչպես, օրինակ, գրելով «Keep app the amazing work» արտահայտությունը՝ «Keep up the amazing work»-ի փոխարեն։ Մասնավորապես, հատուկ այցելուներից են Անգելա Մերկելը, Քիմ Քարդաշյանը, Սերժ Թանկյանը, Սթենլի Քլարկը և այլոք։ 

«Picsart-ը կարող է մարդուն սուպերհերոս դարձնել», – նշեց Մադլենը՝ քիչ առաջ քայլելով և մեզ ցույց տալով Picsart-ի ամենահին լոգոն ու սուպերհերոսի կերպարը։ Այն Picsart-ի ժառանգությունն է կազմում, և նույն գաղափարով ընկերությունն առաջնորդվելով՝ 10 hոգանոց թիմից այսօր դարձել է ավելի քան 1000 ամբողջ աշխարհում, իսկ յուրանչյուր ամսվա կտրվածքով ակտիվ օգտատերերի քանակը գերազանցում է 150 մլն-ը։

Մինչև Covid-19-ի համավարակը Picsart-ցիներն արդեն դժվարությամբ էին տեղավորվում գրասենյակում։ Այդ ժամանակ էլ բնականոն կերպով ծագեց գրասենյակից դուրս աշխատելու պահանջարկն ու հնարավորությունը։ 

Համավարակից հետո այն էլ ավելի զարգացավ, և այժմ Picsart-ցիներն ունեն հնարավորություն իրենց օրը կառավարելու՝ գալով գրասենյակ անհրաժեշտության դեպքում և աշխատելով տանից ըստ ցանկության։ Ինչպես նշեց Մադլեն Մինասեանը․ «Picsart-ում մենք տուփի մեջ չենք մնում, մենք միշտ կարողանում ենք ստեղծագործ լինել՝ անգամ տարածքների խնդիրների հետ կապված»։

​​Թիմի կտրուկ աճով պայմանավորված՝ Picsart-ը ևս մեկ հարկ է ավելացրել նույն շենքում և այժմ զբաղեցնում է 2 հարկ։ Նոր հարկում նաև առանձին աշխատասեղաններ են հատկացված այն թիմակիցների համար, որոնք նախընտրում են ավելի հազվադեպ գալ գրասենյակ, որպեսզի կարողանան միմյանց հետ արդյունավետ աշխատել և քննարկումներ ունենալ։

Picsart-ի հին տարբերանշանով սուպերհերոսները

Այնուամենայնիվ, աշխատակիցների մեծ մասը նախընտրում է գալ և աշխատել գրասենյակից, կամ հաճախ այցելել, որպեսզի տեղում շփվի թիմի հետ և օգտվի գրասենյակի բոլոր առավելություններից։

Իսկ այդ առավելությունները շատ են ու բազմազան. օրինակ՝ Picsart-ցիներն ունեն աշխատանքի ժամին մերսում ստանալու հնարավորություն, որից հետո կարողանում են ավելի թարմացած վերադառնալ աշխատանքի։

Բացի այդ, առավելություն է նաև շենքից բացվող գեղեցիկ տեսարանը դեպի Մարզահամերգային համալիր, Կիևյան կամուրջ և Թումոյի այգի։ Վերջինս նաև հաճելի վայր է զբոսանքների և աշխատանքային միջավայրից մի պահ կտրվելու համար։

Տարածքում կան մեծ ու հարմար խոհանոցներ, որտեղ աշխատակիցները հաճույքով ժամանակ են անցկացնում և օգտվում քաղցրավենիքի կամ առողջ սննդի հյուրասիրությունից, որն ընկերությունը միշտ պատրաստում է թիմի համար։

Գրասենյակում կա նաև սեղանի թենիս և Air Hockey խաղալու հնարավորություն, հեծանիվներ ու սքեյթբորդներ, ինչպես նաև այդքան դժվար գտնվող PlayStation 5, որն ընկերությունն իր աշխատակիցների համար հաջողացրել էր ձեռք բերել, երբ դեռ ոչ մի տեղ չկար։

