Նոր տարվա մի քանի օգտակար նվեր` ընդառաջ գնալու Նոր–ին | Ձմեռ պապի ուղերձը

 «Բարև՜, սիրելի գործընկերներ:

Շուտով տարեմուտն է: Նկատած կլինեք արդեն, թե որքան գեղեցիկ է զարդարված քաղաքը, իսկ ձեր աշխատանքային միջավայրում արդեն տիրում է տոնական տրամադրություն. գուցե շատերդ արդեն հասցրել եք խաղալ «գաղտնի սանտա», նախագծել նոր ծրագրեր ու նպատակներ:

Այս նամակն այժմ կարդում են տարբեր մասնագիտությունների, զբաղվածության, հմտությունների, արժեհամակարգի, կենսուղու տեր և կարիերայի տարբեր փուլերում գտնվող աշխատակիցներ ու ղեկավարներ: Շատերդ էլ գուցե դեռ նոր պետք է ավարտեք բուհը և մուտք գործեք աշխատաշուկա, ձեզնից ոմանք  էլ, հնարավոր է, դեռ չեն գտել իրենց երազած աշխատանքը, իսկ շատերդ էլ ամեն առավոտ ժպիտով եք բացում գրասենյակի դուռն ու ինքնառեալիզացման ճանապարհն անցնում եք սիրով, փութաջանությամբ:

 Իրավիճակները տարբեր են, երազանքներն ու նպատակները` նույնպես, նախագծերը` զանազան, իսկ գործնական հարաբերությունները` լայն ու բազմաշերտ:

Բոլորս սպասում ենք, ակնկալում, որ այն, ինչ չենք հասցրել, կփորձենք մյուս տարի:

Առջևում «Նոր-ն» է` հույսի ու, միաժամանակ, անորոշության տարրերով:

Գրում եմ նամակը` փոքրիշատե օգնելու, որ միասին կարողանանք դիմավորել այդ «Նորը»` է’լ ավելի լավ պատրաստվելու և հնարավորինս ճիշտ ու արագ կողմնորոշվելու կայծակնային արագությամբ սլացող ու զարգացող այս աշխարհում:

Այսպես, թոփ  10  նվեր, որ իմ սեփական պարկից (փորձառությունից, դիտարկումներից) ցանկանում եմ պարգևել ձեզ` տարվա յուրաքանչյուր ամիսը համահունչ ու ներդաշնակ ապրելու, արարելու և աշխատելու ակնկալիքով:

Նվեր 1. Դրական մտքեր ու գոհունակություն

Մարտահրավերներով լի աշխարհում երբեմն դժվար է հենարան գտնել ու վստահությամբ նախագծել նոր ծրագրեր:

Աշխարհի բացասական աղմուկն, անշուշտ, մեզ խանգարում է կենտրոնանալ անելիքների վրա: Ուստի, իմ պարկից ձեզ նվիրում եմ դրական մտքեր: Ամեն առավոտ աշխատանքի գնալիս մտածեք, որ հենց ձե՛ր դրական մտքերից է աշխարհը դառնում ավելի լավը: Գոհունակ եղեք ձեր ունեցածի համար` այդպիսով հող նախապատրաստելով նաև «Նոր»-ի համար:

Նվեր 2. Սովորելու և անվերջ կատարելագործվելու ցանկություն

 Խելահեղ արագությամբ փոփոխվող աշխարհում մարդ կարող է երբեմն ինքն իրեն կորցնել` չհասկանալով, թե ուր է գնում, ինչ է ցանկանում, ինչ մասնագիտություն ու հմտություններ պետք է յուրացնի, որ  մշտապես «արևի տակ իր տեղն ունենա»:

Եթե 20 տարի առաջ մեկ բուհական կրթությունը բավարար էր` ամբողջ կյանքում տվյալ մասնագիտությամբ աշխատելու ու ինքնադրսևորվելու համար, ապա ժամանակակից տեխնոլոգիաների կատարելագործումը ստիպում է մարդուն անդադար կրթվել, վերապատրաստվել ու ձեռք բերել նոր հմտություններ:

