Հայոց բանակի կազմավորման օրը կարևորագույն իրադարձություն է մեր պատմության մեջ, որն ուրվագծում է Հայաստանի ազգային անվտանգության, կայունության ու ինքնուրույնության հիմքերը։ staffmedia.am-ում մենք հաճախ անդրադառնում ենք տարբեր մասնագիտությունների, և հենց այսօր է, որ պիտի խոսենք բանակի գոյության և շենացման հիմքում կանգնած մասնագետների՝ զինվորականների և սպաների մասին՝ նպատակ ունենալով բացահայտել այդ մասնագիտության էությունը, դրա պահանջները և նշանակությունը։
Հայոց բանակի կազմավորման օրվա առթիվ վերանայել ու գնահատել մեր զինվորականների ու հատկապես սպաների դերը՝ նշանակում է խոսել այն մարդկանց մասին, ովքեր ոչ միայն աշխատում են ռազմի դաշտում, այլև ապրում են հայրենասիրության, անձնական պատասխանատվության և նվիրվածության մի անսահման ուղիով։ Զինվորականի մասնագիտությունը՝ հատկապես սպայի աշխատանքը, ոչ միայն կարիերայի, այլև կյանքի ընտրություն է։ Յուրաքանչյուր զինվորական ստանձնում է պատասխանատվություն ոչ միայն իր անձի, այլև համայնքի, երկրի և ազգի համար։
Այսպիսով, եկեք փորձենք միասին հասկանալ, ինչու ընտրել զինվորականի մասնագիտությունը, որտեղ ստանալ անհրաժեշտ կրթությունը և ինչպես դառնալ լավ մասնագետ։
Ինչու՞ ընտրել հայրենիքի պաշտպանի մասնագիտությունը
Հայաստանի զինված ուժերում ծառայելը՝ միայն աշխատանք չէ, այլ առաքելություն, որին նվիրված լինելը մեծագույն պատիվ է։ Ծառայելով ՀՀ զինված ուժերում՝ զինծառայողները ունեն մի շարք արտոնություններ, ինչպիսիք են՝
- Աշխատանքային երաշխիքներ – Զինծառայողները չունեն աշխատանքի կորստի վտանգ, քանի որ նրանց չեն կարող ծառայությունից դուրս թողնել մինչև կենսաթոշակի իրավունք ստանալը՝ բացառությամբ որոշակի պայմանների։
- Նյութական ապահովություն – Զինծառայողները ապահովված են պետական ֆինանսական, պարենային և հանդերձանքային աջակցությամբ, իսկ սահմանված կարգով ծառայությունից արձակվելու դեպքում նրանք ստանում են դրամական օգնություն՝ համաձայն իրենց ծառայության ժամկետների։
- Արձակուրդներ և հանգստի ժամանակ – Զինծառայողները ստանում են կանոնավոր արձակուրդներ՝ ծառայության տարիներին համապատասխան, ինչը նպաստում է առողջության և բարեկեցության պահպանմանը։ Ունեն նաև հանգստի լրացուցիչ օրեր, եթե աշխատում են տոնական կամ ոչ աշխատանքային օրերին։
- Բժշկական սպասարկում – Զինծառայողներն ու նրանց ընտանիքները անվճար բժշկական ծառայություններ են ստանում, ինչը մեծապես նպաստում է առողջության պահպանմանը։
- Բնակարանային ապահովություն – Զինծառայողները և նրանց ընտանիքները ապահովվում են ծառայողական բնակարաններով կամ բնակարան ձեռք բերելու համար դրամական փոխհատուցմամբ։
- Կրթություն և մասնագիտական զարգացում – Զինծառայողները հնարավորություն ունեն կրթություն ստանալու ռազմաուսումնական հաստատություններում կամ մասնագիտական վերապատրաստման կուրսերում, ինչը թույլ է տալիս զարգացնել իրենց մասնագիտական հմտությունները։
