Հայացք ներսից՝ Թումո ստեղծարար տեխնոլոգիաների կենտրոն

Հայացք աշխարհից Հայաստան՝ որպես տարածաշրջանում նորարարական ու տեխնոլոգիական կենտրոն, շատ ոգևորող ու իրականանալի է թվում, և ակամայից պատկերացնում ենք, որ մեր երկիրը կարող է դառնալ այն կենտրոնը, ուր ձգտում են գալ ու աշխատել նոր տաղանդները՝ թե այլազգի, թե ազգությամբ հայ։ Այստեղ շատերիդ մոտ հարց կառաջանա․ իսկ ինչպե՞ս ենք մենք հասնելու այդ տեսլականին, ի՞նչ քայլեր են արվում այդ ուղղությամբ։

Այդ առիթով է, որ մենք staff.am-ում որոշեցինք հայացք ուղղել ներսից հասկանալու ու ամբողջովին բացահայտելու այն կենտրոնը (կամ գուցե նաև կենտրոնները, շուտով կտեսնենք :)), որն այսօր թռիչքուղի է պատրաստել դեպի նոր հայկական իրականություն։

Խոսքը Թումո ստեղծարար տեխնոլոգիաների կենտրոնի մասին է, ուր մեր վիրտուալ այցի համար հատուկ շնորհակալ ենք ՄՌ բաժնի ավագ ղեկավար Ցոլինե Ավեդիսյանին։

Դե ինչ, գնացինք 🙂

Ի՞ՆՉ Է ԹՈՒՄՈՆ

Ինչ է Թումոն, կարելի է ասել բոլորս գիտենք, բայց երբ նայում ենք ներսից, պատասխանները նույնչափ տարամիտվում են, ստանում են տարբեր երանգներ, իսկ ամենավերջում կրկին միավորվում մեկ հավաքական արտահայտության ներքո՝ Ստեղծարար տեխնոլոգիաների կենտրոն։

Եթե փորձենք սահմանել այնպես, ինչպես գրեթե բոլորիս է հայտնի, ապա Թումոն կրթական ծրագիր է արդեն 12 տարին լրացած պատանիների համար։ Այն մի բացառիկ ուսումնական հարթակ է տեխնոլոգիաների և դիզայնի միջակայքում։ Հաճախելով Թումո՝ պատանիները ծանոթանում են Թումոյի 14 հիմնական ոլորտների հետ և ստանում իրենց ապագան կերտելու անհրաժեշտ գործիքները։

Իսկ ի՞նչ է Թումոն աշխատակցի աչքերով՝

«Ինձ համար Թումոն մի հրաշալի աշխատանքային վայր է, որը հնարավորություն է տալիս աշխատելու, ինքնահաստատվելու, հարուստ փորձ ձեռք բերելու, դառնալու ավելի ստեղծագործ ու համարձակ»,- նշեց ՄՌ բաժնի ավագ ղեկավար Ցոլինե Ավեդիսյանը։

Այլ կերպ, կարող ենք ասել, որ Թումոն կենտրոն է, որտեղ յուրաքանչյուր աշխատակից ունի բացառիկ հնարավորություն իր լուման ներդնելու ապագա սերնդի կրթության մեջ։

ԵՐԵՎԱՆԻՑ ՄԻՆՉԵՎ ԲԵՌԼԻՆ

Եթե հետևում եք տեխնոլոգիական աշխարհի նորություններին, ապա հաստատ լսել եք Թումոյի աշխարհագրական ընդլայնման, նոր Թումո կենտրոնների բացման մասին։ Բայց մենք ձեզ հետ այսօր կբացահայտենք ավելին՝ պատասխանելով ե՞րբ, որտե՞ղ, ովքե՞ր հարցերին 🙂