Արհեստական բանականության առաջ քաշած մարտահրավերներից զատ կարելի է նկատել նաև մի շարք առավելություններ, որոնցից է նաև անվերջ սովորելու անհրաժեշտությունը: Այս նվերը համարում եմ լավագույններից մեկը գալիք տարվա համար, քանի որ սովորելը կամ նորի նկատմամբ բաց լինելը մեզ մշտապես պահում է երիտասարդ, կայտառ, ինքնավստահ ու ճկուն:

Կան բազմաթիվ հարթակներ, որոնք դյուրացնում են այս գործընթացը: Դրանցից մեկին շատերդ արդեն հասցրել եք ծանոթանալ:

Նվեր 3. Աշխատանքային նոթատետր

 Մանրուք է, գիտեմ: Բայց ամենակարևոր իրերից մեկն է, որ պետք է լինի յուրաքանչյուր աշխատակցի գրասեղանին նաև մյուս տարի:

Ծրագրերն ու աշխատանքը համակարգելու համար կան բազմաթիվ առցանց հարթակներ, սակայն ավանդական նոթատետրերը, օրագրերն ու գրիչները դեռ չեն կորցնում իրենց կարևորությունն ու ակտուալությունը:

Աշխատանքը ճիշտ կազմակերպելու համար այն հիանալի գործիք ու նվեր է:

Նվեր 4. Ժամանակը կառավարելու հմտություն

Երբևէ պատահե՞լ է, որ 24/7 ռեժիմը չբավարարի ձեզ` իրագործելու բոլոր ծրագրերն ու գաղափարները:

Դե ինչ, կարելի է առաջադրանքներն ու խնդիրները, համաձայն մի շարք հոգեբանների, բաժանել մասերի: Նախընտրելի է, որ օրվա սկզբում արդեն իսկ սահմանեք, թե դրանցից որոնք են առավել առաջնային և բարդ: Նախ ավարտել մեկ առաջադրանքը, հետո անցնել մյուսին` «բարդից դեպի հեշտ» սկզբունքով:

Ժամանակի կառավարման առավել մանրամասն ու արդյունավետ խորհուրդներ կարելի է ընթերցել նաև staffmedia.am-ի նախորդ հոդվածներից մեկում:

Ապագան կանխատեսելու լավագույն միջոցն այն ստեղծելն է

Աբրահամ Լինքոլն

Նվեր 5. Հաղորդակցման հմտություններ

Թվում է, եթե մարդն ունի խոսելու ունակություն, արդեն իսկ կարող է հաղորդակցվել, բայց արի ու տես, որ հաղորդակցումն ամենաանհրաժեշտ նվերներից մեկն է, որ աշխատակիցներն ու ղեկավարները կարող են երբևէ իրենց թույլ տալ: Ինչու՞: Որովհետև ճիշտ ու գրագետ հաղորդակցումը պահանջում է հստակ ու համբերատար աշխատանք:

Վերջերս մի գիրք էի ընթերցում, որտեղ հեղինակը սովորեցնում էր հաղորդակցման մեջ լինել հնարավորինս ճկուն և կարողանալ լուծել անգամ ամենխրթին հարցերը` դուրս գալով եսակենտրոնության որոգայթներից: Խոսքը Միխայիլ Լիտվակի «Հոգեբանական այկիդո» գրքի մասին է, որն, ի դեպ, առաջիկայում գուցե ներկայացվի «Շաբաթվա գիրքը» նախագծի շրջանակներում:

Պետք է նկատեմ, որ պրոֆեսիոնալ հաղորդակցումը պահանջում է ամեն օրվա աշխատանք: Ճիշտ հաղորդակցվելու նվերը մեզ շնորհում է մեկ այլ պարգև` հույզերի կառավարում: Համաձայն չե՞ք:

Նվեր 6. Շուտ արթնանալու սովորություն

Պատկերացրեք, որ արթնանում եք առավոտյան ժամը 5-ին և աշխատանքի շտապելուց առաջ նախ մեկ կամ երկու ժամ վայելում եք սկսվող օրը, որևէ հաճելի երաժշտություն, սիրելի գրքի ընթերցումը, կատարում եք ֆիզիկական  կամ շնչառական վարժություն: Հաճելի է, չէ՞:

Առավոտը ճիշտ սկսելու սովորությունն ինձ փոխանցել է հայտնի գրող Հերթը Ջեյմս Քլիըրը, երբ ընթերցում էի իր «Ատոմային սովորություններ» գիրքը, որը ևս հիանալի նվեր է` մոտիվացվելու և հետևողական քայլերով ճիշտ սովորություններ ձևավորելու համար:

Այսպես, մենք սովորում ենք չճահճանալ առօրյա պարտականությունների մեջ, այլ նաև ժամանակ տրամադրել մեզ` որպես անհատների:

Նվեր 7.  Սպորտ, արշավներ և հանգստի այլ ակտիվ միջոցներ

Ֆիզիկական վարժություններն ու ակտիվ կենսակերպը նպաստում են ոչ միայն ֆիզիկական, այլև մտավոր ու հոգեկան առողջությանը: Մարզասրահ այցելողները կփաստեն, թե որքան շատ էներգիայով, ճկունությամբ ու լավատեսությամբ են հագենում յուրաքանչյուր պարապմունքից հետո: Սպորտն, ի դեպ, սթրեսակայունության լավագույն խթանիչներից է: Ուստի, արդյունավետ աշխատելու համար ժամանակ գտեք նաև մարզասրահ այցելելու համար:

Նվեր 8. Ժամանակավոր դադարներ

 Ընթերցողներից մարդ կա՞, որ աշխատում է 24/7, չի էլ հիշում, թե վերջին անգամ երբ է հանգստացել: Իհարկե: Եվ գուցե հենց հիմա վերապրում եք «հուզական այրում»: Դե ինչ, ժամանակն է, մի փոքր դադար տալու, հանգստանալու:

Հանգիստն ամենակարևոր բաղադրիչներից է է’լ ավելի լավ աշխատելու համար:

Beyond podcast-ի այս թողարկումը ձեզ կօգնի հասկանալ ինչպես ճիշտ կազմակերպել աշխատանք/կյանք բալանսը և խուսափել հուզական այրումից։

Նվեր 9. Նպատակների հստակ սահմանում

Ցանկացած գործունեություն` կրթություն, աշխատանք, հոբբիներ, պետք է ունենան հստակ ձևակերպված նպատակներ: Եթե չկան նպատակներ, շատ հեշտ է հանձնվելն ու ընկճվելը անգամ չնչին ձախողումից հետո:  

Նվեր 10. Հիմա և այստեղ լինելու կարողություն

Երբ նայում եմ շուրջս, նկատում եմ, թե որքան երջանիկ են մարդիկ, որոնք ամեն տեղ կարողանում են լինել հիմա և այստեղ: Աշխատանքում` ամբողջովին ընկղմվում են առաջադրանքների մեջ, ընկերների հետ ի սրտե վայելում են երեկոն, ընտանիքում լիարժեք հայր կամ մայր են` անգամ բազմազբաղ աշխատանքային առօրյայից հետո: Նրանք հազարավոր խնդիրներ են հաղթահարում, ունենում են ինչպես դրական, այնպես էլ բացասական փորձ, սակայն միշտ այստեղ են և հիմա: Այս կարողությունը, թերևս, ամենակարևորներից է, որը տանում է դեպի ինքնաճանաչողության և ինքնաբավության:

Դե ինչ, հարգելիներս: Հուսամ` գալիք տարվա ընթացքում մեզնից  հենց յուրաքանչյուրը կլինի այն «Նորը», որն աշխարհը դարձնում է առավել բարի, ստեղծարար ու նոր:

Շնորհավոր Ամանոր և Սուրբ Ծնունդ…»