- Տրանսպորտային արտոնություն – Զինծառայողները ունեն անվճար տրանսպորտային արտոնություններ։
Զինվորական ծառայությունը ոչ միայն ապահովում է նյութական արտոնություններ, որոնց մասին խոսեցինք, այլ նաև տալիս է մի շարք ոչ նյութական առավելություններ։ Այն հնարավորություն է տալիս ծառայելու հայրենիքին՝ պաշտպանելով նրա անվտանգությունը ու տարածքային ամբողջականությունը։ Բացի այդ, զինվորական ծառայությունն առաջընթաց է ապահովում անձնական ու մասնագիտական զարգացման գործում՝ մշտապես բարելավելով ֆիզիկական պատրաստվածությունն ու տեխնիկական հմտությունները։ Այն պահանջում է բարձր բարոյական չափանիշներ, ինչպիսիք են արդարությունը, պատասխանատվությունը և նվիրումը, որոնք նպաստում են անձնական աճին և դարձնում մասնագիտությունը կյանքի փիլիսոփայություն։
Որտե՞ղ և ի՞նչ կրթություն ստանալ
Ժամանակակից զինվորական դառնալու համար անհրաժեշտ է հատուկ կրթություն և շարունակական մասնագիտական զարգացում։ Հայաստանում և արտերկրում կան բազմաթիվ կրթական հաստատություններ, որոնք պատրաստում են զինվորականներ՝ հիմնված բարձր կրթական ստանդարտների վրա։
Հայաստանի ռազմական ուսումնական հաստատություններ
Հայաստանում գործում են մի շարք ռազմական ուսումնական հաստատություններ, որոնք նախատեսված են զինվորականներին բարձրագույն կրթություն տրամադրելու համար։ Այս հաստատությունները առաջարկում են կրթական ծրագրեր, որոնք նախատեսված են ոչ միայն սպայական կազմի, այլ նաև այլ ռազմական ոլորտներում մասնագիտացված զինծառայողների համար։ Այդպիսիք են օօրինակ, ՀՀ ՊՆ Վ. Սարգսյանի անվան ռազմական ինստիտուտը,ՀՀ պաշտպանության նախարարության Ազգային ռազմավարական հետազոտությունների ինստիտուտը, ՀՀ ՊՆ Ռազմական ավիացիայի ինստիտուտ, ԵՊԲՀ ռազմաբժշկական ֆակուլտետ, ՀՀ ՊՆ Մոնթե Մելքոնյանի անվան ռազմամարզական վարժարանը, որոնք տրամադրում են բարձրակարգ մասնագիտական կրթություն և պատրաստություն, որն ուղղված է տարբեր զորատեսակների, ինչպես նաև պաշտպանության այլ ոլորտների հատուկ մասնագետների պատրաստմանը։
Միջազգային կրթություն
Բացի Հայաստանում գտնվող կրթական հաստատություններից՝ կարելի է կրթություն ստանալ նաև արտերկրում՝ մասնակցելով միջազգային ռազմական ակադեմիաների ծրագրերին, ինչպիսիք են ՆԱՏՕ-ի ռազմական ակադեմիան, ԱՄՆ զինված ուժերի գլխավոր հրամանատարական դպրոցը, ՌԴ Զինված ուժերի Գլխավոր շտաբի ռազմական ակադեմիան, Ֆրանսիայի բանակի գլխավոր սպայական ակադեմիան և այլն։ Այստեղ, սովորաբար, ուսանողները ձեռք են բերում լայնածավալ ռազմական կրթություն՝ տիրապետելով ռազմավարական, մարտական, տեխնիկական և ինժեներական գիտելիքներին։ Այդպիսի ծրագրերը հնարավորություն են տալիս ծանոթանալու նաև միջազգային փորձին, դրա լավագայուն օրինակները Հայաստանում ներդնելու նպատակով։
Ազգային և միջազգային ծրագրեր