Այսպես, 2011թ․-ն էր, բացվեց առաջին Թումո կենտրոնը Երևանում, որտեղ սկսեց աշխատել շուրջ 60 մասնագետ։ Կենտրոնը խոստումնալից էր ու շատ արագ ապացուցեց իր գործունեության մոդելի հաջողակ լինելը։ Այս պահին արդեն Երևանի Թումո կենտրոն են հաճախում ավելի քան 15,000 ուսանող։

Ընդամենը երկու տարի անց՝ 2013թ․-ին Դիլիջան քաղաքում  Կենտրոնական բանկի հետ համագործակցության շրջանակներում բացվեց երկրորդ կենտրոնը։ Դիլիջանում կենտրոնի բացումը հնարավորություն տվեց ոչ միայն տվյալ տարածաշրջանի երեխաներին այցելել Թումո, այլ նաև ստեղծել աշխատատեղեր մարզում՝ այս պահին մեկ հարկի տակ միավորելով ավելի քան 11 աշխատակցի։ Այժմ աշխատանքներ են կատարվում Դիլիջանի Թումո կենտրոնի տարածքի ընդլայնման հետ կապված, որպեսզի ավելի շատ ուսանողներ կարողանան հաճախել:

2015 թվականին իր դռները բացեց Թումոյի երրորդ կենտրոնը Գյումրի քաղաքում։ Կենտրոնը շուտով կտեղափոխվի Գյումրիի պատմական թատրոնի շենք, որտեղ ավելի մեծ թվով ուսանողներ կկարողանան հաճախել, ուսանողների թիվը 2000 -ից կհասնի 4000-ի։

Մյուս կենտրոնը գործում է Ստեփանակերտ քաղաքում։

Շուտով Հայաստանում ևս 2 կենտրոն կբացվի՝ Կողբում և Մասիսում։

Բացի մարզային աշխարհագրությունից, ուշագրավ են նաև Թումոյի միջազգային ձեռքբերումները։ 2018 թվականին Փարիզում բացվեց Թումոյի առաջին միջազգային կենտրոնը, որին արդեն հաջորդեց Բեյրութում Թումո կենտրոնի բացումը։

Շուտով Ալբանիայի մայրաքաղ Տիրանայում, Գերմանիայի մայրաքաղ Բեռլինում են բացվելու նոր Թումո կենտրոններ, ինչպես նաև Մոսկվայում, Կիևում և այլ քաղաքներում։

ԹՈՒՄՈ ԿՐԹԱԿԱՆ ԾՐԱԳՐԵՐՆ ՈՒ ՆՈՐ ՆԱԽԱԳԾԵՐԸ

Նոր Թումո կենտրոնների բացմանը զուգահեռ ավելանում են նաև այն ստեղծարար ու նորարարական ծրագրերն ու նախագծերը, որոնք գալիք սերունդներին պատրաստում են աշխատանքի ապագայի համար։ Ի լրումն ծրագրավորման, դիզայնի, ռոբոտաշինության, ֆիլմարտադրության և այլ հմտությունների ուսանմանը՝ Թումո կենտրոնը հիմք դրեց մեկ այլ կրթական ծրագրի՝ «Թումո ստուդիաներ»-ի։

«Թումո ստուդիաներն արհեստի և դիզայնի ոլորտի կրթական ծրագիր է երիտասարդ մասնագետների համար»:

«Թումո ստուդիաներ»-ի նպատակն է ձևավորել ու արտադրել, օրինակ, կրելու, առօրյայում օգտագործելու և, ինչու ոչ, ուտելու ապրանքներ, զարգացնել արհեստագործական, լուսանկարչական, նորաձևության, նաև հայկական խոհարարական արվեստի ուղղությունները:

Այսօր «Թումո ստուդիաներ»-ում աշխատում են կավագործներ, զարդերի պատրաստման  մասնագետներ և մի շարք այլ մասնագետներ, ովքեր իրենց գիտելիքն ու փորձն են փոխանցում մեր երիտասարդներին։

