Հայաստանի լավագույն գրասենյակները. VOLO-ի պրոֆեսիոնալ աշխատանքային և ընտանեկան միջավայրի գաղտնիքը

5413

staff.am-ը շարունակում է «Հայաստանի լավագույն գրասենյակները» նախագիծը, որի նպատակն է ֆոտոպատմությունների տեսքով ներկայացնել Հայաստանում գործող տեղական և միջազգային ընկերությունների ամենատարբերվող, գեղեցիկ, հարմար, ոճային և տրամադրող գրասենյակները:Նախագծի շրջանակում այս անգամ մենք այցելել ենք VOLO ընկերության գրասենյակ: VOLO ընկերությունը հիմնադրվել է 2006 թվականին։ Այն ունի 7 մասնաճյուղ՝ տեղակայված Հայաստանում և Ուկրաինայում։

VOLO

VOLO-ն ստեղծվել է երկու հիմնադիրների կողմից և, տարիների ընթացքում զարգանալով ու աճելով, դարձել է 300-ից ավելի աշխատակից ունեցող միջազգային թիմ։

VOLO

Չնայած ընկերության կայուն և ակտիվ աճին՝ ծրագրավորման որակը և միջազգային հաճախորդների հանդեպ հոգատար վերաբերմունքը մնում են կազմակերպության հիմքում՝ որպես առանցքային բաղադրիչներ։

Մենք այցելել ենք ընկերության գլխամաս, որտեղ թիմը տեղափոխվել է 2013-ին: Համահիմնադիրները հատուկ ուշադրություն են դարձրել գրասենյակային տարածքի ընտրությանը։ Տարածքն ընտրվել է՝ հաշվի առնելով մի շարք կարևոր հանգամանքներ՝ ոչ աղմկոտ միջավայր, մեծանալու հեռանկար, լավ օդափոխության հնարավորություն և հարմար հասցե:

Գրասենյակի տարածքը մեծացել է տարիների ընթացքում՝ թիմի աճին զուգահեռ։ Սկզբում ամբողջ ընկերությունը մեկ հարկ էր զբաղեցնում։ Այս պահին միայն գլխամասը զբաղեցնում է երեք հարկ, ընկերությունն էլ ունի ևս երեք գրասենյակ Հայաստանում (Երևանում և Գյումրի քաղաքում) ու երեք մասնաճյուղ Ուկրաինայում։

Գլխամասի բոլոր երեք հարկերն ստեղծվել են առավել նպաստելու ու արդյունավետ դարձնելու թիմի աշխատանքային առօրյան՝ հետաքրքիր և մտածված, ազատ, բայց միշտ պրոֆեսիոնալ, ոճային, բայց նաև ֆունկցիոնալ:

Այսպիսով, փորձենք նկարների միջոցով փոխանցել դրական ու անմիջական տրամադրությունը, որ տիրում էր գրասենյակում։

VOLO-ն առաջին ՏՏ կազմակերպություններից է եղել Հայաստանում, որը սովետական ոճի գրասենյակներից անցում է կատարել ավելի ոճային, ժամանակակից ու միասնական open space ձևաչափին: Ինչպես նշում են կազմակերպության համահիմնադիրները, open space-ն ավելի համապատասխան է VOLO-ի արժեքներին և ոճին:

Այս ձևաչափը VOLO-ի բաց լինելու մասին է խոսում և նպաստում է անմիջական ու արագ շփմանն ու ընկերության բազմաթիվ աշխատակիցների միջև հաղորդակցության և համագործակցության խթանմանը:

Թիմակիցները կիսվեցին, որ սկզբնական շրջանում աշխատակիցներին դժվար էր հարմարվել այդ փոփոխությանը և բաց տարածքում անսովոր աղմուկին։ Ուստի հաջորդ երկու հարկերի ներքին հարդարանքի ժամանակ թիմը որոշեց էլ ավելի բարելավել open space-ի պայմանները տարբեր հետաքրքիր լուծումներով՝ բաժանիչ կահույքի անցումներով, բուսականությամբ, փոքր կոնֆերանս սրահներով և զանգերի հատուկ սենյակներ նախատեսելով։