Զինվորական մասնագիտություն ընտրելու կարևոր դրույթներից է նաև միջազգային ծրագրերում մասնակցությունը, որոնք հնարավորություն են տալիս ձեռք բերել նորագույն ռազմական փորձ ու մասնագիտական գիտելիքներ։ Այսպիսի ծրագրերը ընձեռում են անհավատալի հնարավորություն՝ համագործակցելու գործընկեր պետությունների բանակների հետ, համատեղ գործողություններ իրականացնել ու բացահայտել նոր մարտավարություններ ու ռազմավարական մոտեցումներ՝ ստեղծելով վստահություն ու ամրապնդելով միջազգային համագործակցությունը։
Ինչպե՞ս դառնալ լավ մասնագետ
Լավ զինվորական դառնալը նշանակում է լինել մասնագետ՝ բարձր մարտական պատրաստվածությամբ, ուժեղ առաջնորդական հատկանիշներով և բազմակողմանի գիտելիքներով։ Դառնալու համար լավ զինվորական՝ պետք է աշխատանքը կատարել անբասիր, լինել նվիրված, ձգտել կատարելագործվել և զարգացնել նոր հմտություններ։ Ահա մի քանի խորհուրդ, թե ինչպես կարելի է լինել լավ զինվորական։
Զարգացնել առաջնորդման հմտություններ
Մարտի դաշտում և իրական կյանքում լավագույն զինվորականները այն մարդիկ են, ովքեր կարողանում են ոգեշնչել և առաջնորդել՝ միաժամանակ ծառայելով իրենց ենթակաների և հայրենիքի շահերին։ Լինել լավ առաջնորդ՝ նշանակում է նախ սովորել ծառայել, քանի որ իսկական առաջնորդությունը հիմնված է ծառայողական հոգեբանության վրա: Զինվորականը, ով գիտակցում է իր պարտականությունը իր զինակիցների և հայրենիքի հանդեպ, դառնում է ոչ միայն ղեկավար, այլ նաև ոգեշնչման աղբյուր։ Նրա ուժը բխում է իր պարտքի գիտակցությունից, իսկ բարոյական հիմքը՝ ծառայության նկատմամբ ունեցած պատասխանատվությունից։
Տեխնիկական և ռազմավարական գիտելիքներ
Ժամանակակից զինվորականը պետք է կարողանա աշխատել բարձր տեխնոլոգիաներով՝ զինվորական սարքավորումներից մինչև կիբեռանվտանգության համակարգեր։ Անհրաժեշտ է տիրապետել նորագույն ռազմավարական մտածողության մեթոդներին, արագ իրավիճակների վերլուծությանը և ճկուն մարտավարությանը։
Բարձր ֆիզիկական պատրաստվածություն և հոգեբանական կայունություն
Բարձր ֆիզիկական պատրաստվածությունը զինվորականին թույլ է տալիս դիմանալ ծանր մարտական իրավիճակներին, կատարելագործել իր կարողությունները և մնալ մարտունակ։ Հոգեբանական կայունությունը նույնպես անհրաժեշտ է՝ ծայրահեղ իրավիճակներում ճիշտ արձագանքելու համար։
Զինվորականի մասնագիտությունը պարզապես կարիերայի ընտրություն չէ, այն կյանքի նպատակ է՝ ծառայել մեր հայրենիքին, ժողովրդին և պետությանը։ Դառնալով զինվորական՝ դուք ոչ միայն սկսում եք մասնագիտական գործունեություն, այլ դարձնում եք ձեր կյանքը նվիրվածության ու պատասխանատվության ճանապարհ՝ պաշտպանելով այն արժեքները, որոնք ապահովում են միր ամբողջ ազգի անվտանգությունը։ Այս ճանապարհը պահանջում է խորը նվիրվածություն, համառություն ու անսահման պատասխանատվություն՝ ամրապնդելով մեր ազգային անվտանգությունն ու կայունությունը։
Եթե դուք պատրաստվում եք ընտրել այս ուղին, ապա հուսով ենք, որ մեր այս հոդվածը կարողացավ ձեզ ներկայացնել զինվորականի մասնագիտության ինչպես գրավիչ, այնպես էլ անձնվեր կողմերը, որպեսզի դուք պատրաստ լինեք լիովին նվիրվելու հայրենիքին ծառայելու այս բարձր կոչմանը։