Հետևել «Թումո ստուդիաներ»-ին staff.am-ում

Թումո ստուդիաների աշխատարաններին կարող են մասնակցել 16-28 տարեկան երիտասարդներ։

2019 թվականը հատկանշական էր Թումոյի համար։ Եվրոպական միությունը և Թումո ստեղծարար տեխնոլոգիաների կենտրոնը հայտարարեցին «ԵՄ ԹՈՒՄՈ ինժեներական և կիրառական գիտությունների համալիր» նախագծի մեկնարկը: Համալիրի համար Թումոյին կից կառուցվելու է նոր շինություն, որը ստեղծելու է բազմաթիվ նոր աշխատատեղեր, և որը լինելու է հետազոտությունների, ստարտափների հանգույց։ Այսօր այդ նախագծի վրա աշխատում են հայ և արտերկրից Հայաստան ժամանած  ոլորտի առաջատար մասնագետներ։

ԵՄ Թումո ինժեներական և կիրառական գիտությունների համալիրի նախագծերից մեկը «42 Երևան»-դպրոցն է, այն ծրագրավորման ֆրանսիական առաջատար ուսումնական կենտրոն է, որի նպատակն է կրթել ապագայի լավագույն ծրագրավորողներին ու հիմք ստեղծել նրանց հաջողակ ապագայի համար: Այս համագործակցության շնորհիվ ԵՄ Թումո համալիրը կլրացնի Հայաստանում բարձր որակավորման ծրագրավորողների անհրաժեշտ թիվը` զարկ տալով տեղեկատվական տեխնոլոգիաների և ստարտափների ոլորտին:

Այստեղ կարելի է խոսել նաև Թումոյի մեկ այլ նորարարական նախաձեռնության «Թումո-տուփ» ծրագրի մասին, որը հնարավորություն է տալիս առանց շինարարական մեծ ծախսերի փոքր համայնքների պատանիների համար հասանելի դարձնել Թումոյի կրթական ծրագիրը։

«Թումո-տուփը փոքր, սակայն տեխնիկապես հագեցած մինի Թումո է, այն կարող է տեղադրվել ցանկացած քաղաքում կամ գյուղում և ծառայել որպես Թումոյի ինքնաուսուցման համար նախատեսված տարածք՝ տեղի պատանիների համար: Առաջին Թումո-տուփը կունենանք Բերդ քաղաքում, այնուհետև կունենանք այլ քաղաքներում ու գյուղերում։

Այս նախաձեռնության շնորհիվ կկարողանանք նաև լուծել մեկ այլ խնդիր՝ աշխատատեղեր ստեղծել մարզերում, երբ մեր երիտասարդները հնարավորություն կունենան աշխատելու հենց իրենց հայրենի քաղաքում կամ գյուղում՝ խթանելով իրենց բնակավայրի զարգացումը»:

ՍՏԵՂԾԱՐԱՐ ՏԵԽՆՈԼՈԳԻԱՆԵՐԻ ԿԵՆՏՐՈՆ ԿԱՄ ԿԵՆՏՐՈՆ, ՈՐՏԵՂ ՄԻԱՎՈՐՎՈՒՄ ՈՒ ՄԵԿ ԸՆՏԱՆԻՔ ԵՆ ԴԱՌՆՈՒՄ ՏԱՐԲԵՐ ՏԱՐԻՔԻ ՈՒ ՄԱՍՆԱԳԻՏՈՒԹՅԱՆ ՄԱՐԴԻԿ