Picsart-ում հաճույքով են նշում բոլոր տոները, ինչպես նաև կինոդիտումներ են կազմակերպում, մաֆիա, բլոտ խաղում, ունեն նաև շախմատի և ֆուտբոլի թիմեր, որոնք մրցում են այլ ՏՏ ընկերությունների թիմերի հետ։

Բացի այդ, կան յոգայի պարապմունքներ և հայկական պարի դասընթացներ։ Ու քանի որ Picsart-ի թիմը մեծ է ու բազմատաղանդ, այդ բոլոր հմտությունների կրողները՝ ինստրուկտորները, հենց թիմից են և հաճույքով կիսվում են իրենց գիտելիքներով թիմակիցների հետ։

Հետաքրքիր զբաղմունքներից և հաճույքներից զատ, Picsart-ում կարևորում են նաև բարեգործությունն ու համատեղ օգտակար աշխատանքը՝ հատկապես ֆիզիկական։ Թիմով հաճախ գնում են և տարբեր համայնքներում մասնակցում դպրոցների ու շինությունների վերանորոգման աշխատանքներին՝ գիտակցելով, որ դա ոչ միայն միավորում է թիմը, այլև նպաստում միասնական արժեքների կերտմանը։

Ընդհանրապես Picsart-ում կարողանում են պահել կյանքի և աշխատանքի բալանսը, որպեսզի թե՛ մեկը, թե՛ մյուսը միշտ հաճույք պատճառեն, իսկ աշխատակիցները լինեն մոտիվացված ու երջանիկ։

Picsart-ում շատ հարցերում են ինկլյուզիվ։ Գրասենյակի տարբեր անկյուններում կարելի է տեսնել make art ուղերձը՝ տարբեր լեզուներով՝ «make արվեստ», «make крутое», որը Picsart-ի նախկին կարգախոսն էր։ Եվ քանի որ գործընկերները գալիս էին հայաստանյան գրասենյակ Չինաստանից, Ճապոնիայից և այլ երկրներից, այս առումով էլ լավագույնս դրսևորվել է ինկլյուզիվությունը՝ «make արվեստ»-ը տեղադրելով այլ լեզուներով նույնպես։ 

Այստեղ բոլորն են ներգրավված Picsart-ի ներկան, ապագան ու, ինչու չէ, նաև գրասենյակը ձևավորելու, կրեատիվ լուծումներ առաջարկելու գործում։ Գրասենյակի ոճի մշակումը նույնպես Picsart-ի թիմի ուժերով է: Եվ այդ պահին մենք առիթը բաց չթողեցինք զրուցելու նաև Գուրգեն Խոստիկյանի հետ, ով՝ որպես ճարտարագետ և Picsart-ի կարևորագույն գործընկեր, իր մեծ ներդրումն է ունեցել հատուկ ճարտարապետական լուծումներ առաջարկելու գործում։ 

Picsart թիմից Գուրգեն Խոստիկյանը

Պատերազմից հետո Picsart-ում պատերազմի մասնակիցների համար հատուկ դասընթացներ մեկնարկեցին, և անգամ հարմարություններն այնպես են ստեղծված, որպեսզի ցանկացած հենաշարժողական խնդիրներ ունեցող մարդ կարողանա ազատ մուտք գործել ընկերություն և աշխատել այստեղ։ 

Ընկերության գրասենյակում փոփոխությունները պարբերաբար են տեղի ունենում, ինչ-որ դետալներ են ավելանում և պակասում, բաժիններ են տեղափոխվում և այլն։ Այդ ամենը նպատակ ունի ոչ միայն մշտապես թարմ ու գեղեցիկ պահել գրասենյակը, այլև աշխատակիցների համար առավել հարմար պայմաններ ապահովել, չէ՞ որ ստեղծագործ թիմը միշտ պետք է ակնահաճո միջավայրում աշխատի։

Իսկ մենք կշարունակենք հետևել Picsart-ի նոր նվաճումներին ու զարգացումներին՝ կիսվելով ընկերության թարմ նորություններով։

Powered by staff.am.