Ինչպես գիտենք, համավարակից հետո բազմաթիվ ՏՏ կազմակերպություններ  սկսեցին փոփոխել աշխատանքային ձևաչափը։ Այժմ VOLO-ի աշխատակիցները հնարավորություն ունեն հիբրիդային ձևաչափով աշխատելու՝ շաբաթվա մեկ կամ մի քանի օրը աշխատելով տնից։ Բայց, ինչպես իմացանք, համավարակից հետո աշխատակիցներն ավելի շատ են ձգտում գալ գրասենյակ, քանի որ կարոտում են թիմակիցներին և հարմար աշխատանքային պայմանները։

VOLO-ում միշտ ջերմ ու ընտանեկան միջավայր է տիրում։ Այստեղ, ինչպես և ցանկացած ընտանիքում, կարևորվում է խոհանոցը․ բոլոր գրասենյակներն ունեն խոհանոց, և աշխատանքային առօրյան սկսվում է խոհանոցից՝ մի բաժակ սուրճի շուրջ քննարկումներով։

Խոհանոցն այն վայրն է, որը միավորում է բոլոր թիմակիցներին՝ անկախ իրենց մասնագիտացումից ու նախագծից։ Այստեղ ամեն ինչ եփվում է՝ թե՛ նոր գաղափարներն ու նախագծերի շուրջ քննարկումները, թե՛ համեղ ուտեստները։

Ընկերությունը հաճախակի է կազմակերպում թիմային հավաքներ գրասենյակից դուրս, բայց կան նաև բազմաթիվ հետաքրքիր սովորություններ ու թիմային փոքր տոներ, որոնք նշվում են հենց գրասենյակում (առաջին աշխատավարձ կամ կարևոր մասնագիտական ձեռքբերում, որոնք միշտ տոնում են համեղ հյուրասիրությամբ)։ Յուրաքանչյուր ամսվա վերջին ուրբաթ օրը աշխատակիցները հավաքվում են խոհանոցում «Ուրախ ուրբաթ»-ով ամփոփելու ամիսը և միասին թիմային խաղեր խաղալու ու լավ ժամանակ անցկացնելու։

Գրասենյակի երեք հարկերը՝ թե՛ գույների ու հումքի, և թե՛ տարածքի ճիշտ ու մտածված բաժանման շնորհիվ, ապահովում են հարմար ու արդյունավետ աշխատանքային գործընթաց։

Արդյունավետ աշխատանքային օր ապահովելու համար կազմակերպությունը կարևորում է նաև հարմար հանգստի տարածքն ու լարված առօրյայից կտրվելու հնարավորությունները, օրինակ՝ մերսման աթոռը, շախմատ կամ PlayStation խաղալու սենյակները և պասիվ հանգստի գոտին, որը աշխատակիցներից շատերի սիրելի վայրերից է։ Այն իր տեսքով նման է սաունայի և շատերը հենց այդպես էլ անվանում են հանգստի այս անկյունը։

VOLO-ում շախմատի սիրահարների թիմ կա, և հաճախակի կազմակերպվում են ներքին թիմային մրցաշարեր։

Գրասենյակում կա նաև մասնագիտական գրադարան․ աշխատակիցների համար պարբերաբար պատվիրվում են իրենց նախընտրած գրքերը և մասնագիտական զարգացման դասընթացները։

Բացի այդ, աշխատակիցների ընդհանուր զարգացման համար գործում են տարբեր դասընթացներ՝ օտար լեզուների, ծրագրավորման ու որակի ապահովման։ Անգլերենից զատ, աշխատակիցները հնարավորություն ունեն նաև գերմաներեն սովորելու, քանի որ կազմակերպությունը հիմնականում աշխատում է անգլախոս և գերմանախոս շուկաների հետ։

Հուսով ենք՝ կարողացանք նկարների միջոցով մի փոքր ծանոթացնել լավագույն գրասենյակներից մեկի աշխատանքային առօրյային։ Քանի որ թիմը շարունակում է մեծանալ ու նոր ծառայություններ առաջարկել իրենց հաճախորդներին, VOLO-ն այժմ նոր ավելի մեծ շենք է կառուցում, ինչպես նաև պլաններ ունի Հայաստանի այլ քաղաքներում և երկրից դուրս նոր գրասենյակներ բացելու:
Սպասենք թիմի նորություններին։

VOLO-ի գրասենյակով շրջայց կատարելու համար կարող եք անցնել այս հղումով։

Powered by staff.am.