Փորձեցինք հնարավորինս ծանոթանալ այն ահռելի մեծ աշխատանքին, որ տարվում է Թումո կենտրոններում, ու այն նորարարական ծրագրերին, որոնք ևս մեկ ոգեշնչման աղբյուր են հայրենական տեխնոլոգիական էկոհամակարգի համար։ Եվ այժմ կարծում ենք՝ ճիշտ ժամանակն է ծանոթանալու այն մարդկանց, ովքեր ջանք ու եռանդ չեն խնայում Թումոյի առաքելության իրագործման համար։ Այսօր արդեն շուրջ 300 մասնագետ մասնակից է այս մեծարժեք, հետաքրքիր և ստեղծարար աշխատանքին, որոնցից կան մասնագետներ, որոնք հավատարմորեն քայլում են Թումոյի հետ հենց Թումոյի բացման օրվանից։  Եկեք ծանոթանանք՝

ՀԱՇՎԱՊԱՀՈՒԹՅԱՆ ԹԻՄ

Արամ Նարիմանյան 10 տարի

Լուսինե Արասխանյան 9 տարի

Կարմեն Մովսիսյան 9 տարի

Լիանա Պետրոսյան 9 տարի

Սիրաք Կնյազյան 9 տարի

Դավիթ Սողսոմոնյան 9 տարի

ԴԱՍԸՆԹԱՑԱՎԱՐՆԵՐԻ ԹԻՄ

Սուսաննա Գալստյան 9 տարի

Վիոլետ Գրիգորյան 9 տարի

[/one_third][one_third_last]

ԹՈՒՄԱՆՅԱՆԻ ԱՆՎԱՆ ԶԲՈՍԱՅԳՈՒ ԹԻՄ

Ասյա Մանուկյան 9 տարի

Գուրգեն Կիրակոսյան 9 տարի

Ստեփան Մելքոնյան 9 տարի

Պետրոս Վարդապետյան 9 տարի

Սակայն միայն առաքելությունը չէ, որ միավորում է Թումոյի աշխատակիցներին, նշենք մի քանի առավելություններ, որոնք այսօր Թումոն դարձնում են ցանկալի գործատու (Employer of choice) աշխատաշուկայում՝

• Իր տեսակի մեջ յուրօրինակ աշխատանք, քանի որ Թումոյի կրթական մոդելն ինքնին յուրօրինակ է, ուստի մեր աշխատակիցների՝ մասնավորապես պատանիների հետ աշխատող անձնակազմի աշխատանքը հատուկ է, ինչն էլ իր հերթին այն ավելի հետաքրքիր ու գրավիչ է դարձնում:
• Թումոյում տիրում է հարգանքի մթնոլորտ, այստեղ  հարգում են աշխատակիցներին, լսում անհատների կարծիքը, հնարավորություն տալիս աշխատելու այն գաղափարների ու նախագծերի վրա, որոնք էլ փոխում են մեր պատանիների կյանքը։ Եվ հենց սրանով է առանձնանում Թումոն աշխատաշուկայում որպես «Employer of choice» :
• Թումոյի շենքն ինքն իրենով` ժամանակակից ճարտարապետությամբ, տարածքի հարմարավետությամբ և ինտերյերի օրիգինալությամբ, և, ի վերջո, ճաշարանով, որը հայտնի է ամենահամեղ սուրճով:

Թումոն առանձնանում է աշխատաշուկայում նաև իր մասնագետների զանազանությամբ և հավաքագրման յուրօրինակ մոտեցմամբ՝

«Մենք թեկնածու ընտրելիս որևէ սահմանափակում չենք դնում՝ տարիքային, սեռի, ազգային պատկանելության, կրոնի, հայրենադարձ կամ expat։ Թումոյի համար կարևոր են մասնագիտական կարողությունները և հմտությունները։ Այսօր Թումոյում աշխատում են նույնիսկ 18 տարին չլրացած պատանիներ և դրան զուգահեռ թոշակառուներ»։

Բայց, հաշվի առնելով, որ Թումոյում աշխատում են տարբեր մասնագիտությունների մարդիկ, ահա օրինակ թվարկենք մի քանիսը՝ ծրագրավորողների մեծ թիմը, որտեղ կան PHP ծրագրավորողներ, որակի ապահովման գծով ծրագրավորող, UI/UX designer, շինարարներ, էլեկտրիկներ ու ճարտարապետներ, դասընթացավարների մեծ թիմ (որտեղ աշխատում են Թումոյի 14 ուղղությունների դասընթացավարներ, 3D մոդելավորման, երաժշտության, նկարչության, ծրագրավորման, գրաֆիկական դիզայնի և այլն), հաղորդակցման թիմը, որտեղ աշխատում են հաղորդակցման մասնագետներ, լուսանկարիչ, SMM մասնագետ, տեսաձայնային արտադրության մասնագետ, թվային մարքեթինգի և գովազդի մասնագետ, հաշվապահության թիմ և այսպես շարունակ, նոր ու որակյալ մասնագետների հավաքագրման տեսանկյունից մարտահրավերներն էլ քիչ չեն։

«Թումոն գնալով ընդարձակվում է և, իհարկե, սա էլ իր հերթին դժվարացնում է գտնել որակյալ մասնագետներ՝ հաշվի առնելով առանձին մարզերի առանձնահատկությունները։ Օր օրի սովորում ենք հաղթահարել այդ մարտահրավերները՝ գտնելով տվյալ տարածաշրջանին բնորոշ լուծում, օրինակ` մի տեղում ավելի արդյունավետ է աշխատում այսպես կոչված Word-of-mouth recruiting-ը, քան հայտարարությունների տեղադրումը կամ headhunting-ը։

Առկա մարտահրավերները հաղթահարելու համար մենք մշակել ենք մի քանի պլաններ, օրինակ` հնարավոր ռոտացիաները՝ որոշ պաշտոնների համար, կամ տեղափոխման փաթեթներ նորից որոշ հաստիքների համար (երբ օգնում ենք կացության խնդիրները լուծել և այլն)»։

Այս պահին էլ Թումո ստեղծարար տեխնոլոգիաների կենտրոնը շարունակում է ընդլայնել իր թիմը, կարող եք հետևել ակտիվ հայտարարություններին staff.am-ում։

Դիտել ակտիվ աշխատանքները

Եթե ամփոփենք, ապա Թումոյի նպատակները, նախաձեռնությունները շատ են ու բազմազան, իսկ այդ աշխատանքում ներդրված եռանդը, ժամանակն ու սերը՝ անգնահատելի, որոնք էլ ամբողջ աշխարհում նորովի ճանաչելի կդարձնեն Հայաստանն ու հային։

«Կարևոր նպատակներից մեկը հնարավորիս շատ Թումո կենտրոններ բացել Հայաստանի տարածքում, որպեսզի ավելի շատ պատանիներ հնարավորություն ունենան գալ Թումո, Թումոյի կրթական փորձառությունը հասանելի դարձնել Հայաստանի ու Արցախի բոլոր բնակավայրերում և ոչ միայն. այն դարձնել մրցունակ կրթական մոդել ողջ աշխարհում` Հայաստանի կրթական բրենդ»։

Նշենք, որ համավարակով պայմանավորված փոխվեց նաև այս մեգակրթական կենտրոնի աշխատանքային և կրթական առօրյան։ Թումո ստեղծարար տեխնոլոգիաների կենտրոնը, կարևորելով իր սաների և աշխատակիցների առողջությունն ու անվտանգությունը, հեռավար կրթության և հեռահար աշխատանքի հատուկ մեթոդներ մշակեց։ Ձեռնարկված քայլերի ու որոշումների հիմքում կրկին մարդն էր իր բոլոր արժեքներով ու առաջնահերթություններով։
Մաղթենք Թումո կենտրոններին և ամբիցիոզ ծրագրերին բեկումնային հաջողություններ և հուսանք, որ համավարակը շատ շուտ կավարտվի ու վիրտուալ այցի փոխարեն՝ իրական այցով ձեզ հետ կկիսվենք նոր զարգացումներով։